Mataafa Dikoota 9 - Mataafa Qulqulloota

Xaysonessuma a qaran tarpeeta

¹ Apiita Kipsi kara sookeneeyye para lammattati leya paayyota oppaayye, Yaahiwwe ka koommayta Siinaati Muuse haasawade ka ishi kide,

² “Samayta Isira'eeli xoora a ishi qapame oppa'e akka xaysonessuma a qarantarpeeta ulfeesso kode.

³ Ka xaysonessumoosen leyoose oppa kuyyaata kudanka afrattatiiyyi shishshipeeyye, eta a ishi qapame oppa'e akka taantetaadi ka akka seeraadi piisa qara ulfeessa.”

⁴ Semmalla Muuse ka akka samayta Isira'eeli xaysonessumoosen a qaran tarrpeeta ulfeesso ishootta' lele.

⁵ Samayta Isira'eeli ka koommayta Siina oppaayye leyase a paayyotati kuyyaatase a kudanka afrattati shishshipeeyye, xaysonessumasene ulfeesse ka akka Yaahiwwe turan Muuse' haasawade qara'e we piisa kode.

⁶ Ishoottoppa orra pukka quda qappattaan nyale a deemo ka ca; ka awwse xaysonessumasene a qaran tarpeeta ulfeessa malaale; ka Muuse isho Arooni turopa dehaade,

⁷ ka awse Muuse kidene, “Ino pukka quda kayeeta minannen nyalle; ma maana mallan xooraadi a ishi qapame oppa'e akkan kalisoota Yaahiwwe an kalinnini samayta Isira'eeli oppa dawramme?”

⁸ Muuse ka ishootta' oorshe ka kide, “Hakan wa Yaahiwwe qootaayshina desa ajajna dakayno kara'e asada.”

⁹ Yaahiwwe ka Muuse haasawade ka kide,

¹⁰ “Samayta Isira'eeliti haasawado ka ishootta kide, ishin oppa taaki sanynyeetaayshin oppa nama takka oto pukka quda kayeeta minan nyalo taaki pora sekopa aanooyye, qaran tarpeeta Yaahiwwe ulfeessa i'ettansha.

¹¹ Ka leya lammatta oppa kuyyaata kudanka afrattatiiyyi shishshipeeyye ulfeessan; ka laahase a xaysonessuma a qaran tarpeeta nefo laaqqota a kara haddaya in qapnin isho haashsha haddaawnaatin damen.

¹² umma haka parinitto kara'e we takkan nefo kela in hattinnin, ka lafaadi takkan nefo in qepinnin ka taanteta a xaysonessuma a qaran tarpeeta piisa tooytaden.

¹³ Ma xoori nama a in nyallin taaki pora seka opa in annin, oton xaysonessuma a qaran tarpeeta ulfeessa diishaayye, qoota xoora qapame oppa Yaahiwwe kalisoota kalissa diishe malla, namoose a samaytoppa alle seeramo. Ka juppootaadi malla qitaatetaadi teyyado.

¹⁴ Kalayta a ishin oppa kalo takka, oton xaysonessuma a qaran tarpeeta'e Yaahiwwe ulfeessa heenaayye, akka seera isho taanteta a xaysonessuma a qaran tarpeeta qara ulfeesso; kalayta isho nama piita, seera takkaaw qapnaadan.”

Urrattase tukkana Waaqa qara uwwinno

¹⁵ Kuyyaata a oppa tukkanose a Waaqa daapammooyye, urratta ka tukkanase qara uwwishe; ka shishshipe paayyatte haka parinitto kara'e, pahana apittatin tukkanose qara akkaanni.

¹⁶ Ka awta piisa asseew koddini; kuyyaateeyye urratta ka tukkanase qara uwwinni, halkeetteeyye wa apitta paha ka qara akkaanni.

¹⁷ Oto urrattase tukkanase qareela opeela xa'ooyye, samayta Isira'eeli anta'e xaani, ka pora oppa urrattase lekkado oppa' safarri.

¹⁸ Samayta Isira'eeli ajaja Yaahiwwenne anta' xaani ka ajaja Yaahiwwen safarri ka haka urrattase tukkana qara caanno'e, safara kara' tawni.

¹⁹ Kadi punu urratta tukkanase a Yaahiwwe qara kuyyawwa lekaya jarraayye, samayta Isira'eeli ajaja Yaahiwwe tooytanni diisheey anta' xaani in co.

²⁰ Awta deemooyye urrattase kuyyawwa lamaya tukkanase a Yaahiwwe qara caani; samayta Isira'eeli ka ajaja Yaahiwwenne, safaroppa jarri ka ajaja Yaahiwwen anta' xaani.

²¹ Awta deemooyye urrattase shishshipe paayyatte haka parinitto'ew jarri; oto urrattase teykante opeela xa'oyye ikka anta xaani; oton urrattase kuyyaate isho halkeette eyye'ew jarri ka xa'ayyeew, ishootta anta'e xaaniiw.

²² Urrattase kadi punu tukkana qara'e kuyyaata takka taaki leya takka taaki para takka jarra ka eyye' tawnaayye, samayta Isira'eeli safara kara'e tawni diisheey anta' xaani in co; ma oton urrattase opeela xa'ayye ishootta anta'e xaani.

²³ Ishootta ajaja Yaahiwwenne safarri, ka ajaja Yaahiwwen anta' xaani, ika ajaja Yaahiwwe a Muuse qudan daasame tooytaanni.