Mataafa Iyyaasu 5 - Mataafa Qulqulloota1 Sitiiyyi nuqussasene a Amoorata kirra Yurtaanoosi kapa qinda dumaatatin kala isho nuqussasene a Kene'aaneta pakateeta mediteraaniya kapa kala piisa akka Waaqa hellaa Isira'eeli tura kirra Yurtaanoosi kokshe ka oppan ishootta tuullishe ete dakayeneeyye, piisanti hellaasene a Isira'eeli tura tammaqen ka eeyye shamen. Aata dawra qara muratta a piita Kelkelaati kodame 2 Sekkamma Waaqa ka Iyyaasu kide, “Paltittoppa pilla kode ka helloosen a Isira'eeli oppaayye a dawra qara in muranniniti dawra qara mure.” 3 Iyyaasu ka akka Waaqa isha kide qara paltittoppa pilla kode. Ka pora takka “Kunkunnaata a dawwra qara muratta” kidammo qara'e, hellaasene a Isira'eeliti dawra qara mure. 4 Iyyaasu wa malla helloosen a Isira'eeliti dawra qara mure, qoota diira a piita Kipsi kara sooke ka oranna torpina piisa koommaytopa poraqara'ew piramen. 5 Orra piita Kipsiti sooke piisa dawra qara murade ma, hellaa a koommaytoppa annaane poroppa dalade patta dawwra qara in murannin. 6 Orrase piita Kipsiti sooke a oranna torpa kaye piisa qoota Waaqa ajajama tiiten malla, haka pirammaan kara'e Isira'eeleta haka para kunda afuriti koommaytoppa pora rarraataawte. Maana malla Waaqa akka piisse a takma isho aanna oppa puren a aappadaassoti daassata xasa kale akka ilda nefon in akkinini'i ishootta dawreey. 7 Ka pakkaaysho oppa'e, hellaasso xaashe. Hellaa nefo qoota poroppa daladen malla dawra qara in muranne; Iyyaasuka semmalla dawra qara ishootta mure. 8 Samayta piisa ka haka orrose dawra qara murade faykitteeta dinsanno'e pora a oppa safaren oppa in lellehnin. 9 Sekkamma Waaqa ka Iyyaasu kide, “Awwe nyalasene a piita Kipsi in ishin qara tawshe.” Porose ka haka awweti Kelkela kidammi ka halaammi. 10 Hellaasene a Isira'eeli ete piitoose a Kelkelaati safareneeyye leyase a paayyota oppa kuyyaata kudanka afrattati halkeetteyye Iyyaarko lakoppa xaysonessuma a qaran tarrpeeta ulfeessen. 11 Ka awse paarrayteeyye unta a piita Kene'aani oppa palite damen. Wa damene nefo laaqqota a in puullaannin isho maanqa a waatame. 12 Kuyyaatase a oppa untase a piita Kene'aani kara palite damta paayyeneeyye, mennasene moonte xata ishootta roopna iqa'aden. Umma sede kammaayye menna hellaa Isira'eeliti'i in roopne, ikka parose oppaayyeew unta piita Kene'aani damta paayyen. Iyyaasu isho xayyoolayse koraateta qapade 13 Sekkamma Iyyaasu a piita Iyyaarko kapa cooyye ela tooyyade ka nama koraateta yukade ka harkoppa qapo ka isha tura qa'ade akke. Ka kapopadesa heeqqe ka ishi kide, “Hela atti a ino qudam moon a paarkaalaanno quda?” 14 Namase ka Iyyaasu oorshe ka kide, “Anti an nama takka nefo qudan ma, an saara erkampatowwa Waaqa ka ke kapopa de'e.” Iyyaasu ka isha tura kilpiippe ka sakatade ka kide, “Poqallaayyo, maana ana orxaytaayti lelta?” 15 Sekkamma saarase a erkampattowa Waaqa ka Iyyaasu kide, “Porose a oppa qa'atte pora qulqullaaweey, xopa looqqaati kela alle sookshe.” Iyyaasu ka loqqaadi kela alle xopa sookshe. |