Mataafa Iyyaasu 4 - Mataafa Qulqulloota

Ajaja a qoota dakadda dishattaati desa daasame

¹ Ete samayta piisa kirrase a Yurtaanoosi oppa tulle kammaayye, Waaqa i'Iyyaasu kide,

² “Samaytoppaayye kafa kudanka lakki piisa oppaayye nama takka takka reexe.

³ Ka ishootta kide, ‘Aana ka kirrase a Yurtaanoosi kara porase a qeesewwa oppa qa'aden oppa dakadda kudanka lakki qeeda ka haada ka pora raawwa oppa muktan oppa disha.’”

⁴ Iyyaasu ka oori orrase a reexe kudanka lakki hale ka ishootta kide,

⁵ “Taapotase a Waaqa Poqallaassina tura qata ka kirra Yurtaanoosi oppopa aana ka pisantiiyyi kaffasene a hellaa Isira'eeli piisa mina'e, daka takka takka xaysada.

⁶ Wa malla asse kootane, akka wa Waaqa ishina kode atteyminin ka oto hellaassin kiinaane, ‘Ata sene dakadda maana?’ Ka ishin kaassannaaneeyye,

⁷ ishootta kiitane, ‘Eta a xatta taapotase a kodayteeta Waaqa kirra Yurtaanoosi oppan tuullinittooyye pisha alle urqa diishen. Semmalla hellaa Isira'eeli akka sede in teyminin ka qudan matte oorsadan malla dakaddoosen dishamen.”

⁸ Samaytase a Isira'eeli akka Iyyaasu ajaje qara kode. Ka akkima Waaqa Iyyaasu lele mina'e, kaffasene a Isira'eeli mina'e, kirra Yurtaanoosi kapa dakadda kudanka lakki qeeden ka porase a oppa muknaan oppopan kalen ka eyye dishen.

⁹ Iyyaasu ka kirrase a Yurtaanoosi oppopa aane ka porase a qeesewwasene taapotase a kodayteeta Waaqa haana qa'aden oppa'e, dakadda a pila kudanka lakki dishe; dakaddoosen nefo ka haka awweti'i eeyye caan.

¹⁰ Haka waasene a Waaqa Iyyaasu ajaje dikkannaan kara'e, qeesewwasene taapota haana kirrase a Yurtaanoosi oppa'e eeyye qa'aden. Muuse nefo sedeew Iyyaasu dehaame.

¹¹ Ete samayta piisa tuulle kammaayye, qeesewwasene taapota haana ituullen ka samaytan anta paayyeneew.

¹² Ka akkimase a Muuse ajaje qara'e, hellaa Roopeeli ka a Kaati isho sanynyeeta Minaase quda paka takka ka samaytose a Isira'eeli tura desa paayyota tuullen.

¹³ Ishoottoppa nama kuma kunda afuri ka oranna isho kontalewwaasso qapade ka oranna harmisade. Waaqa ka ishootta olli caade, ikka laka Iyyaarko opa tuullen.

¹⁴ Kuyyaasitiiyyi Waaqa ka samayta Isira'eeli tura Iyyaasu kukuttishe; orrase a Isira'eeli ka akkimase a xata Muuse ulfeessinaan mina'e haka co'e Iyyaasu ulfeessen.

¹⁵ Sekkamma Waaqa ka Iyyaasu kide,

¹⁶ “Qeesewwasene taapota haana akka kirra Yurtaanoosi oppa alle sookane'e ishootta lele.”

¹⁷ Iyyaasu ka akka kirroppa alle sookane'e qeesewwasene taapota haanati lele.

¹⁸ Ete qeesewwasene taapotase a kodayteeta Waaqa haana kirrase a Yurtaanoosi oppa sooken ka piita kokte oppa yetetta paayyeneeyye, pishaasene deyyo eeyye tipade ennoow urqeeta paayyen ka akkimase a xatta urqinaan mina kirrase piisa oppa immaken ka urqini.

¹⁹ Samaytase a Isira'eeli ka oori leyase paayyota oppa kuyyaata kundatati kirrase a Yurtaanoosi oppan tuullen ka piitase piita Iyyaarko kapa qinda piirtotatin kitto Kelkela kidammitto oppa kayen ka oppa safaren.

²⁰ Iyyaasu ka dakaddaasene kudanka lakki akirra Yurtaanoosi oppa haadene eyye Kelkelaappa dishacciise.

²¹ Ka samaytase a Isira'eeliti kide, “Oto hekeri oopaddaassin aappadaasso kassannaan ka kiinaane ‘Ata sene dakadda maanaatiiyyi?’

²² Akkima kirra Yurtaanoosi samayta Isira'eeli tura koke ikka piita kokte oppan tuullene ishootta leltan.

²³ Ka Poqalla Waaqinno akka xatta ino tura pakateeta a tiima kokshe mina'e akka ishin tura kirra Yurtaanoosi kokshe ka oppan ishin tuullishe kuli ishootta lela.

²⁴ Maana malla sede minanne samayta a piita qara co piisa harka Waaqa atta akkima kokkoki upnaada, ishina nefo ka haka paraparati'i Poqalla Waaqaayshin ulfeessitan.”