Mataafa Dehaamta 3 - Mataafa Qulqulloota

We' piisa'e etaaw ca

¹ Piita qaraayye wa kodamma' piisa'e, etaaw ca

² dalatta'e etaaw ca; toota'e etaaw ca; disheeta'e etaaw ca; shukkeeta'e etaaw ca

³ ikassa'e etaaw ca; dinissa'e etaaw ca; qupeeta'e etaaw ca; pooteeta'e etaaw ca

⁴ pooyta'e etaaw ca, xosalta'e etaaw ca; nyarrahata'e etaaw ca; kirpa'e etaaw ca;

⁵ dakadda alle dakka'e etaaw ca; dakadda ollopa poheeta'e etaaw ca; isqudopa oli qapatta'e etaaw ca; olikela desa kideeta'e etaaw ca

⁶ we' fadeeta'e etaaw ca; alle' diissatta'e etaaw ca; ollopa xaaya'e etaaw ca; alle' dakka'e etaaw ca;

⁷ olkela kaa'a'e etaaw ca; ollopa heeddissa'e etaaw ca; jaw kida'e etaaw ca; haasawaatta'e etaaw ca

⁸ jaalatta'e etaaw ca; jippa'e etaaw ca; oranna torpeeta'e etaaw ca; nakayta qapnaatta'e etaaw ca.

⁹ ka kuli kodampayta yaalaadi' kela maana tookta' qeenni?

¹⁰ Akka kela' kafadane'e, koda ulsa, a Waaqa nama qara' xayshe in akke.

¹¹ Waaqa, etaasso oppa'e we' piisa kode ka paxaarnayshe ka akkima haka paraparati kallaatta kitto dikatta nama kara' xaaye; ma xoori, a xattati paayyatte haka piraampiraati wa isha' kode piisa upnaatta ettaninni in caan.

¹² Nama a tarra qara cooyye, xasootta ka wa paxaara' kodeeta qaropa wa ishi wayya akkima in kinnin in upnaade.

¹³ Nama piisa akkima damo ka ikko ka wa kamma yaale' piisan xasoodo, ini daassata Waaqa.

¹⁴ Wa Waaqa koona' piisa akkima haka paraparati kallaadan in upa; we takkan nefo qara in padaawaman umma we takkan nefo qaraayye in qajan; ha Waaqa akka orra isha tura fuuro malla sede kode.

¹⁵ Wa amma ca, xattaaw caan; wa itturopa kodda, xattaaw turan kodden; Waaqa ka wa xatta kode oppa' oori ka kooni;

Dukaata mureeta piita qara iqajatte

¹⁶ Anka piita qara we takkan akkeew; pora dukaata murraane oppaayye juppoota ca; pora hanqeeta murraane oppaayye neequmta ca.

¹⁷ Anka iskaranxata dikade ka kide, “Waaqa, hanqeellaya ka juppoolaya qara'e darta ka dukaata mura; koda piisa'e ka we' piisa'e etaaw caay.”

¹⁸ Anka dikade ka kideewwe, “Orra akka horeeta qara in qapnin akka upnaadane'e Waaqa ishootta ekkaysanni.”

¹⁹ Wa nama qara' kayna isho wa pinanta qara' kayna takkaneew; akkima takka toono takka asseew tooni ka piisani nessa takkaaw qapan, umma nama pinanta qara in qapo; we' piisa paata patta.

²⁰ Ishootta piisani pora takka opaaw anni; ishootta' piisa piitoppaaw de'en ka piitoppopaaw oorri.

²¹ Nessa nama akkima moontandela anno, nessa a pinanta ka piita kelopa lekkanno ayno upa?

²² Semmalla, kodaadin xasootta maliiyyi wa nama wayya akkima in kinnin in akke; maana malla, ini qoyrittaadi a isha qa'ey; akka wa isha kammandela koddina akko'e, ayno ela isha oorissa ettansha?