Mataafa Dehaamta 2 - Mataafa Qulqulloota

Xasa piita' paata patta

¹ Iskaranxatan dikade ka issi' kide, “Paxaarumta upnaatta'e intoonno ana isi xasassaan isi ekkaysadooy.” Sede kuli kan paata patta.

² Anka kide, “Pora xosalta nefo eepuma, isi xasassa nefo maana orra qara nakaysha?”

³ Dikattiyyo karaayye, qootan saanta ookumatin anta faano malla, eepumannen ela xa'e ka taadeta wayneetatin issi xasassa ekkayshe; ka dikade ka kide, “Parrasene shakka a nama piita qara qapa kara'e, wa aaka a nama piita qara kodeeta ettansha sede patta.”

⁴ Ka kodadda kukutta kode ka issi tikka qupade ka wayneeta kuli dishade.

⁵ Dishma in dishade ka porra aqaa'itta' harmishe ka qara' qora dalta dalla ika lekaya dishe.

⁶ Ka qorasene kukuttanna' pishaan ikissa malla, hartada kapa' qote.

⁷ Ka karpishshadda a diira isho a iskatta here ka karpishshadda a tikiyyoppa dalade nefo qapaaw ka orra ana turan Yursaalami kara' kallaade qaran qapto'e, xelloota okkaya ka a kahirra isho a telalla qapa

⁸ ka issi'i dakara pirreeta isho warqeeta ollopa tuulade ka teyanta a nuqussa isho a awrajjada ollopa oorsade ka palpalaya a kirpa dawna a diira isho a iskatta' qapa; ka xarjaalleta iskatta a diira ishin xasoonnaane kuli qapaaw.

⁹ Orra ana turan Yursaalami kara' kallaade qaran qapto'e anka a kuttati' jaale umma ookumaayo ana qara in tawne.

¹⁰ Wa iltaayo xajeelte takkan nefo an dapne umma sataatiyyo kodaayo piisanne xasootte diisheey, xasoppaayye wa dapte in caan. Tookta an yaaliyyo kela qeede kan sede.

¹¹ A koddito ma, eten waan harkaayyon kode ka kamma yaale piisa tooyeeyye, we' piisa paata patta, asu xayxayta diippeeta mina; piita qaraayye wa nama' tookta kodda in caan.

Ookuma ka eepuma paata patta

¹² Anka, qoota ookuma ka a eepuma isho a taarota dikattapa desa tiitaaweew. Nama pakka nuqusa takka oppa' nuqusummo, wa turan kodde mali maana koda?

¹³ Akkima la'ayta tukkanta kapa wayyi, asseew ookuma eepuma kapa wayyi; anka sede akke.

¹⁴ Ooka nama dikatta a itturopa co i'akkini; eepa nama' xoori, tukkantoppa pora anni. Piraampiraaysho' xoori, akkima takka kodde in akke.

¹⁵ Anka iskaranxata dikanni ka kiini, “Waasene eepa nama qara' kayna, ishoottaaw ana qara' kayaay, ooka koddeetiyyon maanan tookta' qeenni?” Ka iskaran xata kide, “Sede kuli paata pattaaw”

¹⁶ Ooka nama, a eepa' mina'ew teymama; parra itturopa deena oppaayye, ishootta' piisani teymaman ooka nama a eepa' mina'ew to'a.

Yaala nefo paata pattaaw

¹⁷ Koda piita qaraayye kodammo piisa ana nyarrahasiise; anka caatta jippe; sede piisa paata patta ka xayxayta diippeeta mina.

¹⁸ Waan piita qaraayye kamma yaale piisan jippe; maana malla, nama ana kamma desa deeno'en alle diinniiy.

¹⁹ namoose nefo akkima ooka taaki eepa koddo ayno upa? A koddito ma, namoose waasene an piita qaraayye hupniyyo ka harmuumiyyon kodade piisa qara aappa kodda. Sede nefo kan paata pattaaw.

²⁰ Semmalla oton oppa diknnooyye, kodaddasene an piita qaraayye kamma' yaale' piisa xasa ana qara mursiisni.

²¹ Maana malla, nama takka ookuma ka upna isho harmumanne, we takkan kodada. Ka eennoow wa qapa piisa qeeda ka a kamma in yaallini diisha. Sede nefo kan paata patta ka rakkoota akata neeqa.

²² Nama piita qaraayye dikattaadi ka qaapadin wa kamma yaalla piisa kelaayye, maana tookta qeenni?

²³ Parra piisa, kodaasso surumtaaw ka nyarrahataaw umma halkeette nefo dikataadippa nessuma in qapo; sede nefo paata pattaaw.

²⁴ Nama'e, yaalaadi kamma dameeta ka ikkeeta ka ishin xasootta qaropa wa ishi wayya in caan sede nefo, akka harka Waaqa oppaaw deenitto in akke.

²⁵ Isha mali a damo ka ishin xasootta ettansho ayno?

²⁶ Waaqa nama isha xasanno'e, ookuma ka upna ka xasootta daanni; juppolayta turaayye xoori, teyanta a olopa tuulade qeenni ka nama isha xasanno' daanni; sede nefo kan paata patta ka xayxayta diippeeta mina.