Mataafa Dikoota 3 - Mataafa Qulqulloota

Hellaa Arooni a diira

¹ Eta Yaahiwwe irroota Siina qara Muuse olli haasawadeeyye, sene sanynyeeta a Arooni isho a Muuse.

² Maxxada a hellaa Arooni a diira sene: Nataapi qarta, Apihu, kussitta, a kamma qate'ew Ali'asaari ka Itamaari.

³ Arooni ka akka qeesewwa koddane'e, xawwi ishootta reexe ka daate.

⁴ Ma xoori Nataapi isho Apihu, ete koommayta Siina oppaayye fuula Yaahiwwe tura'e apitta a dawrame opaysheneeyye, fuula Yaahiwwe tura'e le'en; umma hella in qapan. Semmalla a aappaaysho Arooni cooyye Ali'asaari isho Itamaari patta koda qeesuma kode.

Koda Lawaata

⁵ Yaahiwwe ka Muuse haasawade ka kide,

⁶ “Kafa Lewin xooye ka akka qeesittase Arooni kela koda kodane'e isha tura ishootta qaatishe.

⁷ Oto tukkanase xayyo tura koda koonaneeyye, tukkanose a kodeetiyyo turaayye Arooni isho samayta piisa'e wa parpaaccisna kodan.

⁸ Ishootta mehadda tukkaniyyo piisa tooytan; ka oto tukkanose a kodeetiyyo kela koda koonaneeyye, samaytiyyo a Isira'eeliti'i wa parpaaccisna kodan.

⁹ Atti Lawaata qeede ka Arooni isho hellaadi' daashe; ishootta ka samayta Isira'eeli oppa a Arooni xawwi reexxame koddan.

¹⁰ Akka kodaaysho a qeesuma kodane'e, Arooni isho hellaadi shuume; oton nama pila'e kodoose xaaysho koda dehaanniiyyi, a alle ishshamo.”

¹¹ Yaahiwwe ka Muuse kide,

¹² “Tin, anti samayta Isira'eeli piisa oppaayyen pakka qaramma dalanna oppa'e Lawaata teyyade; semmalla Lawaata xayyo koddita.

¹³ Maana malla, qaramma piisa xayyooy, kuyyaatan piita Kipsi kara qaramma piisa leysheeyye, anti qaramma a nama ka a horeeta kodde piisan Isira'eeli kara xawwi reexade; ishootta xayyo koddan anti an Yaahiwweey.”

Akka Lawaata dikamte

¹⁴ Yaahiwwe ka koommayta Siina oppa Muuse kide,

¹⁵ “Lewaatoppa hellaa a diira a leya takka pire ka qaropeela ca piisa toollaasso ka kaffaassotin dike.”

¹⁶ Muuse ka akka ajajame qara'e qaaleta Yaahiwwe qara ishootta dike.

¹⁷ Maxxada a hellaa diira a Lewi nefo, Kershooni ka Qe'ati isho Meraari kidammi.

¹⁸ Maxxada hellaa diira a Kershooni kaffaassotinni, Lipini isho Shimi'i kidammi

¹⁹ Maxxada hellaa a diira a Qa'ati kaffaassotinni, Amiraami ka Yisihaari ka Keprooni isho Usi'eli kidammi.

²⁰ Maxxada hellaa a diira a Meraari kaffaassotinni, Mahiliina isho Muushi kidammi. Oto toollaan diknaaneeyye, kaffa Lawaata tooy sene.

²¹ Toola a Lipiina isho a Shiimi'i ishootta olloppa kafa Kershooni karopaaw dikamen ; sene tooy ishoottan kafa Kershooni.

²² Ishoottoppa hellaa a diira a leyaa takka pire ka qaropeela ca a dikame kuma tappa ka dippa keni.

²³ Kaffa a Kershooneta tukkanase a kodeeta Yaahiwwe kammanne qinda dumaatetatinni safaran.

²⁴ Asaara toolla Kershooneta koddino, Eliyasaafi inna La'eli.

²⁵ Hellaa Kershooni a diira kodaaysho, tukkana a kodeeta Yaahiwwe ka kaarantaddaadi tukkana qaran deknaan a qaran co ka a karan co isho kaarantase a xarraadi turan deknaan tooyteeta.

²⁶ Ka kaarantadda a paapaha a tukkana isho a pora kalisoota kapa tiitayshe ka kaarantase a xarra oxinta tura a ishin paapahoppopa kullinaan isho watarowwosen a kaarantoseti tooyteta.

²⁷ Toola Amiraami ka a Yisihaari ka a Keprooni isho a Usi'eli, ishootta olloppa kafa Qe'ati oppopaaw dikammi.

