Mataafa Dikoota 1 - Mataafa Qulqulloota

Akkima Isira'eeli kara diira a parraasso kunda lakki kaye ka qaropeela ca dikamen

¹ A Isira'eeleta Kipsi kara sookteeyye para lammattati ka leya lammatta oppa kuyyaata paayyotati, a koommayta Siina oppa caaneeyye, Yaahiwwe tukkanaadi kela'e Muuse olli haasawade ka ishi kide,

² “Samayta Isira'eeli piisa oppaayye akka kaffaasso ka toollaasso caanenne nama a diirta kodde takka takka dike.

³ Ke isho Arooni samayta Isira'eeli piisa oppaayye diira a paraaysho kunda lakki kaye ka qaropeela co a oranna' tuula kaye, xela xelan ollopa taafa;

⁴ kaffa pisa oppaayye nama aappa tika kodde takka takka a ishin quda caado ka ishin qaarqaaro.

⁵ Maxxada a orra ishin qaarqaaro nefo sene: Kafa Roopeeli oppaayye, Elissuuri inna Shede'uri;

⁶ Kafa Simooni oppaayye, Shelumi'eli inna Surishadaayi;

⁷ kafa Yihuta oppaayye, Na'asooni inna Aminataapi;

⁸ kafa Yisakoorippaayye, Naatina'eeli inna Su'ari;

⁹ kafa Saaploonippaayye, Eli'api inna Helooni;

¹⁰ hellaa Yoosefippa, kafa Efreemippaayye Elishama'i inna Amihuuti, ka kafa Minaaseppaayye, Kemaali'eli inna Petassuuri;

¹¹ kafa Piniyaamippaayye, Apidaani inna Kidi'oni;

¹² ka kafa Taanippaayye, Ahi'eseeri inna Amishataayi;

¹³ kafa Aseerippaayye, Faki'i'eli inna Okiraani;

¹⁴ kafa Kaatippaayye, Eliyasaafi inna Te'u'eli;

¹⁵ kafa Niftaalemippaayyeew Ahira'i inna Enaani.”

¹⁶ Samayta Isira'eeli oppaayye mattiyya toolla a kaffa Isira'eeli oppa reexame tooy sene.

¹⁷ Muuse isho Arooni ka sene a maxxadaasso halaamene isi quda qeeden;

¹⁸ ka leya lammatta oppa kuyyaata paayyotati samayta piisa ollopa xora xaashen, samaytase ka kaffaasso ka toollaassotin ollopa taafame; a para kunda lakki kaye ka a qaropeela ca, akka maxxadaasso dikamen ka matta mattan ollopa taafamen.

¹⁹ Muuse ka akka Waaqa turan isha ajaje qara'e koommayta Siina oppa' ishootta dike.

²⁰ Sanynyeeta Roopeeli a qaarta Yayqoopi oppaayye diira a oranna tuula kaye, a parraasso kunda lakki ka qaropeela caane piisa ka kaffaasso ka toollaassotin akka dikoota maxxadaasso qara'e matta mattan ollopa taafamen.

²¹ A kafa Roopelippa dikame kan kuma kunda afuri lehi ka dippa keni.

²² Sanynyeeta Simoonippaayye hellaa diira a oranna tuula kaye, a parraasso kunda lakki kayene ka qaropeela ca piisa ka akka maxxadaasso dikamenenne, kaffaasso ka toollaassotinni matta mattan taafamen.

²³ A kafa Simoonippa taafame kan nama kuma kunda keni sakali ka dippa sessa.

²⁴ Sanynyeeta Kaatippaayye hellaa diira a oranna tuula kaye a parraasso kunda lakki kayene ka qaropeela caane piisa ka kaffaasso ka toollaassotin akka dikoota maxxadaasso qara'e matta mattan taafameneew;

²⁵ a kafa Kaatippa taafame kan nama kuma kunda afuri keni ka dippa lehi ka kunda keni.

²⁶ Sanynyeeta Yihuta oppaayye hellaa diira a oranna tuula kaye a parraasso kunda lakki kayene ka qaropeela caane piisa ka kaffaasso ka toollaassotin akka dikoota maxxadaasso qara'e matta mattan taafamen;

²⁷ a kafa Yihuta oppaayye taafame kan nama kuma kunda tappa afuri ka dippa lehi.

²⁸ Sanynyeeta Yisakoorippaayye hellaa diira a oranna tuula kaye a parraasso kunda lakki kayene ka qaropeela caane piisa ka kaffaasso ka toollaassotin akka dikoota maxxadaassoti qara'e matta mattan taafamen;

²⁹ a kafa Yisakoorippa taafame kan nama kuma kunda keni afuri ka dippa afuri.

