Mataafa Iyyaasu 10 - Mataafa Qulqulloota

Akkima piirtota moonta quda qa'atte

¹ Nuqusase a Yursaalami Adonisedeqi ka akka Iyyaasu Aayi isho nuqusaaysho qara kode mina'e Iyyaarko isho nuqusaaysho alle pashshe dakaye. Ka akka orra Kepa'ooni orra Isira'eeleta olli nakaytan kallaatta'e kodayteeta kodade kuli dakaye.

² Qoota katama a Kepa'ooni katamadda a pila nuqussa mukinna a qara qapto ka katama Aayi kuli qara jaallitto orraadi nefo ka oranna kokkoki malla dikketi tammaqe.

³ Adonisedeqi ka Hoohaami nuqusa Keprooni ka biri'aami nuqusa Yaarmuti ka Yaffi'a nuqusa Laakiishi isho Taaperi nuqusa Eklooni kidamma kamma'e erkana erke.

⁴ Ka ishootta kide, “Ana awla ka orrose a Kepa'ooni Iyyaasu isho Isira'eeleta olli kodayteeta kodade torpina.”

⁵ Sekkammaayye oori nuqussasene ken a piita Amoorata, nuqusa katama Yursaalami ka a Keprooni ka a Yaarmuti ka a Laakiishi isho a Eklooni ka orrase xaaysho a oranna piisa ollopa oorshen ka sooken ka orrase a Kepa'ooni torpeeta kapa muren.

⁶ Sekkammaayye orrase a Kepaooni ka Kelkelaapa Iyyaasu erkade ka kide, “Nuqussasene a piita Amoora irrowwa qarandela kala ino torpa'e olli kaleneey, poqallaay jarjartan ino awle ka inon pahe ka ino qara in tooyan.”

⁷ Iyyaasu ka oori xelase a oranna kokokkoka isha quda co ollin Kelkelaayye sooke ka anta xa'e.

⁸ Waaqa ka Iyyaasu kide, “Orroose piisa harkaaytippa'en daasheey, ishootta turan fuuran, ishoottoppa nama takka nefo ken ettanshooy.”

⁹ Iyyaasu ka oori halkeetteeyye katama Kelkelaati xa'e ka hakaasiti anni rafe ka a isi qara in upnin maliiyyi ishootta qara ure.

¹⁰ Waaqa ka hellaa Isira'eeli tura Amooratase tammaqshe; Isira'eeleta ka Kepa'ooni kara ishoottoppa quurte. Ka a kela hase takeela Peetehooronitin xata haka katama Aseeqa isho a Maqetati kamma daante.

¹¹ Amooratase ete hellaa Isira'eeli tura takeelan xata qahanittooyye, haka katama Aseqati'i Waaqa moonte xata ishootta qara apteenta a dakada kukutta mina kikitto roope. Orra apteenta lesse ka lekumtan orra a Isira'eeleta lesse qara qapa.

¹² Kuyyaatase a Waaqa Amoorata hellaa Isira'eeli kelopa orshe, ikka puteneeyye, Iyyaasu hellaasene a Isira'eeli tura'e Waaqa haasawade ka kide, “Awwe letta piita Kepa'oonitiiyyi in dummin, umma leya naaba Elooni qara in lehnin.”

¹³ Semmalla haka orra Isira'eeli paarkaalaasso qara haalota pooyyinaane'e, letta isho leya ka a in dummin mali moonta quda jaren. Sede ka mataafa Yaashari oppa taafamte ka eeyye kitta. Letta ka duma tiitte.

¹⁴ Waaqa qoota isha hellaa Isira'eeliti torpino malla, kuyyaata a oppa asse qinseeta nama dakaye turan in kitto, umma kamma nefo apari in koddine.

¹⁵ Sekkammaayye oori Iyyaasu isho xelase a oranna a Isira'eeli piisa safarase xaaysho opa Kelkelaapa tiitaawen.

Iyyaasu akka nuqussasene a Amoorata ken leyshe

¹⁶ Nuqussasene ken a Amoorata ka qahen ka pora takka Maqeeta kidammooyye rahana kara deddekaden.

¹⁷ Sekkammaayye Iyyaasu akka nuqussasene keni rahana Maqeeta kara deddekadene dakaye.

¹⁸ Iyyaasu ka kide, “Shilalla suksha ka rahanoosen a kara caane tura dufa ka kapa orra tooyto ajaja.

¹⁹ Ishina xoori paarkaaladdaassin daana kammaaw caada. Ka leysha, akka ishootta torpitan ka putane'e Waaqa ishin kelopa ishootta oorsheey, akka ishin tura katamaddaasso nefo opa in qahanini'i tura mura.”

²⁰ Samayta a Isira'eeli isho Iyyaasu ka orrase torpen ka piren; orra shakkayta patta ka kela pahe ka katamaddaasso oppopa qahe.

²¹ Sekkammayye samayta Isira'eeli piisa ka porase a Iyyaasu oppa safare Maqeeta kidammo opa nakaytan tiitaawe. Se minan xaate'e nama takka nefo ka hellaa Isira'eeli mineela in tooyyannin.

