Mataafa Dehaamta 4 - Mataafa Qulqulloota

Miiddota ka yaala isho xawwaysatta

¹ Anka amma miiddota a piita qarandesa kodammitto piisa tooyeew; ka ilmaama a orra qara diitammooti akkeew umma nama ishootta' xasa oorsho in co; piddampayaasso'e hupna harke qapa umma nama ishootta xasa oorsho takka nefo in co.

² Anka haasawade ka kide, “Orra co ka amma kallaanno kapaayye, orra xattaaw le'e wayyi.

³ Ishootta piisa kapaayyeew, nama in dalannin ka neequmta piisse' qarandesa kodammitto in akkinini wayyi.”

⁴ Anka akkima yaala nama ka tooktaadi piisa, xelittaadi yo'eta qudaayyeew deenitto akkeew; sede kuli kan paata patta ka xayxayta diippeta mina.

⁵ Eepa nama, harkaadi ollopa qapanni ka eeyye' kutiini ka doxan isi ikanni.

⁶ Harka lakkin yaaleeta ka xayxayta kamma keeritta kapaayye, harka takkoppa we shakkaya qapnaatta ka nakaytan kallaatta wayyi.

⁷ Anka piita qaraayye wa paata patta kodde takkan akkeew;

⁸ nama takka a xawwaati kallaanno ca; umma inna a xaaye taaki a ollin daladene in qapo; yaalaadi pirammi in co; teyantaadini, qoota “I'ana kayta” kida in upnin malla, i'issi' kide, “Ata ayno mallan pora yaalli ka maana malla xasootta isqara dawrini?” Sede nefo paata pattaaw ka yaala neeqa.

⁹ Koda nama lakki oltura koono qoota tookta fayya' qapo malla, nama takka kodda kapaayye lakki kodda wayyi;

¹⁰ oton ishootta oppaayye takka' pi'aayye, a taaka isha xaasha; oton takka xawwaati pi'aayye, qoota a isha xaasho isha quda in kinnin malla, irakkada.

¹¹ Nama lakki oto ollin mukooyye, olquda'e foolsanni; takka oto xawwaati mukooyye, atta foolsatta ettansha?

¹² Nama oton nama takka a xawwaati co qiiniiyyi, isha puta i'ettansha; ma oton lakki kayaneeyye, takka ka ishootta qiiniiyyi, isqara ikkisatta i'ettanshan; kinjatta sessa a olquda' soohen tapo' mittammi in co.

Orra qara jaaleeta paata patta

¹³ Nuqusa qime ka eepa kodde ka nama qara dehaamta teyyanni in kinnin kapaayye, inna hiyyeessa a ookuma qapa'e wayyi.

¹⁴ Inna takkan kadi punu piitaaysho oppa hiyyuman daladen, taaki tika hida kara sooken nefooyye, nuqusa koddeeta i'ettanshan.

¹⁵ Anka orra co ka piita qaraayye kalo piisa, a innoosen pakka nuqusa oppa' nuqusumma kamma oore ka anno akke;

¹⁶ orra nuqusoose mukinno dikoota in qapo; orra kuli isha kamma xa'e xoori, nuqusoosetinni in xasoonne; sede nefo kan paata patta ka xayxayta diippeeta mina.