³⁰ Sanynyeeta Saapiloonippaayye hellaa diira a oranna tuula kaye aparraasso kunda lakki kayene ka qaropeela caane piisa ka kaffaasso ka toollaassotinni akka dikoota maxxadaasso qara'e matta mattan taafamen.

³¹ A kafa Saapiloonippa taafame kan nama kuma kunda keni tappa ka dippa afuri.

^32-34 Sanynyeeta Yoosefippa kafa Efreemippaayye hellaa diira a oranna tuula kaye a parraasso kunda lakki kayene ka qaropeela caane piisa ka kaffaasso ka toollaassotin akka dikoota maxxadaassoti qara'e matta mattan taafamen. A kafa a inna Yoosefi a Efreemippa a taafame kan nama kuma kunda afuri ka dippa keni.

³⁵ A kafa inna Yoosefi a Minaaseppa taafame kan nama kuma kunda sessa lakki ka dippa lakki.

³⁶ Sanynyeeta Piiniyaamippaayye hellaa diira a oranna tuula kaye a parraasso kunda lakki kayene ka qaropeela caane piisa ka kaffaasso ka toollaassotin akka dikoota maxxadaasso qara'e matta mattan taafamen.

³⁷ A kafa Piiniyaamippa taafame kan nama kuma kunda sessa keni ka dippa afuri.

³⁸ Sanynyeeta kafa Taanippaayye hellaa diira a oranna tuula kaye a parraasso kunda lakki kayene ka qaropeela caane piisa ka kaffaasso ka toollaassotin akka dikoota maxxadaasso qara'e matta mattan taafamen.

³⁹ A kafa Taanippaayye taafame kan nama kuma kunda lehi lakki ka dippa tappa.

⁴⁰ Sanynyeeta kafa Aseerippaayye hellaa diira a oranna tuula kaye a parraasso kunda lakki kaye ka qaropeela ca piisa ka kaffaasso ka toollaassotin akka dikoota maxxadaasso qara'e matta mattan taafamen.

⁴¹ A kafa Aseerippaayye taafame kan nama kuma kunda afuri takka ka dippa keni.

⁴² Sanynyeeta kafa Niftaalemippaayye hellaa diira a oranna tuula kaye a parraasso kunda lakki kayene ka qaropeela caane piisa ka kaffaasso ka toollaassotin akka dikoota maxxadaasso qara'e matta mattan taafamen.

⁴³ A kafa Niftaalemippa taafame kan nama kuma kunda keni sessa ka dippa afuri.

⁴⁴ Saarrasene kudanka lakki a Isira'eeli, orrase a Muuse isho Arooni diken tooy sene; saarroosen nefo toollaasso qaraayye ollopa sooken.

⁴⁵ Semmalla samayta Isira'eeli piisa oppaayye hellaa a diira a oranna tuula kaye a parraasso kunda lakki kayene ka qaropeela caane piisa ka toollaasso oppa ollopa taafamen.

⁴⁶ A ollopa taafame kan nama kuma dippa lehi sessa ka dippa keni kunda keni.

⁴⁷ Lawaata xoori kaffa a toollaassotitinni, ishoottoppa'en dikamme.

⁴⁸ Maana malla Waaqa iMuusi kide,

⁴⁹ “Kafa Lewi patta ishoottoppen dikan ka in taafan; ka samayta Isira'eeli oppa ishoottan dikan.

⁵⁰ Sekkapaayye tukkanase a kodayteetiyyo isho meehaadi ka wa a tukkanooseti kodde piisa qara Lawaata shuume; ishootta ka tukkanose isho meehaadi pora haaden; ishoottaaw ka tukkanose kapandesa safaren ka qara tooyen.

⁵¹ Oton tukkanoose'e pootammiiyyi; Lawaata poota; oton idaapammiiyyiw Lawaataaw daapa; oton nama pila'e tukkanose kapopa deeniiyyi, a alle ishshamo.

⁵² Samayta Isira'eeli a kita kitaan tukkannaasso daapado; nama ka safaraadippa akka paantiraadi kela tukkanaadi daapado.

⁵³ Ma xoori akka miiriyyo samayta Isira'eeli qara'en kaynini'i, Lawaata a tukkana kodayteetiyyo kapandesa safarto; ka tukkanose qara tooyto.”

⁵⁴ Samayta Isira'eeli ka sede qara kode; ka akka Waaqa turan Muuse ajaje qara'e we piisa kode.