²² Sekkammayye Iyyaasu ka kide, “Nuqussasene ken rahana kara pana ka ana kapopan xooya!”

²³ Ishootta ka nuqussasene ken nuqusa Yursaalami ka a Keprooni ka a Yaarmuti ka a Laakiishi isho a Eklooni rahanasene kara sookshen ka Iyyaasu kapopan de'e'en.

²⁴ Ete ishoottan de'eneeyye, Iyyaasu orrase a Isira'eeli piisa ollopa hale ka saarrasene a xela orannaati kide, “Desa xooya ka loqqaassinan nuqussosen xolmaappa yeyyetada.” Ikka akka ajajamen qara'e nuqussasene xolmaappa yeyyetaden.

²⁵ Iyyaasu ka saarrasene a xela orannati kide, “Waaqa paarkaaladdassin a torpitane piisa asseew kodaay, in fuuran ka in tammaqan, maxanyuma ka kokkonnaada.”

²⁶ Sekkammaayye Iyyaasu ka nuqussasene ken piisa leyshe ka qora ken qara fannise. Pukkadaasso ka haka letta dummitto'e, qora qara nakayen.

²⁷ Iyyaasu ka ete letta dumteeyye orra ajaje ikka pukkadasene qora qara lekkishen ka rahanase a turan kara dekaden karpa dakken ka tura shilalla kukutta dufen, ikka haka awweti eeyye caan.

Iyyaasu akka oranna torpa tupaaw caade

²⁸ Kuyyaasetiiyyi Iyyaasu ka piita Maqeeta torpe ka qara pire ka nuqusa piitoseti kuli koraatetan ishshe ka orra a katamoosen oppa co piisa pire. Akkima turan nuqusa Iyyaarko kode mina'e, asseew nuqusa Maqeeta kode.

²⁹ Sekkammayye xelase a Isira'eeli isho Iyyaasu ka piita Maqeetaati desa piita Liipina opa aanen ka orra oppa co torpen.

³⁰ Waaqa ka Isira'eeleta akka orra Liipina isho nuqusaaysho putto kode. Ikka katamaasene isho nama oppa co piisa alle pashshen ka akkima nuqusa Iyyaarko koden mina'e asseew nuqusa Liipina kodeneew.

³¹ Sekkammaayye Iyyaasu isho xelase Isira'eeli piisa piita Liipinati desa piita Laakiishi opa tuulle ka kapa muren ka orra oppa co torpen.

³² Waaqa ka orrase a piita Laakiishi ishootta kelopa oorshe, ikka kuyyaata lammattati qara piren ka akkima piita Liipinati orra leyshen ka piren mina'e, nama oppa co piisa koraatetan leyshen ka piren.

³³ Sitiiyyi Hooraami nuqusa piita Keeseri ka orra Laakiishi qaarqaara de'e. Iyyaasu ka isha isho orra a ollin de'en piisa leyshe ka pire. Umma nama takka nefo kela in hasne.

³⁴ Sekkammaayye Iyyaasu isho xelase a Isira'eeli ka piita Laakiishiti desa piita Eklooni opa tuulen ka kapa muren ka orra oppa co torpen.

³⁵ Ka kuyyaasitiiyyi qara piren ka akkimase a katama Laakiishiti orra leyshen ka piren mina'e, orra oppa co piisa koraatetan leyshen ka piren.

³⁶ Sekkammaayye Iyyaasu isho xelase a Isira'eeli piisa piita Eklooniti desa piita Keprooni opa tuulen ka orra oppa co torpen.

³⁷ Ka qara piren ka nuqusa piisseti ka orra katama isho kantadaappandesa co piisa akkimase a piita Eklooni koden mina asseew koraatetan leyshen ka piren. Nama takka nefo ka kela in hasnin.

³⁸ Sekkammaayye Iyyaasu isho xelase a Isira'eeli piisa itiitaaweneew ka piita Taapiri opa tuulen ka orra oppa co torpen.

³⁹ Ka katamaddaadi isho nuqusaadi qara piren ka orra opa co koraatetan leyshen ka akkima nuqusa Keprooni isho a Liipina ka samaytaaysho koden mina'e, orra piitoose oppa co piisa piren. Nama takka nefo ka kela in hasnin.

⁴⁰ Pora asse pahonne Iyyaasu ka piita piisa qara pire ka piitadda irrowwa qarandela ca ka piitadda a qinda kammatin ca ka a koommaytoppan xata ca ka piita komola isho nuqussaasso ollin piisa qara pire ka akkimase a Waaqa Poqalla Isira'eeli ajaje qara'e, nama oppa co piisa leyshe ka pire. Nama takka nefo ka kela in hasnin.

⁴¹ Ka piita Qaadesi parne kidammitto paayyatte haka piita Kaasaati ka piita Koosheni kapan desa kitto haka Kepa'ooniti piisa qara pire.

⁴² Qoota Waaqa Poqalla Isira'eeli Isira'eeleta torpino malla, Iyyaasu nuqussoosen piisa piitadda a mukinnaane ollin tuula takka kapa'ew qara pire.

⁴³ Sekkamma Iyyaasu isho xela Isira'eeli piisa ka Kelkelopa safaraaysho opa alle tiitaawen.