Mataafa Iyyaasu 8 - Mataafa Qulqulloota

Pateetta katama Aayi

¹ Sekkammaayye Waaqa ka Iyyaasu kide, “In fuuran, umma in tammaqan; isquda xela oranna torpino piisa qeede ka katama Aayi opa oranna tuule. Anti akka ishootta torpito ka putto'en ke putayma daasha, nuqusaaysho ka katamaasso isho piitaaysho ka xaayti koddan.

² Akkima xatta Iyyaarko isho nuqusaadi torpite ka patisse mina'e asseew katama Aayi isho nuqusaadi ollin patissa. Ma xoori amma wa piitaaysho oppa ca, meeha isho horeetta a sartan xaayshina koddaneey, katamoosen torpeeta'e tultedesa ishootta kelopa shira.”

³ Sekammaayye Iyyaasukka oori xelase a oranna olliiyyi orrase a Aayi torpeeta tuule. Iyyaasu ka xelase a oranna oppa xormewwa fayya oranna saha nama kuma kunda sessa reexe ka halkeetti erke.

⁴ Ka ishootta kide, “Aana ka katamoosene a Aayiti tultoppa asada, umma dikkeeti kapa in sekaadan ma fayya kapa harmisada.

⁵ Ana isho orra ana quda co katamaasso kapopan heeqqina ka oto ino torpa deenaaneeyye akkimase an turan koone mina'e, ishootta tura alle qahana.

⁶ Sitiiyyi ishootta isase an turan ishootta tura qahaninnonneew upnaadan ka hakan katamaasso kapa ishoottan sekaanno'e, ino kamma daanan, ino an ka ishootta turaayye alle qahana.

⁷ Sitiiyyi ishina oori porase a oppa dekattene oppaayye isooktan ka katamasene qara pirtan; maana malla Waaqa Poqalla akka qara pirtane'e ishootta tarpisha ka ishina daashaay.

⁸ Oto qara pirtaneeyye, akka Waaqa kide mina'e, katamoosen alle apittan kupa, anti seden ishina leleey.”

⁹ Sekammaayye Iyyaasu ka oori xelase xaadi a oranna erke, ikka porase a oppa asadan opa aanen; ka katama Aayiti qinda dumaatetatin arta Aayi isho a Peteli kara dekaden. Iyyaasu ka awse halkeettiiyyi samaytoppa muke.

¹⁰ Ete parri pariteeyye, Iyyaasu para karanne xa'e ka samayta Isira'eeli olkamma oorshe ka saarrasene a Isira'eeli ollin katama Aayi opa tuula'e orran qatten.

¹¹ Sekammaayye Iyyaasu isho orrase isha quda co i'aanen ka katamasene a Aayi kapa kayen ka qinda qutattattin naaba mina desa safaren.

¹² Iyyaasu turanne nama kuma keni mina co reexe ka akka katama Aayiti qinda dumaatetatin arta Aayi isho a Peteli kara asadane kode.

¹³ Ka sekkammaayye xelase a oranna qinda qutattatin co isho a qinda dumaatetatin asade piisa akka pora qapadan ka torpana harmisadane kode ka isha halkettosetiiyyi naaba kara parishe.

¹⁴ Nuqusase a Aayi ka ishootta akke ka jarjartaan para karan xa'e ka katamaappa orra xaashe ka ollin orrase a Isira'eeli torpa'e naaba Arapa opa oranna sooken. Umma a orra katamaayye tultoppan oranna asade co in upnaanne.

¹⁵ Sitiiyyi Iyyaasu isho samayta Isira'eeli piisa ka orra putame pahanaade ka ishootta turaayye pora a koommaytopa anno oppan xata qahe.

¹⁶ Orra katamaappa co piisaka oli hale ka orrase a Isira'eeli isho Iyyaasu kamma daane ka katamaappa sookshe ka kamma ollin sekaade.

¹⁷ Sitiiyyi nama a katama a Aayi isho a Peteliti co piisa ka samaytase a Isira'eeli kamma daana sooke, nama takka nefo ka katamaappa in hasnin.

