Mataafa Dehaamta 8 - Mataafa Qulqulloota

¹ Ooka nama a we kara qora ettaninno, ayno isha mina' ca? Ookuma fuula nama'e la'anni ka fuulaadi a poornaade kuli purinni.

Nuqusa afa' dakaye

² “Nuqusa'en afa dakaya” kiite ka fuula Waaqa tura' xaxatteey, anti in ke' kiini, “Oori ajaja nuqusa' tooyte.”

³ Nuqusa wa jaalade piisa koda ettaninniiy, fuula nuqusa tura jarjartannen sookan umma nequmta kodeeta kamma in xa'an.

⁴ Lela nuqusa' piisa qara jaalliiy, ayno ishi' kida, “Maana'e sede kooni?”

⁵ Nama ajaja nuqusa' dakayno miiddota isha qara' kayni in kitto; ooka nama'ew, we piisa eta a xaamane oppa akkima kodama ishootta faanitto i'upa.

⁶ Kadi punu rakkoota nama qara a kata kooptaayye, we' piisa eta oppa kodammaan ka akka kodammaaneew qapan.

⁷ Nama wa itturopa kodda qoota in upnin malla, wa itturopa kodda ayno ishi' lela ettansha?

⁸ Nama xayxayta qara hupna qapo ka tura qapeeta ettaninno in co. Umma nama kuyyaataadi a toota qara hupna qapo in co; kuyyaata orannaati nama takka nefo akkima “An torpo” kida ettaninni in kinnin mina'e, a neequmta kodeeta kamma kamma'ew asseew neequmta kela pahani in kinnin.

Kallaata nama neeqa ka a paxaarati

⁹ Wa piita qarandesa koddina piisan mattoppa dikade ka kara tooye; nama takka eta a oppaayye orra pila miiddeta malla taanyuma qeenno ikitta.

¹⁰ Anka akkima juppoolayasene xatta pora qulqullaawe oppan anna ka kalla ka katamasene a kara asse koonaane kara ulfeenan hawlammaan akkeew. Sede nefo paata pattaaw.

¹¹ Qoota orra ishin dapayta kode qara'e firteeta daasamte eennoow opani dikkinni in kinnin malla, karitta orra wa neeqa dikattaanne immakaanni.

¹² Kadi punu juppoolaya dippan ishin dapayta koona, parraadi ka deraan nefooyye, a Waaqa tura fuurra ka isha ulfeessina, akkima a paxaara ishootta' koddito in upa.

¹³ Juppoolaya xoori' qoota Waaqa fuurri in kinnin malla, a paxaara ishootta'en koddito; paraaysho nefo a kaattilayta' mina'e tarpa diisheey in deraado.

¹⁴ Wa piita qaraayye koddina ka paata patta kodde a pila'e caaw; sede nefo, juppoolaya wa hanqeellaya' parpaaccisna'e akkanni; hanqeellaya ka wa juppoolaya' parpaaccisna akkanni; anti in kiini, “Sede nefo paata patta.”

¹⁵ Semmalla piita qaraayye nama'e, dameeta ka ikkeeta ka xasootta kulipaata a ishi' wayyitto qoota in kinnin malla, anti in kiini, “Caattoppa xasootta ipaxaari.” Nama, parra a Waaqa piita qaraayye ishi' daashe' piisa oppa'e kodaadin xasootta i'ettansha.

¹⁶ Eten ookuma upnaatta'e ka yaalase a nama isase a malla ildaadi halkeetta ka kuyyaata mukitta in qapninppa dikatta' xa'eyye,

¹⁷ wa Waaqa kode ikka piita qarandesa koddinaane' piisa akka nama takka nefo upnaatta in ettaninnin in akke; nama kadi punu a kuttati kara fadeeta ekkannaayye, maana akkima koddite upnaatta in ettansho; ooka nama kadi punu kiina, “In upaayye,” kara qoreeta ka desan kaya in ettansho.