Mataafa Iyyaasu 6 - Mataafa Qulqulloota

Pi'itta Iyyaarko

¹ Sitiiyyi orrase a Iyyaarko Isira'eeleta tura tammaqe ka akka nama takka nefo katamaasso karopa in kullinin taaki lakopa in sooknini'i xarrada a katama Iyyaarko duddufade.

² Waaqa ka Iyyaasu kide, “Katamoosen a Iyyaarko ka nuqusaaysho isho orra ishootta oranna torpino piisan harkoppa ke daasheey,

³ ke isho orra ke olli oranna torpino haka kuyyaata lehiti'i, kuyyaatoppa takka takkan katamoosen kapa tiitaysha.

⁴ Oto asse koonittaneeyye, qeesewwa tappa a kaasa a dawannaan tappa teeyaden ka taapota turandesa aanen ka dawen. Ka kuyyata tappattatiiyyi tappaan katamasene kapa tiitayshaaw.

⁵ Sitiiyyi qeesewwa a olkamma in qaatinnin mali akaasa dawen, orra piisa ka a olikamma in mittinin mali olloppa qito ka uuyado; sekkammaayye kawwattase a oxinta katamaasso quda kitto alle qitqitta, nama piisa ka oori katamasene karopa kulla.”

⁶ Iyyaasu ka oori qeesewwa hale ka ishootta kide, “Ishina taapotase a kodayteeta Waaqa xaysada ka haada, ishin oppaayyeew nama tappa a kaasase dawnaan teyyado ka taapota turandesa aano.”

⁷ Ka samayta piisa kideewwe, “Orra a mehadda oranna qapo a orra taapota haano tura qato, ishina'ew orra taapota haano kamma qata ka aana ka katamoosene a Iyyaariko kapa tiitaysha.”

⁸ Qeesewwasene tappa ka akkimase a Iyyaasu ishootta lele mina'e, kaasase daweetan anta paayyen, orra taapota haano ka ishootta kamma qate.

⁹ Xela oranna ka qeesewwasene kaasa dawna tura qate. Samayta a haseew ka oori orrase taapota haano kamma qate, qeesewwa ka ishootta turandesa kaasa dawaan anni.

¹⁰ Iyyaasu ka samayta kide, “Hakan anti ishina kido uuyada maliiyyi nama takka nefo afaappa nessa in sookinnin.”

¹¹ Ikka oori taapotase haadaanne takkan katamasene a Iyyaariko kapa tiitayshen ka porase a oppa xa'en opaaw ooren ka eeyye muken.

¹² Iyyaasu ka parraytaadi paraappan xa'e, qeesewwa ka xa'eneew ka taapotase xaysadeneew.

¹³ Qeesewwasene tappa ka kaasase daweetan xela oranna kamma qaten, orra taapota haano ka ishootta kammaadesa deeni, samayta a taaka ka orri taapota kammadesa anni. Qeesewwa ka kaasa dawni.

¹⁴ Ka kuyyaata lammattati takkan katamaasene a Iyyaariko kapa tiitaysheneew ka poraaysho oppopaaw ooren ka haka kuyyata lehiti asse koden.

¹⁵ Ka kuyyaata tappattati paraappan xa'en ka kuyyaase pattoppa tappaan katamasene a Iyaarko kapa tiitayshen.

¹⁶ Ete a tappattati tiitaawnaane, qeesewwa ka kaassa dawnaan, Iyyaasu ka samayta kide, “Waaqa i'ino katamoosen daasheey uuyada!

¹⁷ Katamoosen isho wa katamoosen kara ca piisa Waaqa tura wa nyale'ey, a rpalayteetase Re'aapi kidmmito orrase an turan Iyyaarko lettissa erkinen toota kela pahate isho orra isheeta olli tikaadi kela co patta eeyye paha diisheey, wa pila takkam nefo in pahanin.

¹⁸ Ishina'ew oton wossen wa nyale kidame oppa we takkan qeedattaneeyye, jiija isho rakkoota ishin minan orra Isira'eeli qara kayaay, semmalla isi tooytaada.

¹⁹ Ma xoori mehadda warqeeta ka a siplalla ka a dakara pirreeta isho a qashawoppa kodame a Waaqa rexxame'ey tika Waaqa opanne kaltan.”

²⁰ Sekkammaayye, qeesewwa ka kaasa dawen, samayta ka fayya uuyade, kawwatta oxinta a katama Iyyaariko ka oori qitqitte; nama piisa ka qinda henten karopa kulle ka qara pire.

²¹ Ka wa piitoose oppa ca piisa, iskatta ka diira ka hellaa ka orra qime ka lo'alla ka kaharra isho harrewwa piisa koraatetan alle leyshen ka piren.

²² Sekkammayye Iyyaasu ka namase lakki turan Iyyaarko lettissa turandesa erkeme kide, “Tika arpalayteetase Re'aapi kidammitto opa aana ka akkima isheetta xasa kalten mina'e, isheetta isho namaysho a isheeta kapa co piisa sooksha.”

²³ Orrase ka tikase xaadipa aane ka isheetta ka aappaaysho ka aayyaasso ka hellaasso isho sanynyeetaaysho a tikaadi kara kito piisa sookshe ka orra Isira'eeli oppa xawwi ishootta pora kallaata daashe.

²⁴ Ka oori mehaddasene warqeeta ka sipla ka dakara pirreeta isho qashawoppa kodame patta tika Waaqa opan kalta qeeden ka kulipadesa wa hase piisa katamasene ollin apittan kupen.

²⁵ Ma xoori Iyyaasu akkima arpalayteetase orrase turan piita lettissa turandesa erkamen pahate, asseew isheetta ka sanynyeeta toolaayshoti a isheetta kapa kitto piisan piramitta kela pahe. Sanynyeetaaysho ka haka awwiti piita Isira'eeli oppa kalta.

²⁶ Iyyaasu ka orri jiije ka kide, “Nama amma desa katamoosen a Iyyaarko qitqite harmissa xa'o, fuula Waaqa tura a jiijame koddo; nama katamoosen qupeeta kiritta kanno, a innaadi a kuuta tura to'en; nama xarradasene qitqite xa'inoow, a innaadi a kamma kate a tura to'en.”

²⁷ Waaqa pora asse pahonne Iyyaasu olli caade, kurra Iyyaasu ka piita piisa qara dakaade.