Mataafa Masmuureta 34 - Mataafa Qulqulloota

Saara dukaata Waaqati desa dehaade Masmuureta awta Taawwiti fuula Apemeleki tura'e taarayta isi pahanaaysheeyye, Apemeleki ka isha daaneeyye a eeyye sookeeyye dawade

¹ Anti awta piisan Waaqa kalataysada; umma kalataadi afaayyo oppa in dapado.

² Napseetiyyo Waaqa peepanni; tajjana ka sede dakayan ka xasoodan.

³ Xooya ka ana olliiyyi Waaqa ulfeessa; ka ollin maxxaadi kukuttinna.

⁴ Anti Waaqan fade ikka ana dakaye; ka fuuraayyo piisa kara anan pahe.

⁵ A ishopa tooyyanna fuulaaysho ila'ayni diisheey, matta ra'inni in caan.

⁶ rakkatampaytose i'ullupade; Waaqa ka isha dakaye; ka rakkootaadippa isha sookshe.

⁷ Erkampattoota Waaqa, a isha tura fuurra kapa'e safarri; ka rakkoota kara ishootta sookinni.

⁸ Waaqa akkima xoonampayta kodde tooyya ka akka; a xasa isha qara' xaayanno, oo ata olooda?

⁹ Ishina qulqullowwaadiiyyi, isha fuura; a isha tura fuurra weti rakkanni in caan.

¹⁰ Nyalqa karma kuli damta dapni ka doxni; ma a Waaqa fuurra' xoori, wa paxaara takkan nefo dapni in caan.

¹¹ Hellaayyooyye! Xooya ka ana dakkaysada; Waaqa fuureetan ishin kollishaay.

¹² Nama caatta heeno ka parra dera kallaatta xajeello, ka wa paxaara akkeeta faano ayno?

¹³ A arrapaadi neequmta kapa tooyto; ka afaadi darada kapa sekaysho.

¹⁴ A neequmta kapa sekaado; ka paxaarumta kodo; ka nakayta fado ka kammaayye aano.

¹⁵ Ilda Waaqa hanqeellayaapa tooyanni; nappaadi nefo qinseetaaysho opa idakkaysanni.

¹⁶ Akka hittaaysho' piita qara qishsho'e, fuula Waaqa, a neequmta koona qara'e xaani.

¹⁷ Oton hanqeellaya ullupniiyyi, Waaqa idakayni; ka rakkootaaysho' piisa oppa ishootta sookinni.

¹⁸ Waaqa a sataataaysho' qepte kapa' idehi, ka a hapuraaysho nyarrahe dininni.

¹⁹ Rakkoota hanqeellayta ileki leki; ma xoori Waaqa piisa kela ishan pahani.

²⁰ Ka lafaadi piisa tooytini; umma ishoottoppa takka nefo in qepto.

²¹ Ukkuttowwa, neequmta ishootta lenni; a hanqeellaya needda' qara' dapa murammi.

²² Waaqa napseeta orxayaadi ifuranni umma a isha qara' xasa xaayanno qara' dapa in muramo.