Mataafa Iyyaasu 7 - Mataafa Qulqulloota

Ishin dapayta a Akaani kode

¹ Hellaa Isira'eeli xoori waasene a Waaqa ishootta kide in teyyadan ma alle pashsha in tooytaanne. Ishoottoppa isase kafa Yihuta oppa dalade Akaani inna Kaarmi oopa a Sapti a saara waasene a Waaqa ishootta dawre oppaayye teyyade Waaqa ka sede minan Isira'eeleta qara akata miiroode.

² Sekkammaayye Iyyaasu kka Iyyaarko desa piita takka Aayi kidammitto ka katama Peteliti qinda piirtotati qatto ka piita Pete'aweni kapa kitto opa akka aanan ka piitase lettishane'e orra erke. Orrase ka aane ka piitase lettishe.

³ Ka tiitaawe ka Iyyaasu kide, “Orrose a Aayi lamaytawweey, nama kuma lakki taaki nama kuma sessa mina co patta a aano ka torpo diisheey, samayta piisa in annin.

⁴ Nama kuma sessa mina co ka orrase a Aayi torpana sooke. Ete oli torpa paayyeneeyye, orrase a Isira'eeli ka orra aayi tura alle qahe.

⁵ Orrase a Aayi ka xarra katama kapa ishootta daana paayye ka kumpaappe haka porase Sheppariwo kidammoti ishootta daane. Ka Isira'eletoppa nama kunda sessa lehi leyshe. Orra Isira'eeli kara sataata ka tammaqtan puulaawte.

⁶ Iyyaasu isho qimoota Isira'eeli ka nyarrahatan isiquda mehaddaasso kakkaa'en ka haka letta dummitto'e, taapotase a Waaqa tura seehen. Ka mattopan dela issi kuyyaalayta pulen.

⁷ Iyyaasu ka Waaqopa ullupe ka kide, “Oo Waaqqo Poqallaayyo, ata maana malla akka Amoorata ino pirtoe kirra Yurtaanoosi ino tuullisse? Ata kadi ino attuullinnin anka kama disitiiyyiiw kinnaanne wayyane?

⁸ Hela poqallaayyo, oto hellaa Isira'eeli asse paarkaalaasso tura qahanaane, ata kuli anti atan kida ka haasawada?

⁹ Ha orra keneaani isho orra piitoose opandesa kalo oton nessoose dakayaneeyye, takka'ew ino kapa muran ka piita qara sanynyeetinno kuli alle qishshaneey, atti qoota ulfeenaayti malla maana koota?”

¹⁰ Waaqa ka oori Iyyaasu kide, “Ata maana'e miinta piita dilte? Xa'e!

¹¹ Ha samayta, isha dapa kode ka waan isha ajaje tooytaatta diishe ka waasene an kide an qappadan oppa hatanta teyyade ka mehaddaasso kara juutade.

¹² Sede malla amma desa hellaa Isira'eeli paarkaalaasso tura qa'atta in ettanshan. Qoota jiijamen malla paarkaalaasso tura alle'e qahan. Umma haka wossen nyale a teyyattene issi oppa alle sookissan mali, amma desa ishin olli an caado.

¹³ Xa'e ka samayta jaqqe ka ishootta kide, ‘Samayya, Waaqa i'ishina kiini, wa neeqa'e ishin oppa ca; umma haka issippa sookissan maliiyyi, paarkaalaassin tura qa'atta a etanissaneey, kuyyaata parriti'i isi jaqqa harmisada.’

¹⁴ Sede malla parri akkima kafa piisa ana turopa dehaado'e, ishootta lele. Kafa a Waaqa xawwi reexxo, a sanynyeeta sanynyeetan dehaado. Sanynyeeta a Waaqa xawwi reexxoow, a toolla toollaan dehaatto. toola a Waaqa xawwi reexxoow, a nama takka takkan dehaado.

¹⁵ Orri nama a kapa wossen neeqa taaki dawrame akkaadan, kodayteeta Waaqa'e poote ka hellaa Isira'eeli dapoppopa kalsheey, isha ka waadi a qapa piisa a apittan kupaden.”

¹⁶ Iyyaasu ka parraytaadi teykantan xa'e ka samaytase a Isira'eeli kaffa a oppa daladeneetin dehayshe; ishoottoppa kafa Yihuta ka xawwi reexxame.

¹⁷ Ikka kafa Yihuta sanynyeeta sanynyeetan dehaysheew; ishoottoppaayye, sanynyeeta saarra ka xawwi reexxamte. Ikka sanynyeeta saarra toola toolan dehaysheew; toola Sapaati ka xawwi reexxameew.

¹⁸ Piraampira qara toola Saptippaayye oopa Sapaati, inna Kaarmi takka Akaani kidammo ka xawwi reexxame.

¹⁹ Iyyaasu ka Akaani kide, “Innaayyo, Waaqa fuure ka dapaayti isha tura lelado ka wa koote in juutan ma ana lele.”

²⁰ Akaanikka Iyyaasu oorshe ka kide, “Ha dukaatanen Waaqa Poqalla Isira'eeli tura dapa kode. Dapa an kode nefo,

²¹ mehaddasene an sarre oppa ohaata takka a orra Paapilooni paxaara ka dakara pirreeta kiilota lakki isho warqeeta a kiilota quda paka kayto ana puujjayshe anka teyyade ka tukkaniyyo kela dakara pirreeta xati kela qattishe ka piita kela hawle.”

²² Sekammaayye Iyyaasu ka akka qeedane'e kamma orra erke. Orrase ka hirittan aane ka tukkanase kela akka dakara pirreeta xati kela qaten waasene jippame akke.

²³ Ka qeede ka Iyyaasu ka samaytase a Isira'eeli isho Waaqa turopan de'e.

²⁴ Iyyaasu ka samaytase a Isira'eeli piisa ollinni Akaani qapen ka dakarase a pirreeta ka ohaatase isho warqeetase a teyyade ka hellaadi a diira isho tuparraadi ka lo'allaadi ka harreewwaadi ka kahirraadi ka tukkanaadi isho wa qapa piisa naaba Akori karoopa tuqen.

²⁵ Iyyaasu ka oori isha kide, “Ata innayti maana'e asse ino rakkacciiste? ma xoori awwe Waaqa asseew kapa ke rakkacciisa.” Ka samayta Isira'eeli piisa ollin dakaddaan ishoottoppa dakken ka apittan kupen.

²⁶ Ka dakadda qaropa tuulen, ikka haka awweti'i eyye qara caan. Porose ka haka awweti'i naaba Akoori kidammi. Ete asse koden kammaayye Waaqa oori miirase xaadi alle diishe.