²⁸ Hellaa diira a leyaa takka pire ka qaropeela ca a ishoottoppa dikame, nama kuma sette ka dippa lehi kayni. Qe'ateta ka tukkana qulqullaawe tooytini.

²⁹ Toolla kafa Qe'ati tukkaneeyye qinda tupattatinni safarri.

³⁰ Kafa Qe'ati karaayye a saara toolla koddino, Elisafaani inna Usi'eeli.

³¹ Koda a Qe'ateta nefo, taapota ka tarabbeesa ka meeha a qara ipsa xaaynaan ka pora kalisoota ka mehadda a qeesewwa, tukkana Waaqa kela kodaan koonaan ka kaarantadda tukkana otantoppa co isho mehaddasene quda ca piisa qara tooyeta.

³² A saarra Lawaata piisa qara saarummo ka a tukkana qulqullaawe tooytina qara tooyno, qeesittase Ali'asaari inna Arooni.

³³ Toolla Amahiili isho a Muushi, ishootta olloppa kaffa Meraari karopaaw dikamen; sene tooy ishoottan kafa Meraari.

³⁴ Hellaa diira a leya takka pire ka qaropeela ca a ishoottoppa dikame kuma lehi ka dippa lakki kayni.

³⁵ Kafa Meraari karaayye a saara toolla koddino, Suri'eli inna Api'eli ; ishootta tukkanase a kodeeta Waaqatiiyyi qinda qutattatinni safaran.

³⁶ Koda a Meraareta nefo, tukkana kodeeta Waaqa karaayye qapaya tukkana ka xarnaadi ka qapayaadi a otanta ka kiriyyaadi ka koda mina tooyno ka meeha quda co qara tooyeeta.

³⁷ Ka asseew qora a oxinta paapaha ka kiriyyaasso ka shikaalla isho watarowwaasso qara tooyeta.

³⁸ Muuse ka Arooni isho hellaa Arooni tukkanase a kodeeta Waaqatiiyyi qinda piirtotatinni fuule desa safaran. Ishootta pakka samayta Isira'eeli oppa'e kaatasene qulqullaawe qara tooyan. Ma xoori nama pila a tukkana Waaqa kapopa dehaanno a ishshamo.

³⁹ Hellaa a diira a leya takka pire ka qaropeela ca isasene a Muuse isho Arooni akka ajaja Waaqa qara Lewaatoppa kaffa kaffaan dikene, kuma kunda lakki lakki kayni.

⁴⁰ Yaahiwwe ka Muuse kide, “Samayta Isira'eeli oppaayye hellaa diira a qaramma kodde a leya takka pire ka qaropeela ca piisa dike; ka meeqa akkima kaynaan qapado;

⁴¹ ka samayse a Isira'eeli oppaayye pakka hellaa a diira a qaramma kodde oppa'e Lawaata ana' qeede; ka pakka a horeeta Isira'eeli a paayyota dalatte oppa'e, horeeta Lawaata ana qeede. Anti an Yaahiwweey.”

⁴² Muuse ka akka Waaqa isha ajaje qara'e samayta Isira'eeli oppaayye hellaa diira a qaramma kodde piisa dike.”

⁴³ Hellaa diira a qaramma kodde a leyaa takka pire ka qaropeela ca a dikame ka kuma kunda lakki lakki ka dippa lakki kunda tappa sessa kayen.

⁴⁴ Yaahiwwe ka Muuse kide,

⁴⁵ “Samayta Isira'eeli oppaayye pakka hellaa diira a qaramma kodde oppa'e Lawaata qeede ka pakka horeeta Isira'eeleta oppa'e horeeta Lawaata qeede; Lawaata xayyo koddita! Anti an Yaahiwweey.

⁴⁶ Hellaa diira a qaramma kodde a Isira'eeli kara dikame qoota Lewaatoppa dikame qaropa dippa lakki kunda tappa sessaan qapan malla, sene kaajaan furatta ke faani.

⁴⁷ Hiila tukkana qulqullaawetinni matta nama mina'e sheqileeta dakara pirreeta keni keni qeede.

⁴⁸ Ka oto hellaa a diira a Isira'eeleta ishin a Lawaata qara qapta furattooyye kaajosen Arooni isho hellaadi' daashe.”

⁴⁹ Muuse ka hellasene a Isira'eeleta a Lawaata furatte qara qapa nama dippa lakki ka kunda tappa sessa qara kaajasene ishin furatta pohame qeede.

⁵⁰ Ka samayta Isira'eeli oppaayye hellaa a diira a qaramma kodde qaraayye sheqileetanne dakara pirreeta kuma ka dippa sessa kunda lehi keni qeede.

⁵¹ Muuse ka akka Yaahiwwe isha ajaje qara'e, kaajasene a furatta Arooni isho hellaadi a diiraati daashe.