Mataafa Masmuureta 144 - Mataafa Qulqulloota

Masmuureta putayma

Masmuureta Taawwiti a qoota Kooliyaati desa

¹ Waaqa shiliyyooy, a kalataysamo! A harkaayyo oranna sahatishe ka qupiyyaayyo torpana kollishe.

² Ha isha xoonampaytiyyo ka poriyyo a xelsuma; ka kontaleetiyyo an kela' matta qapno, dinshampaytiyyo an qara' xasa xaayanno ka a samaytiyyo ana' piddaccisno.

³ Oo Waaqqo! Akka asse isha qara tooyto'e, ata nama maana? Akka a asse kittooti isha dikatto'e, ata inna nama' maana?

⁴ Ha nama xayxayta mina; parraadi nefokan kaatta atoota' mina.

⁵ Oo Waaqqo! Moontada kaa'e ka lekkado; ka irrowwa qappado, ikka qayyaawen.

⁶ Hankaadaayti erke ka alle nyaapaayti fide; lawaayti pokke ka ishootta pashshe.

⁷ Moonte xata harkaayti deraayshe ka pisha kutta kara ana sookshe; ka harka a orra hapta' kela anan pahe ka ana qara tooye.

⁸ Afaasso dartaaw haasawanni; ka dartan xaxatta'e harkaaysho a akitta moontopa xa'inni.

⁹ Oo Waaqqo, kirpa haarayan ke' dawada; ka kehayta a riba kudanin qaasame dawattaan ke' sammara.

¹⁰ A nuqussa' putayma daanno, ka oranna kela ana orxaytaadi Taawwitin pahano ke.

¹¹ Orrase a hapta darta haasawanno kela anan pahe; ka isasene dartan xaxatta'e, harkaaysho a akitta moontopa xa'inna kela ana sookshe.

¹² Hellaanno a diira a xayyoppa caaneeyye, akka qoyra a kuttannooyye we' piisa akkade mina' kodden; hellaanno a tuparra'ew, a tuudda qeppeelliyya tika nuqusa kara' quda sirene' mina'e, a paqaarnaaden.

¹³ Kosaddaanno a unta ika lekaytan immakaaden; kaharraanno a deettappa ca, a kumadda kundadda dalen ka lekaaden.

¹⁴ Okkayaanno a kakappaden ka a in saldeessinin mali horen; umma mooraddaanno oppa pooyta in dakaannin umma rakkoota ino qara in kaynin.

¹⁵ Samayta a asse isha ettante xaadi maana olooda! Samayta a Waaqa Poqallaadi kodde, xaadi i'eeppisame.