Mataafa Iyyaasu 20 - Mataafa Qulqulloota

Katamadda kara orra paha

¹ Sekkammaayye Waaqa ka Iyyaasu kide

^2-3 “Hellaa Isira'eeliti kide ‘Akkimase an Muuse lele mina'e, nama a isiqaraayye in upnin maliiyyi tarshan nama ishsho, nama isha qara haalota qeeda faano turaayye katamadda a karopa qaha ka kara paha, reexa.

⁴ Namoose nama ishshe katamaddoosen oppa atakka karopa qaho. Ka qimaya a katamooseneeyye xarroppa ca tura'e wa kodde piisa torro. Sekkammaayye ishootta ka katamaappopa isha teyyaden ka pora kallaata ishi daashan ikka eyye oppa kallada.

⁵ Kadi punu nama haalota qeeda faano isha kamma de'aayye, namoose nama quda kale qoota a isqara in upnin mali tarshan quda kale ka turan a neeqa isha in qapnin malla, orra a katama a namoose nama quda kaleti namoose haalota faano turopa isha tuukkeeta ishootta parpaaccisini in kitto.

⁶ Isha nefoow, haka xora samayta turopa dehaado ka firrteeta akkado'e ka haka nama katamoosen oppaayye saara qeesewwa kodde toono kara'e eyye'ew kallada ka sekkammaayye qaha ka katamasene a turan oppa sooke opa tiitaawa ettansha.”

⁷ Sekkammaayye oori hellaasene a Isira'eeli ka piitase kunkunnawwaan immakaatte a Niftaalemi karaayye katamasene a Qaadesi Kelila kara ca ka piita Efreemitiiyyi katamasene kunkunnawwaan immakaade katama a Sekemi ka piitase irrowwaan immakaatte a Yihuta karaayye katama Qiiriyaati arapa isasene Keprooni kidamma reexxen.

⁸ Ka akkimoose mina'ew, katamasene Yurtaanoosi tula desa Iyyaarikooyye qinda piirtotatinni piita a kafa Roopeeli oppaayye Peseerise koommaytoppa kitto ka Kele'aadise piita a kafa Kaati kara kitto karaayye Raamooti ka Paasaanise piita a kafa Minaase kara kitto karaayye Koolaani reexxen.

⁹ Semmalla tooy katamaddoosen are qaropeela dikame nama Isira'eeli taaki nama kalayta kodde ka lake de'e ka ishootta oppa kalo oton a isqara in upniniiyyi nama quda kala ka ishshaayye haka isha qara faratammitto'e katamaddoosen oppaayye takkan karopa qaha ka eyye nama isha qara haalota qeeda faano kela paha.