Mataafa Iyyaasu 9 - Mataafa Qulqulloota

Orra Kepa'oon akka Iyyaasu sassapade

¹ Sekkammaayye nuqussa a piitaddasene Yurtaanoosi tulan ca ka irrwwa ka lakkaappan xata ka pakateetase a Mediteraaniya isho Lipaanoosi kapandesa ca a Keeti ka a Amoora ka a Kene'aani ka a Feresaata ka a Ewwaata isho a Iyyapuusata piisa ete qota hellaa Isira'eeliti desa dakayeneeyye,

² takka'e ollopa ooren ka Iyyaasu isho Isira'eeleta torpa de'en.

³ Orra Kepa'ooni xoori wa Iyyaasu katama Iyyaarko isho a Aayi qara kode qoota dakayen malla;

⁴ Iyyaasu sassapata'e, piisaden ka kalaata rakaden ka harreewwaasso qara akalla kere isho okolewwa a oppa heddisame oppa taadeta wayneeta qa'aden ka fe'aden.

⁵ Ka xopa keraya kalsaden ka kajarra isi quda kalsaden ka kalaata'e, laaqqota kokte ka paarrootte qa'aden.

⁶ Ka ete asse koden kammaayye, porase a oppa orra Isira'eeli safare Kelkela kidammo opa Iyyaasu isho Isira'eeleta kapopa de'en. Ka ishootta kidene, “Ino piita a sekatiiyyin deeninna; wan malla deene nefo akkan ishin olli nakaytan kallaano'en ishin olli kodayteeta kodatta deene.”

⁷ Isira'eeleta xoori i'ishootta kiite, “Ishina takka punu piita ino kapa dehatiiyyi deeteneey, xawwi attan ishin olli kodayteeta kodatta ettaninna?”

⁸ Ishootta ka Iyyaasu oorshen ka kidene, “Ha ino an orxayaatti.” Iyyaasu ka ishootta kideewwe, “Ata ishina a opa ayno? Ka ayshaayye deeten?”

⁹ Ishootta ka ishi oorshen ka kidene, “Ha ino orxayaatti wa Waaqa Poqallaassin piita Kipsi kare ishina kode piisan dakayne ka semmalla piita a sekati ishin kapopa deene.

¹⁰ Akkamose mina'ew wa nuqussa piitaddasene Yurtaanoosi tula ca a Amoorata lakki ka nuqusase a piita Hasepooni Sewwo kidammo isho nuqusase a piita Paasaani Ooki kidammo ka katama Astaarooti kara kalo qara kootene piisan dakayne.

¹¹ Qimootinno isho orrinno piisa ka ino erken ka kidene, kalaata qa'ada ka Isira'eeleta kapopa aana ka ishootta kida “Ino orxayaassinan koddinaay ino olli kodayteeta nakayta kodada.”

¹² Kalaatinno kuli tooyya! Laaqqotose awwe are ino qara kokte ka paarrootte, kuyyaatan tikkaappa xaaninnooyye laqqamte ka amma asse poroppa ino qara koddite.

¹³ Okolewwosen amma asse kakkaamade, an tikkaappa xaaninnooyye ammayaappa'en taadeta wayneeta qa'anne. Tooyan pora an oppa deene akkima dikkeeti seki! Xopaanno isho ohawwaano kuli ka poroppa'ew keren.”

¹⁴ Orra Isira'eeli ka kalaata a orrase pore de'e qudaayye teyyade, umma qootoseti desa Waaqa in kaassanne.

¹⁵ Iyyaasu ka oori akka nama ishootta in qappannin ikka nakaytan kallaadane'e ishootta olli kodayteeta kodade; saarrasene a samayta Isira'eeli kuli ka ishootta xaxaden.

¹⁶ A asse oltura kodayteeta kodaden kammaayye kuyyaata sessattatiiyyi Isira'eeleta akkima orrose ishootta kapa kalo ka pora dehaayye desaaw de'e dakayte.

¹⁷ Hellaasene a Isira'eeli ka aanen ka kuyyata sessa kamma katamadda a orroositi isasene Kepa'ooni ka Keffira ka Pi'erooti ka Qiriyaatiyaarimi kidamma oppa kayen.

¹⁸ Saarra samayta Isira'eeli qoota maxxa Waaqa Poqalla Isira'eelitin orrose olli kodayteeta kodaden ka xaxaden malla, orra Isira'eeli orrose'en qappanne ma, saarraasso qara'e moomo'en.

¹⁹ Saarrasene xaaysho xoori i'ishootta kidine, “Qootan maxxa Waaqa Isira'eelitin ishootta xaxanne malla, ishootta qappatta ino parpaaccisini in kitto.

²⁰ Ino akkan ishootta quda an qapannini'i, qootan ishootta olli kodayteeta kodanne malla, oton atan oorrinna ka amma ishootta quda qappanninnaayye Waaqa ino qara miiroodaay, a eeyye tawen; nama ishootta quda in qappannin.

²¹ Ma xoori ishootta a orra piisa qora qorooden ka pisha oraapen ka eyye kallaaden.” Akkima saarra kiden mina'e, nama takka nefo ka ishootta in qappannin.

²² Sekkammaayye Iyyaasu ka orra Kepa'ooni hale ka ishootta kide, “Ata are pora deha desa deeteneeye maana'e ino sassapatten ka kiinittane, ‘Ha ino pora sekaayyen deene?’

²³ Qoota asse kooten malla, amma desa ijiijamten. Haka kittaneeyye, sanynyeetaayshin oppa nama a takka nefo tika Waaqinnoot qora quura ka pisha oraapa in diisho.”

²⁴ Ishootta ka Iyyaasu oorshen ka kidene, “Poqallaay ha ino akka Waaqa Poqallaassin orxaytaadi Muuse ajaje qara'e, akkima piita piisa ishina daasho ka orra ishin tura co alle pashshon dakayne ka tammaqne ka issin paheeta malla asse koone.

²⁵ Ma amma nefo harkaaytippaawwen kinnaay, wa ke aaka ino qara koda i'ettanissa.”

²⁶ Semmalla Iyyaasu ka akka hellaa Isira'eeli ishootta in qappannini kode ka ishoottan pahe.

²⁷ Ishootta ka awsiti paayyatteeyye porase a Iyyaasu samayta Isira'eeliti reexe ikka oppa Waaqa sakatannaan oppaayye kalisoota Waaqati'i qora quurri ka pisha oraapni. Ka haka awweti qudaaw caan.