Mataafa Dikoota 8 - Mataafa Qulqulloota

Akka ipsada xaaynaan

¹ Yaahiwwe ka Muuse kide,

² “Arooni haasawado ka ishi kide, oto ipsada xaxxaaynittooyye ipsaddosen tappa akka poroose a qara xaayammaan fuuledesa la'ayane kode.”

³ Arooni ka akkimoose qara kode; ka akka Yaahiwwe Muuse ajaje qara'e akka ipsasene pora qara ipsa xaaynaan qara caadan ka fuuledesa la'ayane kode.

⁴ Poroose qara ipsa xaaynaan nefo, kamantaadi paayyatte haka pahanaadi a pisati'i warqeetoppa tumen; pahanaadi nefo akka Yaahiwwe Muuse akkishe qara'e tumamen.

Taanteta a Lawaata a jaqqaysuma ka a xawwi reexxama

⁵ Yaahiwwe ka Muuse kide,

⁶ “Samayta Isira'eeli oppaayye Lawaata qeede ka ishootta jaqqe.

⁷ Ishootta jaqqa'e pishasene a jaqqaysuma ishootta qara' fide; ikka nyirfa a dakintaaysho quda ca piisa kooshaden ka mehaddaasso piisa diipaden ka isi jaqqen.

⁸ Sekkammaayye ishootta a horeetoppa xorma takka ka kalisoota untati daamma paxaara a sayteetan lahame teyyaden; atti'iw kalisoota a haseenta juppootati'i horeetoppa xorma takka teyyadow;

⁹ ka tukkanase xayyo turopa Lawaata dehaayshe ka samayta Isira'eeli piisa xora' xaashe.

¹⁰ Oto fuuliyyo a Yaahiwwe turopa Lawaata dehassooyye, samayta Isira'eeli a ishootta qara harkaaysho qapado;

¹¹ akka Lawaata fuula Yaahiwwe tura koda kooto'e, Arooni ka akka kalisootase samayta Isira'eeli qara pohonaan ka lellehinnaan mina'e ishootta dehaaysho.

¹² Kammadesaaw Lawaata a xormadasene qara harkaasso qapatto ka akka juppootaaysho ishootta hasso'e, atti xorma takka qeede ka kalisoota juppootati kode; ka takka qeede ka kalisoota a kupannitto kode ka Yaahiwwe kalshe.

¹³ Atti'iw Arooni isho hellaadi a diira turopa Lawaata dehaayshe ka akka kalisoota lellehinnaan mina'e, Yaahiwwe turopa ishootta dehaayshe.

¹⁴ Atti saanta asse pahatonne xawwi ishootta ana' reexxita; Lawaata ka xayyo koddita.

¹⁵ Oto atti ishootta jaqqitooyye ka kalisoose lellehinnaan mina ishootta dehassooyye, sekkamma oori Lawaata tukkaniyyo a Yaahiwwe kelopa koda koda deeta.

¹⁶ Maana malla Lawaata pakka qaramma a diira a Isira'eeli oppa'e isi piisan ana' daasamte, anti ka ishootta teyyadeey.

¹⁷ Samayta Isira'eeli oppaayye nama koddite horeeta koddite wa diira taaki xorma kode ka dalade piisa xayyoow; kuyyaatase an oppaayye piita Kipsi kara diira qaaramma kodde piisa leysheeyye, awwsen ishootta xawwi issi reexade.

¹⁸ Ka samayta Isira'eeli oppaayye pakka diira paayyota dalanna piisa oppa'e, Lawaata teyyadeey.

¹⁹ Akka tukkanase xayyo kela samayta Isira'eeliti koda kodan ka oto samayta Isira'eeli tukkanase xayyo qulqullaawe kapopa dehaannooyye akka erkannaata ishootta qara'en kaynini'i, akka juppootaaysho ishootta hasso kodane'e, anti samayta Isira'eeli oppaayyen Lawaata daassata' kode ka Arooni isho hellaadi a diiraati' daashe.

²⁰ Muuse ka Arooni isho samayta Isira'eeli piisa ka akka Yaahiwwe qoota Lawaatati desa Muuse ajaje qara'e, Lawaata jaqqen.

²¹ Lawaata ka juppootoppaayye isi jaqqite ka mehaddaasso diipatte; Arooni ka akka kalisoota a lellehinnaane mina'e, fuula Yaahiwwe turopa ishootta dehaayshe, ka akka jaqqamane'e juppootaaysho ka ishootta' hasso kode.

²² Qoota Lawaatati desa akka Yaahiwwe Muuse ajaje qara'e, samayta ka we piisa ishootta' kode; sekkammaayye Lawaata ka saaruma Arooni isho a hellaadi a diira kela koda koda'e, tukkana Waaqa kelopa ante.

²³ Yaahiwwe ka Muuse kide,

²⁴ “Taanteta a Lewaata mina tooynitto sede: hellaa a diira a para kunda lakki keni kaye ka qaropeela ca, a tukkaniyyo a Waaqa kelopa koda koda de'en;

²⁵ a para kunda keni kaye'ew, a tukkaniyyo a Waaqa kela koda koda qaatishen; umma kammopa koda in koonin.

²⁶ Ma xoori hellaasene xaaysho a Lewaata tukkana Waaqa kela koda koona'e qaarqaaran diisheey, ishootta mattaayshoti koda in koddan; oto koda ishootta kitnittooyye, taanteseetinni ishootta kodacciise.”