Mataafa Dehaamta 5 - Mataafa Qulqulloota

Ulfeena a Waaqa waaqaysatta koonaan

¹ Oton tika Waaqa' kelopa' kulliniiyyi, loqqaati tooytaado! Dakkaysatta' deena, kalisoota a eeppa kalinnaan qara qapta; eeppa akkima neequmta koonaan in upaneey.

² Afaatti in jarjarin, fuula Waaqa tura we takkan haasawatta'e karittaayti in jarjarrin; Waaqa moonteeyye caay, atti ka piita qara kittaay, minaddesaaw haasawado.

³ Akkima dikatta koopo, olsaan orra payyahinno mina'e, haasa eepa asseew nyaanynyetaadin upnaysammi.

⁴ Waaqa eeppaan xasoonni in cooy, oton xasa Waaqa' daasattaayye, wa xasa' daasatte irra qara' kalshe ka xasoose a' daasatte dikkishe.

⁵ Xasa a Waaqa' daasatte, kalissa diissata kapaayye, kati' turanneew a' daasannini wayyi.

⁶ Akka juppootoppopa ke in kalinnini'i, arrapaayti akka tupadesa in haasawannini' tooytaado! Ka orxayta tika Waaqa' tura in kidane, “Ishinnin dape ka an upnin mali xasa daasade” Wa' kiite minan, maana'e Waaqa ke qara' miirooda ka kodaayti a harka ke turaayye pashsha?

⁷ Olsa lekaya ka haasa kutta paata pattaay, semmalla atti Waaqa fuure.

Teyantootta paata patta

⁸ Oton piitoppaayye hiyyeessa miiddammiiyyi ka firteeta dukaata isho mapteeta dapniiyyi, sede ke in qawwannin; maana malla, taanynya takkan qaropa taanynya a pila a isha tooyna'e caawweey, ishootta piisa qaropa taanynyada a pila ka caaneewweey.

⁹ Piitoppaayye oton unta palanta' koopniiyyi, orra piisa hiirsanni, nuqusa kuli ka dullaappaayye unta akkanni.

¹⁰ Nama kaaja jaalanno, kaaja pakni in co; nama teyanta jaalanno, tookta a akkanno isha pakinni in kitto; sede nefo paata pattaaw.

¹¹ Oton teyanta koopniiyyi, a damma asseew kapa' koopni; aappa teyantoseti ildaanne tooya diisheey, maana isha qara nakassa.

¹² Kodampayta, kadi punu a kutta taaki a shakka damaayye, mukitta paxaara teyni; teyantoolayta xoori, teyantaadi a kutta mukitta isha qara dawrini.

¹³ Piisse qaraayye, wa neeqa ka nama nyarrahasiisana'en akkeew; sede nefo teyanta ollopa tuulamte ka aappa isheetta qapo'e rakkoota koddite.

¹⁴ Teyantose we takkan minanne panni, aappoose ka oton inna qapaayye wa innaadi' hattinna dapni.

¹⁵ Nama lulleeyye karitta aayyaassoti kara dalanni ka akka lulle dalade mina'ew lulle tooni; umma teyantaadi oppaayye wa harkoppa' qapanna ka isi olli haadanna in caan.

¹⁶ Sede nefo wa akata neeqa; nama akkima dalade mina'e asseew tooni ka patta' yaalli diisheey, tooktaadi maana?

¹⁷ Ka parraadi piisa tukkanta kara damta dammi ka qaapa ka paaqa isho miiran kallaani.

¹⁸ Semmalla nama, parrasene shakka, a Waaqa piita qara ishi' daashe kara'e, kati damma ka ikkina ka wa kamma yaaleetin xasoonna akkima paxaari ka ishi wayyitto in upnaade; sede qoyrittaadi a isha qa'ey.

¹⁹ Semaliiyyiiw, Waaqa oto teyanta ka hapteeta nama' daannooyye ka akka ishin xasoodo' koonooyye ka akkima nama wa isha qa'e akkado ka yaalaadin xasoodo' koonooyye, sede daassata Waaqa.

²⁰ Qoota Waaqa xasa karittaadi ishi' daashe malla, nama parraadi a qapaati desa kuttumtan dikanni in co.