Mataafa Dehaamta 6 - Mataafa Qulqulloota

¹ Piita qaraayye, neequmta pila'en akkeew. Isheetta' nefo nama qara akata ulsi;

² Waaqa, teyanta ka taajuruma isho ulfeena nama' daanni; nama ka wa karittaadi xajeella' dapni in kinnin; ma xoori, Waaqa akkima nama teyantaadin xasoodo eta ishi' daanni in co; haptitta ka ishin xasooni. Sede nefo paata patta ka wa akata neeqa.

³ Nama takka, hellaa dippa qapnaatta ka parra leka kallaatta i'ettansha; ma xoori, kadi punu parra leka' kallaannaayye, oto teyaantadin xasoonni in kinniniiyi ka mooka fayya' teyni in kinniniiyyi, anti in kiini, “Isha kapaayye saldeessa wayyi.”

⁴ Maana malla, patta'e daladeey ka tukkanta kara' tooni; maxxaadi ka panniiy.

⁵ Saldeessa kadi punu la'ayta piirtota in akkininiiyyi ka we'en upniniiyyi, a namoose qaran qapto'e nessuma teyniiy;

⁶ namoose kadi punu lakkin olqaraxata para kuma kuma kallaadaayye ka teyantaadin xasoonni in kinniniiyi, ishootta lakkantiiyyi pora takka opaaw anni in caane?

⁷ Yaala nama piisa koomaraadi mallaaw; umma xajeeltaadin i'ana kayte kida in upo.

⁸ Asseeyye, ooka nama' maanaanne eepa qaraayye qapa? Teekolayta atta akkima orra olli kallaatta isha faanitto upnaattaadinni, maana tookta' qeeda?

⁹ Xajeeltan nessuma dapeeta kapaayye, waan qapa i'ana kayan kideeta wayyi; sede nefo paata patta ka xayxayta diippeeta mina.

¹⁰ Wa amma caati'i, xattaaw maxxa koden; nama maana akka kodde nefo xattaaw upnaysamte; nama a isha qara qapo olliiyyi akka soota in ettaninnin i'upnaysamte.

¹¹ Oton haasa koopniiyyi, tooktaadi ishakkiiy; ka kuli sede maana nama qara nakassa?

¹² Kallaataadi oppaayye, parrasene shakka paata patta kodde a kaattillayta mina tarpina oppaayye, wa nama wayya ayno upa? Oto isha' to'o kammaayye, wa piita qaraayye isha kammandela koddina ayno ishi' lela ettansha?