Mataafa Masmuureta 16 - Mataafa Qulqulloota

Waaqa qapnaayyo (Saara a Taawwiti isase afaa Iprutinni, “Mikitaami” kidamma)

¹ Oo Waaqqo! Xasiyyo ke qara'en xaayadeey, ana tooyte.

² In Waaqa kide, “Atti a' poqallaayyo, umma ke mali paxaarumta an qapo.”

³ Qulqullowwa piita qara ca ka ulfeessame, sene ishoottannen xasa kutta akkanni.

⁴ A killowwa kamma hirra, nyarrahataaysho ikoopta; anti' xoori kalisoota diika killowwoseneti an dehanni an co; umma afaappa nefo maxxaaysho an dawni an co.

⁵ Oo Waaqqo! Atti a' qoottotiyyo a lehanda ka a tiwwaayyo; qoyrittiyyo nefo ke harkoppa qapa.

⁶ Xayyo, xeeliyyo pora fayya oppa ana qa'e; anka qoottota fayya dukaatan akkade.

⁷ Anti Waaqase ana dehaammon kalataysada; halkeetta kuliiyyi, dikattiyyo dapa qaraaw ana oorinni.

⁸ Anti awta piisan Waaqa ittura' qapanni; qoota isha akkittiyyon co malla, an leeho.

⁹ Semmalla karittiyyo ixasoonni; napseetiyyo ka xasa qapnaanni; dakintiyyo nefo ka qaapa mali nessumaan kallaanni.

¹⁰ Napseetiyyo Si'oli kara'e a' diisso; umma a ke' amanammo akka japjapo a' kooto.

¹¹ Atti saanta caatta'e ana' akkissa; ke kapaayye xasa immakkoota caay, akkittaaytippaayyeew xasa parapara'e ca.