Mataafa Dehaamta 9 - Mataafa Qulqulloota

¹ Semmalla sede piisa oppan dikade ka kide, “Hanqeellaya ka ookka orra isho wa ishootta' koonaane' piisa harka Waaqa oppaaw caan; ma xoori a punu jaalala taaki needduma koddito, nama wa isha asanna upo takka nefo in co.

² Hanqeellaya ka juppoolaya, orra wa paxaara' koono ka a neeqa' koono, orra qulqullaawe ka a nyale, orra kalisoota kalinno ka a kalinni in kinnini piisa piraampira qaraayye farootaaysho a ishootta qayto takkaaw; akkima nama paxaarumta koono' koddinitto mina'ew a neequmta koono' koddini ka akkima a maxanyumaan xaxannaati' koddinitto mina'ew a xaxa fuurraati' koddini.

³ Sede neequmtase nama piita qara kalo piisa qara' kaynitto; piraampira nama piisa takkaawweey; semaliiyyiiw, karitta nama neequmtanne immakaade; a tarra qara caan piisaayye, karittaaysho kara taarota ca ka piraampira qaraayye tooni.

⁴ Ma xoori, nama orra co oppaayye co piisa kippeeta qapa; karma to'e kapaayye, kuta co wayyiiy.

⁵ Orra co akkima le'o i'upa; orra le'e xoori, we takkan nefo in upo; wa qaran ishootta matte oorsannaane iteymammi umma tookta in qapan.

⁶ Jaalalaasso ka needdumaasso isho yootaaysho a pateneeyye iseki seki; umma wa piita qara' koddina oppaayye lammatta' qoottota in qapan.

⁷ Waaqa kodaayti a' xatta kooten ixasoodeey, aane ka damtaayti xasan dame ka taadetaayti a wayneeta karitta a fayyaatin ike.

⁸ Awta piisa mehadda ata' kalsado ka mattoppa' sayteeta ekerta' daatado.

⁹ Parroosen are a paata patta, a Waaqa piita qara ke' daashe' piisa oppaayye, iskatteetase' xaayti a' jaalannitto olli xasoodo ka kuyyawwosen are a paata patta' piisa oppaayye ka kallaataayti oppaayye isho yaalase' xaayti a' piita qara yaallitto oppaayye, qoyrittaayti a ke qa'e sedeey.

¹⁰ Koda harkaayti mina' kale piisa, hupnaayti a' qapton kokkonsado ka kode; maana malla, hawlase a' karopa annitto karaayye, koda ka dikatta, taaki upna ka ookuma in caaneey.

¹¹ Piita qaraayye, wa pila'en akkeew; a jarjartan hirra, putayma teyni in caan; umma xormewwa orannaappa punni in caan; ookka, damta teyni in caan umma ilattaya teyanta kodanni in caan umma upnampaya ulfeena teyni in caan; eta isho faroota xoori, ishootta piisa asanni.

¹² Semaliiyyiiw nama eta a xaamane oppa maana akkima isha qara' kayna upo in co; oto kuyyaataadi a neeqa' kaytooyye, murkuja akkima nyupuraappa' qapammo, xampirteeta ka ereera qara' qapammitto mina'e, a isqara in upnin mali, asseew eta neeqa orra qara' kayni, ikka oppa' qapammi.

Eepuma kapa ookuma wayyi

¹³ Anka piita qaraayye, wa ookuma kutta ana' pahanaade akkew.

¹⁴ Katama takkan shakka, a orra lamaytaaw oppa kala'e ca; nuqusa takka kokkoka ka ishootta torpa' tuule ka ishootta kapa mure ka kapa' kawwatta kutta' dawe.

¹⁵ Katamoosen karaayye, teekolayta takka a nama ooka kodde ca ka ookumaadin katamoosenen pahe; ma xoori nama takka nefo teekolayse matte in oorsanne.

¹⁶ Anka semmalla kide, “Hupna kapaayye ookuma jaalli” A koddito ma qoota namoose teekolayta koddeeti desa, ookumaadi ituffatame umma lelaadi nama in dakayne.

¹⁷ Ullupitta nama eeppa mukinno dakkaysatta kapaayye, afa a ooka lokkooti haasawanno dakkaysatta wayyi.

¹⁸ Meeha oranna kapaayye ookuma wayyi; juppolayta takka' xoori, wa paxaara lekaya nyapalinni.