Mataafa Dehaamta 1 - Mataafa Qulqulloota

We piisa paata patta

¹ Qaaleta a ookase Yursaalami qara' nuqusume a inna Taawwiti.

² Ookase ikiini: paata patta, paata patta, we' piisa paatapatta, paata patta.

³ Piita qaraayye, nama yaalaadi a yaallo piisa kelaayye maana tookta' qeenni?

⁴ Xelta ideeni ka tarpini; piita xoori haka paraparati poraadi oppaaw kinnaanni.

⁵ Letta ipiirri ka dummiiw ka pora oppeela piirte opa jarjartan tiitaawniiw.

⁶ Uruuritta qinda qutatta opeela dawni ka qinda tupatta opaxata tiitaawniiw ka tiitaawaaw tiitaawni ka kuyyaata piisa poraadi oppanneew tiitaawni.

⁷ Kirrada piisa pakateetoppopaaw urqini. Umma pakateeta immakaanni in kitto. Kirrada pora oppaxata urqen oppopaaw tiitaawni.

⁸ A nama lela ettansho qaropa, we' piisa orraaw kaftinni. Ilta paata akkeeta pakni in kitto, umma napahata paata dakayaan immakaanni in kitto.

⁹ Wa xatta kodde ishoottaaw amma kodda; wa xatta kodame, ishoottaaw kodama. Umma piita qara we' haaraya kodammi in caan.

¹⁰ Hela wa nama ishi' kida'e “Sene haaraya” icaane? We' piisa xattaaw are ca. Ka ino turan are ca.

¹¹ Wa tarpe, opani matte oorsanni in caan; umma orra itturopa dalado, wa ishootta turan kodde matte in oorsado.

Upna ookase kallaatoppa akkade

¹² Anti ooka, Yursaalami karaayye an' nuqusa Isira'eeli.

¹³ Anka wa piita qarandesa koddina' piisa ookuman kara fadeeta ka oppa qoreeta kamma' xa'e; oo Waaqa haadeta atta ulsa'e orra qara' xayshe!

¹⁴ Wa piita qarandesa kodame' piisan akke; ikkan paata patta ka xayxayta diippeeta mina.

¹⁵ Wa quumade qajeela ettaninni in caan umma wa in kinnini, dikama ettaninni in caan.

¹⁶ Ha anti iskaranxata in dikade ka kide, “A ana turan Yursaalami mukshe piisa qaropan a kuttati ookuman jaale ka ookuma ka upna kutta kallaatoppa akke.”

¹⁷ Ka ookuma isho upna ka eepuma isho taarota maana akkima kodden upnaatta kamma' xa'e ka ini akkima xayxayta diippeeta koddite upnaade.

¹⁸ Oton ookuma koopniiyyi, dikattaan kupatta asseew olli koopni; oton upna koopniiyyi nyarrahata asseew olli koopni.