¹⁸ Sekammaayye Waaqa ka Iyyaasu kide, “Katamoosen a Aayi in ke daashey, oranaayti ishoottopa oorsado.” Iyyaasu ka oori ishootta torpana paayye.

¹⁹ Ete Iyyaasu orana torpa oorsadeeyye, orrase eyye asade ka jarjartaan hire ka katamasene a Aayi qara pire ka apittan kupe.

²⁰ Orrase a Aayi ka iskammandela tooyyade, qayya ka katamaasso oppa lettoppa dote; orrase a Isira'eeli a koommaytan xata kamma daannan ka ishoottopadela tiitaawe; ikka pora oppopa tura qahan dapen.

²¹ Iyyaasu isho orra isha quda co ete orrase turan katamaayye tultoppa asade katamasene a Aayi qara pire ka apittan kupno akkeneeyye, iskammandela tiitaawen ka orrase a Aayi lessaata paayyen.

²² Orrase turan asade ka katama kara ishootta qudopaaw sooke ka orrase a Aayi otanta karopa oorsaden ka kapa muren. Nama takka nefo ka kela in hasinin ika piisa leyshen ka piren.

²³ Ka nuqusa patta harkan qapen ka Iyyaasu kapopan de'en.

²⁴ Sekkamma oori xelase a Isira'eeli ete orrase a Aayi koommaytase a oppanxata ishootta daannaan oppa'ew leyshen ka pireneeyye, desa ooreneew ka orra katamasene a Aayi kara le'eta kela hase koraatetan quuren ka piren.

²⁵ Orra Aayi a kuyyaaseti pirame piisa diira ka iskatta olloppa'e, nama kuma kudanka lakki kayni.

²⁶ Iyyaasu haka orrase piisa pirammooti'i, orana a orra Aayi opa oorsade harkoppa piitopa in xaayne.

²⁷ Isira'eeleta ka akkima Waaqa Iyyaasu ajaje mina'e, wa katamoosen oppa ca, horeeta ka mehadda piisa saratte.

²⁸ Iyyaasu oori katamasene a Aayi apittanne kupe. Ikka haka awwite eyye tara kodden.

²⁹ Sekkammaayye Iyyaasu ka nuqusase a a Aayi qoyra qara fanisacciise ka haka letta dummitto'e, qoyra qara nakayshe. Ka ete letta dumte kammaayye, akka pukkase lekkishan ka xarrase oppan katamaappopa kullinaan tura katene ajaje. Ka qaropa dakadda tuulen, dakaddoosen ka haka awweti eyye caan.

Seerase a Muuse taafe akka irroota Epaali qara nappapame

³⁰ Sekkammaayye Iyyaasu irroota Epaali qara'e pora qara Waaqa Poqalla Isira'eeliti kalisoota kalshane kode.

³¹ Sede nefo akkimase a orxaytase a Waaqa Muuse hellaa Isira'eeli ajaje ikka mataafase a seera oppa taafamte qara'e porase qara kalisoota Waaqa dehayshan daka a quda in laajamin, sipla ka apari quda in kaynin oppaayye kode. Hellaa Isira'eeli ka kalisoota a kupnaan isho a takkaytuma qara Waaqa dehayshen.

³² Iyyaasu ka porase oppa'e, ilda hellaa Isira'eeli tura'e seerase mataafa a Muuse oppa co dakada qara taafe.

³³ Sitiiyyi akkimase a orxayta Waaqa Muuse xatta hellaa Isira'eeli ajaje qara'e samayta piisa ka qimoota ka saarra ka tanynyada akka saka teyyadane'e qeesewwasene taapoota haana sanynyeetase a Lewwi turopa de'en. Ishoottoppa orra deemo hellaa piita; deemo kalayta; a deemo qinda irroota a Kersiinitinni qa'aden, a deemo ka qinda irroota Epaalitin qa'aden. Nama piisa ka qindase a oppa taapota kitto opa fuulaadi oorshe.

³⁴ Sekkamma Iyyaasu oori saka isho jiija a mataafase a seera oppa taafame piisa ishootta nappape.

³⁵ Iyyaasu seerase a Muuse ajaje oppa a takka nefo in hattinnin maliiyyi samayta Isira'eeli a iskatta ka hellaa kodde isho kalayta piisa tura nappape.