Mataafa Dikoota 4 - Mataafa Qulqulloota

Koda Qa'ateta kooto

¹ Yaahiwwe ka Muuse isho Arooni kide,

² “Lawaata oppaayye kaffaasso ka toollaassotin sanynyeeta Qa'ati dike.

³ Ka a tukkaniyyo kelopa koda' deena ettansha a parraasso kunda sessaayye paayyatte haka kunda keniti ca dike.

⁴ Koda sanynyeeta Qa'ati nefo tukkaniyyo kela mehadda akata qulqullaawe qara tooyeta.

⁵ Oto samayta poraadi a oppa safareppaayye xaanooyye, Arooni isho hellaadi a diira tukkanase a Yaahiwweti otanta karopa kullan ka kaarantase tura koden alle' furan ka taapotase a maakkumatin maran;

⁶ ka kollatta a pahasame qara dekaneew ka ohaata immakkootan moonta pahato qara afan; ka ishin haada'e karopa molookadda kalshan.

⁷ Ka tarabbeesa a kalisoota laaqqota qara ohaata a moonta pahato afen; ka qara'e, saahinna ka jilfada ka tiwwada ka moqorqoraddasene a kalisoota ikkayta qara' xaayan; umma kalisootase a laaqqota kuyyaata mina kalinnaan qara in dapannin.

⁸ Ka ohaata a tiima qara uwwishan ka kollatta qolpayta a pahasamen qara dekan; ka porraasso karopa molookadda kalshan.

⁹ Ka ohaata a tiima qeedeneew ka meehase qara ipsa xaaynaan qara afen ka ipsada ka meehaaysho a taraan sahanaan ka paallawwaasso a taraan haaddinaane isho meehaaysho a kara sayteeta oorinnaan piisa qaran deken.

¹⁰ Ka meehase qara ipsa xaaynaan isho meeha a quda co piisa, oyleeta a kollaya qolpaya oppa kodameetin qara uwwishen ka molookase ishin haanaan qara' xaayen.

¹¹ Ka ohaata moonta pahato porase a kalisoota a warqeeta qaran deken ka qara oyleetase a kollaya qolpaya oppa kodamte qara uwwishen; ka poraadi karopa molookadda kalshen.

¹² Ka tukkanase qulqullaawe kelaayye mehaddasene kodaan koonaan piisa qeedeneew ka ohaata moonta pahato qara' xaayen ka oyleetase kollaya qolpaya oppa kodamten qara deken ka molookase ishin haanaan qara' xaayen.

¹³ Ka porase a kalisoota qara alle tara sahen ka qara ohaata awla uwwishen.

¹⁴ Ka mehaddasene porase a kalisoota qara kodaan koonaane, meeha a apittan opannaan ka qaptoowwa ka meeha a taran sahnaan isho saahinnaasso a qorewwa pappaha qara' xaayen; ka kollattase a qolpa pahasame qaran deken ka poraadi karopa molookadda kalshen.

¹⁵ Oto Arooni isho hellaadi a diira tukkanase qulqullaawe isho mehaddaadi piisa quda dekeeta dikkishan kammaayye, saara ka xaanooyye, Qa'ateta a mehaddoosen haadeta sookto; ma xoori akka in leenini'i, mehaddoosen quda kaya ishootta parpaaccisni in kitto; mehaddoosen a tukkana Waaqa a Qa'ateta haadeta parpaaccisnitta tooy sene.

¹⁶ Ali'asaari innasene a Arooni a qeesitta, sayteeta a ipsa koddinitto ka tankartase alaawnitto ka kalisoota unta a kuyyaata mina kallitto isho sayteeta a daatammitto qara saaruma qapnaada; ka tukkanase a Waaqa ka porase qulullaawe isho mehadda a kara ca piisa qara tooya.”

¹⁷ Yaahiwwe ka Muuse isho Arooni kide,

¹⁸ “Lawaata oppaayye kafa Qa'ateta akka in pirammin ka in pannini tooyta.

¹⁹ Oto mehaddasene qulqullaawe kapopa dehaannaaneeyye akka caadan ka in leenini'i, ishina asse ishootta koda: Arooni isho hellaadi a tikase qulqullaawte karopa kullen ka matta mina wa koda ishootta faanitta ishootta' qooten; ka wa haadeta ishootta faanitta ishootta upnayshen.

²⁰ Ma xoori Qa'ateta akka in leenini'i, tukkana kelopa kulleeta ka wa qulqullaawe ildaan nefo tooyyatta ishootta faani in kitto.”

