Mataafa Masmuureta 145 - Mataafa Qulqulloota

Masmuureta kalata

¹ Oo Waaqiyyo ka nuqusiyyo, in ke kukuttisha ka haka paraparati ke kalataysada.

² Awta piisan ke kalataysada ka haka paraparati'i, maxxaayti ulfeessa.

³ Waaqa ikuttiiy, kalata a kutta isha parpaaccisni, kuttumaadi dikatta nama' qaropeela caan.

⁴ Xelta takka xelta pilaati kodaayti tarpinni; ka kodaayti a orra qawwanno torrini.

⁵ Ka kuttumtaayti isho ulfeenase' xaayti orra qawwanno haasawanni. Anti nefo ka kodaayti a orra qawwanno oppa damdamsanni.

⁶ Samayta kodaayti a orra fuurinno oppa torraanni; anti' nefo ka kuttumtaayti salinni.

⁷ Orra ka qoota paxaarumtaayti a koopteetidesa xasan haasawanni; ka hanqeellumaatti malla ililittan dawanni.

⁸ Waaqa xoonampayta ka suraysattampayta a miira' jarjarri in kinnin ka diissatan immakaade.

⁹ Waaqa nama piisa'en daassampayta ka uumataadi piisa suraysanni.

¹⁰ Oo Waaqqo, uumataayti piisa ke kalataysanni; qulqullowwaatti kuli ka kew peepni.

¹¹ Ka ulfeena mankisteetaayti' torrini; ka qoota hupnaaytiti desa haasawanni.

¹² Ka kodoose' xaayti kokkoka ka kuttumta ulfeena mankisteetaayti upnaanni.

¹³ Mankisteetaayti mankisteeta parapara; mukissaayti xelteeyye xeltopa tuulla. Waaqa kodayteetaadi a kode piisa tooytaanni; kodaadi a koono piisan a amaname.

¹⁴ Waaqa, a tankalkalla piisa quda qapni; ka a pi'e piisa xa'inni.

¹⁵ Ilda nama piisa kepaaw tooyanni; atti ka kiseetoppa'e damtaaysho ishootta' daanni.

¹⁶ Harkaayti' diisanni ka uumata nessa qapo piisa wa a heenaatin duttaninni.

¹⁷ Waaqa saantaadi piisan hanqeellitta ka kodaadi piisan a amaname.

¹⁸ Waaqa orra isha haleenooti'i, a dukaatan isha haleena' piisa'e dehi.

¹⁹ A isha tura fuurrati'i, wa heenane piisa daanni; ka ullupittaaysho' dakayni ka ishoottan pahani.

²⁰ Waaqa a isha jaalanna' piisa tooytini, ma xoori ukkuttowwa piisa alle' patinni.

²¹ Afaayyo kalata Waaqa'e haasawanni; a isha' uume piisa haka paraparati'i, a maxxaadi qulqullitta kalataysaden.