Mataafa Iyyaasu 1 - Mataafa Qulqulloota

Akka Kene'aani' putamte

¹ Ete orxaytase a Waaqa Muuse to'e kammaayye, Waaqa Iyyaasu inna Newwe isase Muuse qaarqaaro'e haasawade ka kide,

² “Iyyaasu, orxaytiyyo Muuse ito'ey ke isho samaytose a Isira'eeli xa'a ka piitase an ishina daanno oppopa kalta'e kirra Yurtaanoosi tuulla harmisada.

³ Akkan Muuse lele mina'e, pora oppa kamintaayshin yetatto piisan ishina daashaay.

⁴ Xeelaayshin, qinda tupattatinni koommayteeyye xa'a ka qinda qutattatinni haka irrowwa Lipaanoosi kaya. Ka qinda piirtotatinni kirrase kutta a Efratiisitiiyyi xa'aw ka qinda dumaatatinni haka pakateetase kutta kaya; piisse a Hittaata kuli karaaw caatta.

⁵ Haka kittooyye, nama ke mina in qa'ado ka ke in puto. Anti akkiman Muuse olli caade mina'e, asseewwen ke olli caada, umma alle ke an kato, umma pakkanna ke an diisho.

⁶ Samaytose a Isira'eeliti'i, piitoose an xatta aappadaassoti xaxade ka kide 'Ishina'en daashaa.’ Ke ishootta lehacciisaay, in fuuran; kokkonnaado ka japaado.

⁷ Ka seerase a orxaytiyyo Muuse ke daashe piisa tooytaado ka koda qara nakayshe. Ka akka wa koonitta piisa ke qajeelane'e, kapa arepa ka arepa in kidan.

⁸ Mataafose a seera kuyyaata piisa oppa tooye ka wa oppa taafame piisa tooytaado ka koda qara nakayshe ka halkeetta ka kuyyaata piisa oppaaw dikado. Oton asse kootaayye, wa koonitta piisa ke qajeela.

⁹ Pora oppa annito piisa opa ana Waaqa Poqallaatti ke ollin caadaay, in fuuran, umma in tammaqan ma, kokkonnaado ka japaado ke an kiine?

Ajaja a iyyaasu samayta Isira'eeliti daashe

¹⁰ Sekkamma Iyyaasu saarrasene a samayta'e ajaje ka kide,

¹¹ “Safaraappopa aana ka samayta kida'e, ‘Partaaniiyyi piitase a Waaqa Poqalla akka lehattane ishina daanno oppopa kalta ka lehatta'e, Yurtaanoosi tuullitaneey, kalaata harmisada.’”

¹² Iyyaasu ka sekamma kafa Roopeeli ka a Kaati isho a Minaase quda paka takka kideewwe,

¹³ “Waaqa Poqalla akkima piitose ishina daasho ka oppa ishin nessisho orxaytase xaadi Muuse akka turan ishina lele matte oorsada.

¹⁴ Iskattaayshin ka hellaassin isho horeetaayshin piisa a piitase a Muuse kirra Yurtaanoosi kapa ishina akkishe oppa tawen. Orraayshin a kokokkoka ka mehadda oranna qapo xoori, hellaassin a Isira'eeli qaarqaara'e a paayyota turandesa tuullo.

¹⁵ Ka akka Waaqa ishin nessishe mina'e, haka hellaassin nessinno, ikka piitase a Waaqa Poqalla ishootta daanno oppa kaynaan ka lehannaan kara'e ishootta qaarqaaren. Sekkammaayye piitase a orxaytase a Waaqa Muuse ishina akkishe qinda piirtotatin kitto oppopa ittiitaawtan ka oppa kallaataaneey.”

¹⁶ Ishootta ka Iyyaasu oorshen ka kidene, “Aa, wa ino' kiite piisan koona ka pora oppopa ino erkinitto piisa opa anna.

¹⁷ A Waaqa Poqallaatti patta akka Muuse olli caade mina ke olli caado diisheey, akkan we piisan Muuse ajajamme mina'e, asseewwen ke ajajamma.

¹⁸ Nama ajajaayti tiinno ka ke dakayni in kinnin alle'e ishshan atti pattaaw kokkonnaado ka japaado!”