Mataafa Dehaamta 7 - Mataafa Qulqulloota

Qoota caattaati desa dikatta

¹ Maxxa paxaara, shittoota paxaara' qara jaalli; kuyyaata toota ka kuyyaata a dalatta qara jaalli.

² Tika sankulta opa anta kapaayye, tika pooyta opa anta wayyi; toota nama piisa kapa kittaay, nama tarra qara co a sede matte qapnaado.

³ Xosalta kapaayye, nyarrahata wayyi; oton fuula nama'e nyarrahaayye, karitta nama ixasoonniiy.

⁴ Karitta ookka tika pooyta kara ca, karitta eeppa' xoori, tika xasa kara ca;

⁵ kirpa eeppa' dakkaysatta kapaayye, fuka ookka' dakayeeta wayyi.

⁶ Xosalta eeppa, kati qora pelelta'e okta kamma peqni. Sde nefo kan paata patta.

⁷ Karpa kodeeta ookka eeppa' kooni; nooddota ka qalpeeta nama' nyapalinni.

⁸ Paayyota a we takkane kapaayye, piraampiraaysho'e wayyi; nama a isi jeejjino kapaayyeew nama a duupanno wayyi.

⁹ Eeppa harkoppa miira qapaneey, atti' miira'en jarjaran.

¹⁰ In kaassadan ka in kidane, “Maana malla parroosen a amma kapaayye parra a xatta wayyi?” Kassumoosen asse paha kaassuma a ookka'enneeey.

¹¹ Ookuma, akkima teyanta lehna mina'e paxaari ka orra piita qara kalo'e tookta daanni.

¹² Akkima kaaja kaattisa a kela' koorsannaan kodden mina'e, ookumaaw, asseewwen kaattisa a kela' koorsannaan; sede qaropeelaaw tookta upna'ew, ookuma aappa isheetta qapoti'i caatta daanni.

¹³ Wa Waaqa kode me tooyeey; wa isha quu'e, ayno qimissa ettaninni?

¹⁴ Nama qoota mattaaditi desa wa itturopa kodda upnaatta ettaninni in cooy, semmalla atti eta paxaaraatiiyyi xasoodo; eta a neeqatiiyyi xoori, oppa dikado. Waaqa akkima sede ka a pila kuli uume upnaado.

¹⁵ Anti parraayyo an kallaade isasene paata patta kodde oppaayye, we lekayan akke; hanqeellayta hanqeetaadinni panni; juppolayta xoori, juppootaadinni parra leka' kallaanni.

¹⁶ Maana'e dikkeeti hanqeellayta taaki ooka koddita ka issi patissa?

¹⁷ Maana'e akata ukkuttoota nama' koddita taaki eepa nama' koddita ka xooraatti mali toota?

¹⁸ A we takkan paxaara harkoppa a diinnin mali kadi a pila kuli qapannitta ipaxaari; nama Waaqa fuurro, qinda piisanne ishi' salliiy.

¹⁹ Mukissampaya kudani a katama takkan kara ca' kapaayye, ookuma a kuttati'i nama ooka kodde kokkonnanni.

²⁰ Ha hanqeellayta nama, a wa paxaara pattaaw koono ka juppoota kooni in kinnin, piita qaraayye in co.

²¹ Wa orra kiina piisa in dakkaysadan, a taakiti a orxaytaayti kuli ke onno' dakayta kodditaay.

²² Atti kuli akkima a lekatin orra otte iskaranxata i'uptaay.

²³ Anti sede piisan ookuman ekkaysade ka kide, “Ooka kodda'e in piisade” Ma xoori, ookumose ana qaropa caade.

²⁴ Qoota akata kutti ka dikkeeti seki malla, ayno ookuma fada ka isha kaya ettansha?

²⁵ Ookuma maana akkima kodde ka we' piisa akkima koddinaan upnaatta'e ka fadeeta ka oppa qoreetopan mattiyyo tiitayshe ka neequmta akkima neeqi, eepuma kan taarota upnaattaapa mattiyyo tiitayshe.

²⁶ Anka iskatteeta takka akkeew; a satataadi turuura koddite, harkaadi ka sansalaata loqqa' kodden. A laaqqitoota koddite ka neequma'e, toota qaropa qapto. Nama Waaqa fuurro, i'isheetta kela paha. Ma juppolayta xoori turuuraadi oppa'e qapammi.

²⁷ Ooka ikiini, “Qoota piraampira a we' piisati desa, waan olkamma' oorshe ka fade sede.”

²⁸ Sede nefo ammikki'in faani umma an akkini an co; diirta kuma oppaayyen diirta takka akke; ma sene piisa oppaayye, iskatteeta takka nefo an akkine.

²⁹ Sede pattan oppa akke; Waaqa hanqeellaya'e kode ka orra uume ma, ishootta saantada neequmta'e ollopa sukni.