Koda kafa Kershooni

²¹ Yaahiwwe ka Muuse kide,

²² “Kaffa isho toollaassotin sanynyeeta Kershooni dike;

²³ diira a para kunda sessa paayyatte a haka para kunda keniti ca ka tukkanase a Waaqa kelopa deena ka koda koda kaye piisa dike;

²⁴ Kershooneta koda kooto ka haadeta haato tooy sede;

²⁵ ishootta kaaranta a tukkana Waaqa a tula qara' qate ka a xati kela' qate haadan; ka oyleetase kollatta qolpa oppa kodamte qaran dekan; ka kaarrantase a tukkana kodeeta Waaqa qaran dekan; ka kaarrantase xarra tukkana Waaqa qaran deken haadan.

²⁶ Ka kaarantaddasene a oxinta paahapaha ka tukkana Waaqa isho porase a kalisoota kapa tiitaysheti ka kaarrantadda a xarra paapaha isho watarowwaasso ka mehadda pila a kodooseti kodame piisa haadan.

²⁷ Koda a Kershooneta koonitto ka wa haanitta isho wa koonitta piisa'e, Arooni isho hellaadi a diira qara ajaja teyyatta; attikka wa ishootta haadane piisa ishootta kittita.

²⁸ Koda a kafa Kershooni tukkana Waaqa kela kodo tooy sede; Itamaari inna Arooni a qeesitta ka kodaaysho piisa qara tooya.

Koda a kafa Meraari

²⁹ A kafa Meraariiw, kaffaasso ka toollaassotin ishootta dike.

³⁰ ka a tukkanase a Waaqa kelopa deena ka koda koda ettansha a parraasso kunda sessa paayyatte a haka para kunda keniti ca piisa taafe.

³¹ Tukkanase a Waaqa kelaayye kodaaysho a ishi kitamen ka kodan piisa tooy sede: ishootta saanqada a xarra ka teehowwaasso ka tuudda isho kiriyyaasso

³² ka tuudda a oxinta paapaha ka kiriyyaasso ka shikaalla tukkana ka watarowwaasso isho mehadda a kodooseti parpaacciisna piisa haadan.

³³ Saaruma a Itamaari a inna Arooni a qeesittatinni koda a kafa sanynyeeta Meraari tukkana Waaqa kela kooto tooy sede.”

Lekuma a kafa Lawaata

³⁴ Muuse ka Arooni isho saarra samayta, sanynyeeta Qa'ati kaffaasso isho toollaassotin diken.

³⁵ Ka para kunda sessaayye paayyatte haka para kunda keniti'i, nama a tukkana Waaqa kela koda koda deeno piisa diken.

³⁶ A kaffaassotin dikame kan nama kuma lakki ka dippa tappa ka kunda keni kayni.

³⁷ Akka Yaahiwwe Muuse ajaje qara'e, kaffasene a Qa'ati tukkana Waaqa kela koda kode a Muuse isho Arooni dikene tooy sene.

³⁸ Sanynyeeta Kershooni a kaffaasso ka toollaassotin dikamte,

³⁹ a tukkana Waaqa kela koda koda kaye a parraasso kunda sessaayye paayyatte haka para kunda keniti ca,

⁴⁰ nama kuma lakki ka dippa lehi ka kunda sessa kayni.

⁴¹ akka Yaahiwwe Muuse ajaja qara'e, kaffasene a sanynyeeta Kershooni a tukkana Waaqa kela koda kode a Muuse isho Arooni dikene tooy sene.

⁴² Kaffa a sanynyeeta Meraari a kaffaasso ka toollaassotin dikame,

⁴³ diira a tukkanase a Waaqa kela koda koda ettanshe a parraasso kunda sessa paayyatte haka kunda keniti ca,

⁴⁴ a kaffaan dikame nama kuma sessa ka dippa lakki kayni.

⁴⁵ Akka ajaja Yaahiwwe a Muuse qudan lelame qara'e kaffasene a sanynyeeta Meraari a Muuse isho Arooni dikene tooy sene.

⁴⁶ Lawaatase a Muuse ka Arooni isho saarra Isira'eeli kaffaasso ka toollaassotin dikene

⁴⁷ a tukkana Waaqa kela koda kodeeta ka tukkana haadeeta de'e a parraasso kunda sessa paayyatte haka para kunda keniti ca piisa tooy sene.

⁴⁸ A dikootaysho, nama kuma sette ka dippa keni ka kunda sette kayni.

⁴⁹ Ajaja a Yaahiwwe Muuse qudan daashe qara'e ishootta ka matta mina'e koda kodan isho haadeta haadan ka ishootta kitamte. Ishootta ka matta mina'e akka Yaahiwwe Muuse ajaje qara dikamen.