Mataafa Dehaamta 11 - Mataafa Qulqulloota

Ooka nama wa koda isha faanitta

¹ Damaatti pisha qara' kate, kuyyawwa lekaya kamma i'akkattaawweey; ikkaamaatti duloppa' ayle, kuyyawwa lekaya kammaayye damta koddan akka akkattaay.

² Itturopa rakkoota piitoppa' deeto a uptooy, teyantaayti pora tappa isho setteti' qoote.

³ Oton oraarta qa'ayye, roopa piita qara' roopni, qoyra kadi punu qinda tupatta taaki qinda qutatta opa pi'aayye, poraadippa'ew eeyye' tawni.

⁴ Nama xayxaytaaw asanno aylaanni in co umma nama a oraartaaw tooyno feranni in co.

⁵ Pora a xayxayta oppan anno taaki nama akkima karitta aayyaassoti kara uumammo, akkima a upnin mina'e, Waaqase we piisa kode, atta akkima kodaadi koono, upnaatta a ettanisso.

⁶ Xotta a aylite oppaayye, a xaamane akka dehan a' uptooy, teykanta karan xottaatti ayle, umma kalaakala kuli harka in qapadan; a punu xottoosen a' teykani taaki a kalaakala sakkattan taaki takka kapa'ew olkapa' sakkattan a' uptooy;

A' xayyoppa kittooyye, uumampaytaayti dikado

⁷ La'ayta ipaxaari, piirtota tooyeta nefo ilta kela ipaxaari.

⁸ Nama parra oppa kallaanna piisa oppaayye a xasoodo; ma parrasene a tukkanta leka akkima caan a dikado; wa deena' piisa paata pattaay.

Dehamta xayyoolayta

⁹ Atti xayyoolayto! A' xayyopa kittooyye xasoodo, parraatti a xayya oppa karittaayti piisan xasoodo ka wa iltaayti akkite, karittaayti ka xajeele' piisa kode; ma xoori, qootose' piisa malla, Waaqa akkima firteeta turopa ke dehaysho upnaado.

¹⁰ Semmalla qaapa alle iskaraayye pashshe ka nyarrahata alle iskapaayye sekayshe; xayyootta ka kokkonnuma wa paata patta'ey.