Mataafa Iyyaasu 2 - Mataafa QulqullootaIyyaasu akka lettissampaya katama Iyyaarko opa erke 1 Sekkamma Iyyaasu inna Newe ka safara Shitiimiti desa akka aanan ka piita Kene'aaniti katama Iyyaarko lettishane'e, lettissampaya lakki erke. Orrase ka aane ka katamasene a Iyyaarkootiiyyi tika arpalayteeta takka Re'aapi kidammitto opa kale ka eyye muke. 2 Sekkammaayye, orra Isira'eeli akka katama Iyyaarko lettissa de'e otoota ka nuqusa Iyyaarko qara kayte. 3 Nuqusa ka Re'aapi kapopa orra erke, ikka isheeta kidene, “Orrose tikaayti muke piitinno piisa lettissa'e de'ey, ishootta sookshe ka ino daashe.” 4 Isheeta xoori namase lakki alle juute ka orrase pora ishootta faano kiite, “Ha keeto tikiyyopa de'enema, pora ishi de'en anti an upo. 5 Ha ishootta a letta shishshipnittooyye, xarra paleeta in dufammin turanneew tikiyyooyye sooken, umma pora a qara aanen an upooy, intoonno jarjartan kamma hira iqqaqqaaptaneey.” 6 Isheeta xoori deyyo'ew alleeta qaropa ishootta fayyisse ka qora talpa a eeyye qunte kara ishootta juutte. 7 Sekammaayye orrase a nuqusa erke ka katamaappa sooke ka haka porase kirra Yurtaanoosi oppan tuullinooti'i, lettissampayasene pora faden. Ete xata sookeneeyye xarra katama idufamme. 8 Re'api ka a lettissampayasene in muknin turanne ishootta kapoopa fayyatte. 9 Ka ishootta kite, “Waaqa akkima piitoose are kitto ishina daashe, waan ishin upnaade a kuttati'in fuurre orra are piitoose oppa kalo piisa ka ishin tura tammaqe ka eeyye shame. 10 Ha ishina a piita Kipsiti sooknittaneeyye, atta akka Waaqa ishin turaayye pakateeta tiime kokshe, ishina ka anten ka kirra Yurtaanoosi tuullaayye nuqussa a piita Amoori lakki Sihooni isho Ooki kuli lessen ka pirten in dakayne. 11 Ha ino eten wossen piisa dakayneeyye, tammaqtannen eeyye piramme. Umma nama ishin tura tammaqta diishe takka nefo in co. Waaqoose xaayshin moonta ka piita qara keeton isha Waaqa. 12 Semmalla amma akkiman anti paxaarumta ishina kode mina'e, akka asseew toolinno paxaarumta kootan maxxa Waaqatin ana xaxada. Ka milikita an ishinan upnaado kuli ana daasha. 13 Ka aappinno ka aayyaanno isho hellaanno a diira ka tuparra isho wa a xaaysho kodde piisan pahada ka ino in leyshan. 14 Orrase ka orshe ka isheetta kide, “Oton asu nama kapa ino a lellin, ino ka waan ke tura xaxanne an dikkinniniiyyi, a Waaqa alle ino piro. Ma oto Waaqa piitose are kitto ino daasho anka oppopa kallooyye, akkan ke isho toolaayshinan pahano'e, dukaatannen ke tura xaxanninna.” 15 Iskatteetase qoota tikaadi kawwatta katama quda kayte malla, wataroota qeette ka maskootetoppan piitopa raa'isse ka qudan ishootta lekkisse. 16 Ka ishootta dehaamte ka kite, “Haka orrase ishin faano tiitaawno kara'e, aana ka haka kuyyaata sessaati'i, irrowwa kara dekada kuli'i poraayshin antaneey.” 17 Ishootta ka isheeta kidene, “Wa ino kiite piisan koona. 18 Ma atti oton ino piisse qapatta deeninnooye, turanneew aappaayshin ka aayyaassin ka hellaassin a diira isho sanynyeeta toolaayshina piisa tikaaytippa hale ka maskootese a oppan ino lekkisse oppaxata rufta tiima raa'ishe. A taakiti xaxoosen an ke xaxanne oppa qapama an ettaninnooy. 19 Oton nama tikaaytippa lakopa sooka ka to'ayye diikaadi ino qara in fadamo. Ma xoori oton tikaaytippa ca nama ka isha quda qappada diikaadi ino qara fadama. 20 Kapanneew oton waan koona'e pora torrita, xaxoosen an ke tura xaxanne an tooytaanno.” 21 Isheetta ka wa ishootta kidene oppa oowsate. Ka ishootta kalta xaayyite ka akka isheeta kiden mina'e ruftase tiima maskotetoppa xata raa'isse. 22 Lettissampayasene ka orrase ishootta faano turaayye irrowwa qaropa aanen ka haka kuyyata sessaati eyye dekaden, orrase pora ishootta faano ka oori ishootta dape. Ka alle Iyyaarko opa tiitaawe. 23 Namase lakki ka irrootase qara lekkade ka kirra tulle ka Iyyaasu innasene a Newwe kapoopa tiitaawe ka wa ishootta qara kaye piisa ishi torren. 24 Ka Iyyaasu kidene, “Ha Waaqa dukatane piitose ino daashe. Ha orra piitase oppa co piisa ino tura tammaqe ka eeyye shame. |