Mataafa Dehaamta 12 - Mataafa Qulqulloota

¹ A eta rakkoota in kaynin turan, a parrasene a oppa kuli' kiita'e, “Ana xasanni in caan.” In kaynin turan, etaatti a xayya oppaayye, uumampaytaayti dikado!

² A la'ayta piirtota ka a leya isho a hikka in tukkannin turan, roopa kammaayye oraarta ka in tiitaawnin turan, uumampaytaayti dikado!

³ Oto harkaasene' xaayti a tooytampayta tika pora xarraaneeyye, loqqasene' xaayti kokokkoka ke kela pisha koddaneeyye, ilkasene' xaayti damta alalla qoota lamayaaw kodden malla oto alle' damta malaallaaneeyye, ildasene' xaayti paata lettinna ka lullaaneeyye,

⁴ oto nappaatti horayta orra' dakayni in kinniniiyi, nessa yomatta nefo ka ke' dakaanni in kinniniiyyi, oto iyyitta xampira mukittoppa ke xa'inni in kinniniiyyi, akka nessa iyyittaaysho nefo a' dakayni a' kinniniiyyi,

⁵ oto mara fayyatta ken kammooyye, poroppa anta ka ke fuurinnooyye, arreeta ka ke qara a fuuttota mina' peqtooyye, akka a kupaata' mina lokko shirrittooyye, heenna damta ka ke kara pataneeyye; sitiiyyi oori, nama tikaadi a parapara opa anni; orra pooyno ka poroppa isha kamma xata pooyni.

⁶ Semmalla a yaateta dakara pirreeta in mittamminin, saahina a warqeetoppa koden ka in maajammin, teeppa a kattoota quda sukkene ka ela pisha qara in mittammin, kulpalla pisha ka in pappaqnin turan,

⁷ a piita piitase a oppa deete oppopa in oorrin, hapura ka Waaqase isha daashe kapopa in tiitaawnin turanne, uumampaytaayti dikado.

⁸ Ookase ikiini, “Paata patta! paata patta! we' piisa paata patta! paata patta!”

Dikkatta a we' piisa

⁹ Ookase, ookuma pattanne ma, upna orra kollishe; isha pahanadda lekaya dikade ka oppa qore ka upna lekaya olikamma' qattishe.

¹⁰ Ookase' kidadda orra xasanna'e ollopa oorshe; wa taafe' nefo, kidadda a dukaata ka a paxaara.

¹¹ Kidadda ookka haasawadene, akkima uleeta a quda laajen a sikmayta ishin horeeta qullo mina; haasaddaasso a ishootta ollopa qapsadene, akkima mismaara qarta qapo mina; ishootta' nefo sikmayta takka kapaayyeew daasamen.

¹² Sede piisa qaropaaw, innaayyo! Dehaamse are co teyyado; mataaffa lekaya taafeta, dikkatta in qapo, a kuttati haasa kara qoreetaaw orra kaftinni.

¹³ Amma oori we' piisa lelame, kuutan hidda a haasooseneti' nefo sene; Waaqa fuure ka ajajaadi tooyte; sede koda nama' daasameey.

¹⁴ Waaqa koda nama piisa, a neeqa koddite, a paxaara koddite, wa dekade' piisa a takkan nefo in hasnin maliiyyi, firteeta turopa dehaysha.