Mataafa Masmuureta 2 - Mataafa Qulqulloota

Nuqusa Waaqan' reexame

¹ Samayta maana malla sulanni? Orra ka maana malla wa paata patta' kurpaanni?

² Nuqussa piita ixa'en, saarra piita ka olli oorsaden; ka Waaqa isho nuqusase Kiristoosi qara' sulanni ka olli' kiini,

³ “Teeppaasso alle' mittina; ka haataysho alle isqudaayye kanna.”

⁴ Isase moonte alka qara' kuti'e ka xosalli; ka ishootta qara seesni.

⁵ Ka miiran ishootta fukni; ka aaraadin ishootta tammaqinni.

⁶ Ka ishootta' kiini, “Anti irrootase' xayyo qulqullaawte a Siyyooni qara'en nuqusiyyo shuumade.”

⁷ Anti “Saleese a Waaqa'en salisha; isha i'ana' kide, ‘Atti a innaayyo; anka awwe ke xaayye;

⁸ ana qinsado; anti samayta piita'en, kodayteetaayti' koda; ka pora oppa piita oorto piisa qoottotaayti' koda ka ke' daashaay.

⁹ Atti ka uleeta siplatinni ishootta qeqqepissa; ka akka okkotowwa' mina ishootta pappaqissa.’”

¹⁰ Semmalla ishina' nuqussaayye, matte hitada; ishina piita mukinnaatiiyyi, isi tooytaada.

¹¹ Ka Waaqa tura fuuretan, ishi' koda koda; isha tura xareeta ka ishin xasasso.

¹² Miiraadi irra qara xaaniiy, akka ishin qara'en miironnin, akka poroppa a' pannini'i, innaadi' sakatada. A isha xelsuma' kodanna' piisa xaaysho i'olooden!