Mataafa Dikoota 5 - Mataafa Qulqulloota

Samayta nyale

¹ Yaahiwwe ka Muuse kide,

² “Nama a deesa dakinta quda a tuullino qapo taaki a dakintaadi kara wa urqina deenaan taaki a pukka quda qappatta minan nyale, akka alle issippa sookissane'e samayta Isira'eeli ajaje.

³ Diirta koddite iskatta koddite alle issippaayye sooksha; akka safara an anti oppa kalo in nyalinnini'i, alle issippaayye sooksha.”

⁴ Samayta Isira'eeli ka akka Yaahiwwe Muuse' haasawade qara kode; ka safaroppaayye alle ishootta sookshe.

Murayta a ishin dapayta

⁵ Yaahiwwe ka Muuse kide,

⁶ Samayta Isira'eeliti haasawado ka ishootta kide, “Diirta takka taaki iskatteeta takka oton nama'e ishin dapta ka juppoota kootaayye ka Yaahiwwe amanama diissaayye, namoose ishin dapampayta.

⁷ Juppoose' xaadi a kode a lelado ka dapaadi a kode kapa'e, kasaara immakkoota xaffalo ka qara harka kenippa takka padaawo ka namase a ishi ishin dape' daasho.

⁸ Ma xoori namoose a miiddota isha qara' kayte oton daltayta a pakkaadippa kasaarosen teyyado in qapniniiyyi, kasaarosen oori Yaahiwwe teyyadaay namoose ishin dape a kasaarosen quda'e, laahase haseenta juppootati kalinnaan qapo ka qeesitta' daasho.

⁹ Daassawwosen qulqullaawe a samayta Isira'eeli ishin deena, qeesitta a ishootta qaraayye qeenno teyyada.

¹⁰ Daassase qulqullaawte a nama ishin deeno a mattaadi; a namoose daannooti ma oton qeesitta'e daashaayye oori a qeesitta.”

Iskatta a diirraasso ishootta amanni in kinnini

¹¹ Yaahiwwe ka Muuse kide,

¹² Samayta Isira'eeliti kide, oton iskatteeta nama takkati'i qindan desa anni ka ishi amanammi in kinniniiyyi,

¹³ oton a diirtaadi in upnin maliiyyi diirta pila isheetta olli mukniiyyi, ikka a nyallittooyye in akkaanniniiyyi ka maakkitta in qapniniiyyi ka a almalummitto in qapamminiiyyi,

¹⁴ iskatteeta diirta takkati oto nyalto taaki a in nyallin mali hapura yoota ka diirtaadi qara de'o ikka isheetta yoonooyye,

¹⁵ namoose a iskatteese xaadi qeesitta kapopan aano ka qoota iskatteese xaaditi desa kalisoota parpaacciisnitto daamma poorta kiilota takka kalsho; kalisoose qoota kalisoota unta a yoota dehaanitto koddite malla ka dapa a kodde laka sookinnitto malla, namoose kalisoose qara sayteeta in tuqnin umma qara tankarta in xaaynin.

¹⁶ Qeesitta ka iskatteese iskapopa dehaaysho ka fuula Yaahiwwe tura isheetta qaatisho.

¹⁷ Qeesitta a meeha piitoppa kodame kara' pisha a qulqullaawe muuddo ka tukkanase a Yaahiwwe kela piiteeyye kuyyaalayta shakkayta qeedo ka pishasene oppa' tuqo.

¹⁸ Qeesitta a iskatteese fuula Yaahiwwe tura qaatisho ka matta qara ishi shaasheta furo ka harkoppa ishi kalisootase a unta yoota malla dehaatte ka dapa laka sookinnitto xaayo; ka isha harkoppa'e, pishaasene haddaawna jiija qeenna qapado.

¹⁹ Kammadesa qeesitta a iskatteese xaxacciiso ka kido, Oton a diirtaayti kela kittooyye diirta pila ke olli in mukniniiyyi atti ka a nyalliniiyyi, pishoosen haddaawna jiija qeenna ke qara we takkan nefo in koonin.

²⁰ Ma xoori oton a diirtaayti kela kittooyye saanta qara maqqiteeyye, diirtaayti mali diirta pila ka ke olli mukeeyye akka isi nyalisseeyye,

²¹ qeesitta a xaxa jiija iskatteese xaxacciiso ka ishi kido, oto Yaahiwwe ke kara inna sookinno ka dakintaayti qappajinnooye a Yaahiwwe samaytaaytippa jiijoosen isho xaxoosen ke qara qeedo.

²² Pishoosen jiija qeenna, a karittaayti karopa aanen ka karittaayti qappaajshen ka inna ke kara sookshen; iskatteese ka oorisso ka kiito, Ameen! Ameen!

²³ Kammadesa qeesitta a jiijoosen shamma qara' taafo ka meeha a kara pisha haddaawna caan karopa qaraayye jaqo.

²⁴ Qeesitta akka iskatteese pishasene haddaawna jiija qeenna ikto a kodo; pishaasene jiija qeenna ka isheetta karopa aanen ka kara surumta a kutta qeeden.

²⁵ Qeesitta a harka iskatteeseti oppa kalisoose a unta yoota malla daashen qeedo ka fuula Yaahiwwe tura lelleehsho ka pora kalisoota qara dehaaysho.

²⁶ Kamma desaaw akka matte ishin oorsatamto'e, qeesitta a kalisoose a unta quda harka kara qeedo ka pora kalisoota qara kupo; ka sekkammaayye iskatteeseti pishaasene ikkisho.

²⁷ Oto qeesitta iskatteetaseti pishaasene ikkishooyye, iskatteese oton i'isi nyalisseeyye ka diirtaadi amanama diisseeyye, pishaasene jiija qeenna isheetta karopa aanan ka surumta a kutta isheetta kara' qeedan; karittaadi ka kofkofa inna ka kara sookan isheetta ka samaytaadippa a jiijamte koddita.

²⁸ Ma xoori iskatteese oto issi in nyalinnin ka nyala in qapniniiyi, we takkan nefo isheetta qara in kayan; ka hellaa nefo xaayta.

²⁹ Qoota yootati desa tooy seeraadi sede; iskatteeta a diirta qapto takka oto diirta pila kelopa anto ka issi nyalissooyye

³⁰ taaki diirta takka qoota iskatteetaadi amanni in kinnin malla hapura yoota ka isha kara xa'ooyye ikka isheetta hibbannooyye a fuula Yaahiwwe tura isheetta qaatisho ka qeesitta ka seeroose piisa ishetta qara kodo.

³¹ Diirtoose rakkoota a dapoose minan deenitto isha qara in kayto; ma xoori iskatteese, rakkoota a dapa koote minan isheetta qara kaynitto piisa isheetta qara kaya.”