Mataafa Iyyaasu 3 - Mataafa Qulqulloota

Samayta Isira'eeli akka kirra Yurtaanoosi tulle

¹ Parraytaadiiyyi Iyyaasu isho samayta Isira'eeli paraappanne piita Shitimiti xa'en ka kirra Yurtaanoosi kapopa aanen ka eeyye kapa muken.

² Kuyyata sessa kammaayye saarrasene xaaysho samaytoppan desa aanen.

³ Ka kidene, “Qeesewwasene sanynyeeta Lewi kodde oto taapotase a kodayteeta Waaqa xaysadan ka annaaneeyye ishina kuli xa'a ka ishootta kamma'ew aana.

⁴ Umma turan poroose a uptaneey, ishootta kamma'ew aana, ishootta ishina pora akkishaay. Ma xoori taapotase kapopa in dehaadan. Otantaayshin ka a taapotoseti kara'e, sekumta a dumduma kuma lakki mina ca hatisha ka kamma desa aana.

⁵ Iyyaasu ka samayta kide, “Waaqa parriiyyi wa orra qawwanna'e otantaayshin oppa kodaay, isi harmisha.”

⁶ Ka qeesewwa kideewwe, “Ishina taapotase a kodayteeta Waaqa xaysada ka samayta tura qata.” Ishootta nefo ka ajajaadi oowsaden.

⁷ Waaqa ka Iyyaasu kide, “Awwe samaytose a Isira'eeli akkiman xatta Muuse olli kinnaade mina'e akkan ke olli co akka upnaadane'en ishootta tura ke kukuttissa paayya.

⁸ Atti'iw qeesewwasene taapota haanaati kide, ‘Oto kirra Yurtaanoosi kapa kaytaneeyye, pishaappopa lekkada ka oppa qa'ada.’”

⁹ Sekkamma Iyyaasu ka oori samaytase a Isira'eeliti kide, “Arepadesa heeqqa ka qaaleta Waaqa dakkaysada!”

¹⁰ Ka ishootta kide, “Waaqa akkima ishin olli co wa ishin upnaattane, Kene'aaneta ka Hittaata ka Hiwwaata ka Fersaata ka Kerkesaata ka Amoorata isho Iyyapuusata ishin tura alle daana.

¹¹ Taapotase a kodayteeta Waaqa a Poqallaa'e ishin turandesa kirra Yurtaanoosi oppopa qatta.

¹² Amma oori ishina kaffasene a Isira'eeli kudanka lakkippa nama takka takka reexa.

¹³ Sekkammaayye oori oto qeesewwasene taapotase a Waaqase piita piisa qara poqalla kodde haana kirrase a Yurtaanoosi oppa kamantan diitaneeyye, pishasene urqina lakki'i mittaman, pishasene illi xata urqina ka oppeela tipadan.”

¹⁴ Ete samaytase a Isira'eeli kirrase a Yurtaanoosi tulla'e tukkaannaasso pootadeeyye, qeesewwasene taapotase a kodayteeta Waaqa haana ishootta tura'e qatten.

¹⁵ Sitiiyyi qoota leyaadda roopa koddite malla, kirrase dikkeeti immakaade; qeesewwasene taapotase a kodayteeta Waaqa haana ete kirrase a Yurtaanoosi kapa kayen ka oppopa lekkadeneeyye,

¹⁶ pishasene illi xata urqina iqa'aden ka haka katamasene piita Sartaani kapa ca ka Ataami kidammaati'i eyye tipaden. Pishasene pakateetase a Arapa a oppa sookitta ca oppopa urqina kuli ka urqa diishen. Samayta ka oori qinda Iyyaarko opa tulle.

¹⁷ Qeesewwasene taapotase a kodayteeta Waaqa haana ka haka samayta Isira'eeli piisa tuullino'e, kirra koke oppa qa'aden, samayta ka kirra koke oppandesa tuulle.