Mataafa Masmuureta 143 - Mataafa Qulqulloota

Qinseeta a qaarqaarsa Waaqa akkatta' qinsatamte

Masmuureta a Taawwiti a Innaadi isha kamma daaneneeyye dawade

¹ Oo Waaqqo! Qinseetiyyo dakaye; ka naappumaayyo dakkaysado; ka amanumaaytin ka hanqeellumaattin ana' oorshe.

² Fuulaayti tura nama takka nefo hanqeellaytanneey, ana orxaytaayti firteeta turopa in dehayshan.

³ Paarkaalaayyo i'ana kamma xopta dawen ka piita ana' katen; ka akkima orra xattaaw le'e mina'e, tukkanta karopa ana kalshen.

⁴ Anka qara pirame ka karanxata nyarrahe.

⁵ Ka parra tarpe' matte oorsade ka kodaddaatti piisa oppa dikade; ka wa' koote oppa damdamsade.

⁶ Ka harkaayyo keepa xaashe ka akka piita kokte mina, ke' deepoode.

⁷ Oo Waaqqo! Jarjartan ana' oorshe, in kafadeey. Akkan orrase hawloppopa lekkanno an pahanaannini'i, miintaayti ana turaayye in quu'an.

⁸ Anti kewwen kippanniiy, xoonasene' xaayti a parapara teykantan ana' dakaytishe; keewwen isi daanniiy, saanta an oppan aano ana' upnayshe.

⁹ Oo Waaqqo! Anti ke kela'en dekanniiy, paarkaalaayyo kela anan pahe.

¹⁰ Atti a Waaqiyyooy; wa' jaalannitta kodeeta ana kollishe; hapuraayti a paxaara ka saanta taanteta opa ana aano.

¹¹ Oo Waaqqo! Maxxaayti malla kide ka ana caayshe ka hanqeetaaytin rakkoota kara ana sookshe.

¹² Anti an orxaytaaytiiy, xoonasene' xaayti a' ana' qapta minan paarkaalaayyo pire; ka a ana rakkacciisna' piisa pashshe.