Mataafa Iyyaasu 16 - Mataafa Qulqulloota

Piita kaffa Efreemi isho a Minaase quda paka takka koddayyaata daasamte

¹ Koddayyaata a sanynyeeta Yoosefi daasamte Iyyaarko kapaayye kirra Yurtaanoositi xaani ka qinda piirtotatin ellasene a Iyyaariko kapa paayyanni ka koommaytoppan tarpini ka haka piitase irrowwa qapto a Peteli kayni.

² Ka Peteli xaaniiw ka piitase a orra Arka oppa kalo a Atarooti-adaari kidammitto oppan tarpini ka haka Loosa kayni.

³ Ka qinda dumaatatinniiw piita orra Yafelati opa xata lekkanni ka haka piita Petihorooni kayni. Ka piita Keseri oppan tarpiniiw ka pakateeta Mediteraaniya mina kayni.

⁴ Hellaasene a Yoosefi Efreemi isho Minaase koddayyaataaysho'e teyyaden.

Qoottota Efreemi

⁵ Sede qoottota a kafa Efreemi a daloota dalootan ishootta daasamte, xeelaaysho Atarooti adaari xaani ka qinda piirtotatinni Peetihorooni a ela qatto oppan fayyanni

⁶ ka eeyye tarpini ka pakateeta Mediteraaniya kayni. Qinda qutattatinni xeelaaysho Mikmetaati. Ka eeyye xaani ka qinda piirtotati Tanaatishilo opa qeppini ka qinda piirtotatin tarpini ka Yaanoha opa anni.

⁷ Ka Yaanohaayye xaani ka kumpaappe Ataarooti isho a Arotin xata lekkanni ka Iyyaariko kayni.

⁸ Ka qinda dumaatetatinni xeeloose Taapuhaayye xaani ka haka kirra Qaana kayni. Ka pakateeta Mediteraaniyati dikkanni. Piita kafa Efreemi daloota dalootan daasamte ka lehandaasso koddite sede.

⁹ Ka katamadda isho kantaada a haminnta Minaase kara ca ka kafa Efreemi daasame kuli qapanni.

¹⁰ Kafoose a Efreemi xoori Kene'aaneta a Keseri kara kalto alle in sookinne. Kene'aaneta ka haka awweti Efreemetoppa kalta. Ma xoori irreetanne ishootta kela koda a hupna kooni.