Mataafa Iyyoopi 3 - Mataafa Qulqulloota

Iyyoopi akka kuyyaata oppa dalade jiije Haasa Iyyoopi

¹ Sekkammaayye Iyyoopi ka haasawade ka kuyyaata a oppaayye dalade jiije.

^2-3 Ka kide, “Kuyyaatose an oppa dalade a alle' patto; halkeetta a oppaayye kidene, “Inna diirta'e hitame” Kuli a alle' patto.

⁴ Kuyyaatose a alle' tukkanto Waaqa moonte xata isheetta in tooyyannin umma la'ayta oppaayye in la'aynin.

⁵ Tukkanta ka kaatta toota a isheetta lehaden. Urratta a qara' lekkado lettaadi a oppandela dumto.

⁶ Halkeesse, a tukkanto ka nan kiito. Umma kuyyawwa para oppa in dikammin; umma leyaddaappaayye takka nefo karopa in kallin.

⁷ Halkeettose a maxeento umma ililitta oppaayye in dakaannin.

⁸ A pinantase pisha kela kalo ka “Lewataani” Kidammo nyarinna ka kuyyawwa jiijna, a kuyyaase' jiijen.

⁹ Hikka para mina a kuyyaaseti, a'alle' tukkanen. Kuyyaase kippeeta la'ayta in qapnaannin, umma para ishi in qinnin;

¹⁰ maana malla kuyyaase karitta aayyaanno kara ana turan dufneey ka rakkoota kela anan in pahaneey.

¹¹ Katin an dalannooyye sitiiw pate maana in kinnin. Ka an karitta kara sooknooyye sitiiw to'e.

¹² Kupeeyya ana ampade ka amadda ana' luukshene maana'e teyaden?

¹³ Esse helani muknin heene ka jaw kiini heene ka riib kiini heene ka nessanni heene.

¹⁴ Helani esse nuqussa isho dehaamampayasene a piita tikkoosen are qitqite qupade olliiyyin mukni heene ka nessanni heene.

¹⁵ Ka piddampayasene warqeeta qapa ka dakara pirreetatin tikkaasso immake olli nessanni heene.

¹⁶ Taaki'iw, maana'en akkima saldeessa' mina an hawlammin? Ka akkima inna la'ayta in akkinini' mina an koddinin?

¹⁷ Eeyyeeyye, ukkuttowwa orra payyahissaaysho idiinni, a kakkafade kuli ka nessanni.

¹⁸ A poojame kuli ka nessanni; umma kulipaata peeqqa piddampayassoti dakayni in caan.

¹⁹ A shakka ka a kutta piisa ollin eeyye caanni, karpishsha ka poqlaadi kela nataan sookni.

²⁰ A rakkoota qara caati, la'ayta maana malla daasammi? A caattaaysho ishootta haddaawnaati caatta maana malla daasammi?

²¹ A toota xajeella ka teyanta juutamte qaropa isheetta faana ka teyni in kinniniiti'i caatta maana malla daasammi?

²² Oto hawla kara kayaneeyye, xasoonnaati'i, caatta maana malla daasammi?

²³ Nama a saanttaadi tura' patte, Waaqa ka tura' qaadde'e, caatta maana malla daasammi?

²⁴ Pakka damta oppa'e, pora quujattaaw ana' deeni ittaniyyo ka a pisha urqina' mina, olkamma mittammi in kinnin.

²⁵ Waan fuure, i'ana qara' kayen; waan tura tammaqe, i'ana qara' kodden.

²⁶ Nakayta an qapo, jaw kidayta an qapo umma nessuma an qapo; rakkoota pattannen immakaade.