Mataafa Dehaamta 10 - Mataafa Qulqulloota

¹ Xaaja oto shittoota kara' le'ooyye akkima shittoota xaccinno mina'e, eepuma shakkaya asseew ookuma ka ulfeena nama' shakkinni.

² Dikatta ooka akkittopa tiitaawni; a eepa' xoori, pittittopa tiitaawni.

³ Eepa oton poroppa anniiyy, we upnaanni in co ka akkima eepa kodde nama piisa isi upnaanni.

⁴ Oton mukissampayta ke qara' miirodaayye, poraayti oppa in heeqqan; duupatta dapa kuttayta qara pirriiy.

⁵ Piita qaraayye neequmta an akke caaw; ini nefo ishin dapayta a mukissampaya kapa deeno.

⁶ Eeppa, porra kukutta oppa'e shuumamen; teyaantolaya ka kapan porra shashakka oppa' shuumamen.

⁷ A nuqussa a karpishshadda' mina loqqaan annaan, karpishshadda ka fartada qara annaanen akke.

⁸ Nama qaawa nama' qonno, ishaaw karopa pi'ini; a oxinta poonno, maaka isha qaniinni.

⁹ A daka faanno, dakaaw isha qarri; a qora faannoow, qoyraaw isha qarri.

¹⁰ Oton erkaha lula ka in laajamminiiyyi, hupna kutta orra kara pirri, ookuma xoori, kodase orra qara dikkinni.

¹¹ A tipampayta tipaadin isha in ruurinnin turan, oton maaka ke qaniinaayye, tipampayta tookta in qapo.

¹² Lela afa ooka oppa sookno ulfeena qapa; eepa xoori, afaadi a haasawanna' minanne panni.

¹³ Lela eepa, eepumanne paayyanni ka taarota neeqatin dikkanni.

¹⁴ Eepa haasa koopinni; wa itturopa kodda nama upo takka nefo in co; wa nama to'e kammandela koddina, ayno ishi' lela ettansha?

¹⁵ Eepa nama' qoota pora oppan tikopa kalo in upnin malla, kodaadi ishaaw kaftinni.

¹⁶ Atti' piitaayti, ke a inna a karpishsha isqara nuqusumisse, taanynyadaatti ka teykanta karan sankulta kodannaan, oo ke kido!

¹⁷ Atti' piitaayti, ke a nuqusaayti fayya' qohame, taanynyadaatti ka eta a parpaaccisna oppa'e, maashshootta in koddinin maliiyyi ishin hupna kodatta' dammaan ka ikkinaan, oo xaayti sanayya!

¹⁸ Oto opani alleeta saarinni in kinniniiyyi ka harka eeyye' qapanniiyyi, qaalaadi karopa qepni, isheetta' nefo ifaqinni.

¹⁹ Damta ka taadeta wayneeta kelaayye, xasa ka xosalta teyni; ma sede piisa kaaja mali koddini in kitto.

²⁰ Karittaayti karanxata nuqusan haasaawan umma kaataatti a mukitta nefo kara teyantoolayta in otan; takka punu xampira moonta nefo ke kela haasa qeedaay ka ishootta' lelaay.