Mataafa Iyyaasu 11 - Mataafa Qulqulloota

Iyyaasu akka nuqusa a qinda qutatta torpe ka pute

¹ Nuqusa Hassoori Yaapini ete sede dakayeeyye Yopaani nuqusa piita Maatooni isho nuqussa a piita Shimironi isho a Akshaafi kamma'e erkade

² ka akkimoose mina'ew qinda qutattatinni nuqussa a piisse a irroowwa ka a pakateeta Keliilaati qinda tupattatin ca ka nuqussa naaba Yurtaanoositiiyyi kunkunnawwa kela ka a qinda dumaatetatinni Fotti kapan desa kala kamma erkade.

³ Ka akkimoose mina'ew, orrase Yurtaanoosiiyyi qinda piirtota isho a dumaatetatin kalo, Kene'aaneta ka Amoorata ka Hiittaata ka Fersaata isho Iyyaapusatase irrowwa qara kalto ka Hiiwatase piita Misippaati irroota Hermooni quda kalto kuli kamma erkadeew.

⁴ Nuqussasene a kamma erkade ka takka'e xelaaysho a oranna torpino isho fartadaan sooken, lekumaasso ka akka taahayta kirra pahan.

⁵ Nuqussoosen piisa ka xelaaysho a oranna ollopa oorsaden ka orra Isira'eeli torpa de'en ka pisha takkan Meroomi kidamma kapa pora qapaden.

⁶ Waaqa ka Iyyaasu kide, “In fuuran, parri esse akka ishootta piisa leyshane'en kela meella pira ka Isira'eeleta turopa tuukkaay. Atti ka fartadaasso tupa qintilla quurta ka sarakelladasso apittan kupta.”

⁷ Iyyaasu isho xelase a oranna ka ollin tuulen ka a ishootta isi qara in upnin mali pishasene a Meroomi kapa orrase torpen.

⁸ Waaqa ka Isira'eeleta kelopa orrase oorshe. Isira'eeleta ka paarkaalasene xaaysho torpite ka qinda qutattatinni haka piita Miisirefotimaayimi isho a Siidoonaati'i ka qinda piirtotatinni haka naaba Missippaati kamma daante. Ka a nama takka nefo kela in hattinnin mali orra piisa lesse ka pirte.

⁹ Iyyaasu ka akkimase a Waaqa isha ajaje qara kode ka fartadaasso tupa qintilla quure ka sarakelladdaasso apittan kupe.

¹⁰ Iyyaasu ka iskammandesa tiitawe ka Hassoori qara pire ka nuqusaadi kuli korraatetan ishshe. Hassoori sitiiyyi mankistewwa ca piisa qara kokkonnuma qapta.

¹¹ Qoota nama a katama Hassoori kara co piisa korraatetan leysame ka pirame malla, nama takka nefo katamoosen kara in pahane; katamoosen kuli ka apittan kupaden.

¹² Akkimase a orxayta Waaqa Muuse ajaje qara'e Iyyaasu katamaddoosen piisa qara pire ka nuqussaasso kuli pooje ka koraatetan leyshe ka pire.

¹³ Ma xoori Isira'eeleta katamadda irrowwa qara ca in kupne ma, katama Hasoori patta Iyyaasu kupe.

¹⁴ Isira'eeleta ka horeeta isho wa katamaddoosen oppa poojte piisa tikkaasso opan kalatte; ka nama oppa co piisa koraatetan lesse ka pirte.

¹⁵ Wossen a Iyyaasu kode, Waaqa orxaytaadi Muuse ajaje; Muuse ka turaayye Iyyaasu ajaje; Iyyaasu ka oori ajajose a Muuse isha ajaje piisa koda qara nakayshe.

piitadda a Iyyaasu qara pire

¹⁶ Iyyaasu ka piitadda a irrowwa qarandela ca ka a Nekeepi ka a Koosheni ka a koommaytoppan xata ca ka naaba Yurtaanoosi isho komola ka koommayta Isira'eeli piisa qara pire.

¹⁷ Ka akkmoose mina'ew, irrootase a Halaaqi haka Seeyriti oorto paayyatte haka irroota Hermooni kamman xata haka naaba Lipaanoosi ka haka piita Alkaati oorto piisa qara pire. Ka nuqussa oppa ca qara pire ka piisa leyshe.

¹⁸ Iyyaasu haka parra lekaati'i, nuqussosen oli torpen.

¹⁹ Katamadda piisa oppaayye Hiiwwaata a piita Kepa'ooniti kalto patta orra Isira'eeli olli kodayteeta kodade ka olli nakaytan kallaade diisheey, hellaa Isira'eeli katamadda taakane piisa orannaanneew qeeden.

²⁰ Waaqa ka akka turan Muuse ajaje mina'e, Isira'eeleta a orrose'en suraysannin mali akka alle pirto'e, Waaqa akka orrose karitta kokkonnaysho ka Isira'eeleta torpa xa'o kode.

²¹ Sitiiyyi Iyyaasu ka piitaddasene irrowwa qara ca, a Keprooni ka a Tapiiri isho a Anaapi opa aane ka piitaddasene irrowwa Isira'eeli isho a Yihuta qara ca opa tuule ka sanynyeetase a Enaaqi leyshe ka katamaddaasso ollin alle pashshe.

²² Orra asanynyeetose a Enaaqi kodde oppaayye orra shakkayta piita Kaasa ka a Kaati isho a Ashtoti kara pahe diisheey, a piita Isira'eeliti ca oppa nama takka nefo in pahane.

²³ Iyyaasu ka akkimase a Waaqa Muuse ajaje qara'e, piita piisa qara pire ka hellaa Isira'eeliti kaffaasso piisa mina'e, piitase oppa qoote, piitoose ka awsitiiy desa paayyatte oranna kela nessatte.