Mataafa a Nehimya 9 - Mataafa Qulqulloota

Akka hella Isira'eeli juppoota a koden Waaqa tura' leladen

¹ Leyoose oppaayyeew kuyyaata kunda lakki afrattatiiyyi samayta a Isira'eeli takka'e olopa sooke. Ka akka juppootaaysho ishootta' dakaatte ikka nyarrahen akkissa'e, mehadda a dapteeta' kalsaden ka matta qarandela tara fidaden ka damta musaden.

² Ka orra pila kapa isi reexxen ka takka' qa'aden ka juppootaaysho isho juppoota a aappadaasso koden piisa Waaqa tura' leladen.

³ A qa'ata qudaaw caaneeyye, seera a Waaqaayshoti ka saateta sessa kara ishootta' nappapame; ikka kamma'e saateta sessa juppootaaysho Waaqa Poqallaasso tura' leladen ka ishi' sakataden.

⁴ Lawaatoppa Iyyaasu ka Paani ka Qaatimi'eeli ka Shapaaniya ka Puuni ka Sherepiya ka Paani isho Kanaani ka porase qara' qa'annaan qara' qa'aden ka Waaqa Poqallaasso opa nessa a kuttan qinsaden.

⁵ Lewaata oppa Iyyaasu ka Qaatimi'eeli ka Paani ka Hashpaaniya ka Sherepiyya ka Hotiiya ka Shapaaniya isho Petahiya ka samayta' kidene, “Qa'ada ka Waaqa Poqallasene' xaayshin haka paraparati kallaanno kalataysada. Ka kida'e, ‘Maxxase' xaayti ulfeessame a kalataysamo! Ka kalata ka ulfeena piisa qaropa kukuttado.’”

Qinseeta a juppootoppa ooreta

⁶ Sekkammaayye, hellaa Isira'eeli ka Waaqa qinsaden ka kidene, “Waaqqo! Ke mali Waaqa pila in co; moontada ka moonta moontada isho wa quda ca ka piita isho wa piita qara ca ka pakatewwa isho wa kara ca piisa' uumte ka piisa' caatta daasse. Uumata a leka a moonta' piisa ka ke' sakatanni;

⁷ ke a Apraami reexade ka piisse a Paapilooniti katama Uuri kara sookshe ka maxxa ishi' kode ka kide, ‘Aprihaami’ atti ken Waaqa Poqallaanno.

⁸ Qoota isha ke' amaname malla, isha olli kodayteeta' kodatte ka piitase a Kene'aaneta ka a Hittaata ka a Aroorata ka a Feresaata ka a Iyyaapusaata isho a Kerkesaata oppa kalto, piisse a Kene'aani sanynyeetaadi' daasha'e kippeeta ishi' daasse. Atti' qoota a' hanqeellitta malla, wa' kiite, ikkoote.

⁹ Rakkoota aappadaanno piita Kipsiti rakkannaan i''akkite. Ka a pakateeta tiima kapa kepa ullupadeneeyye, ishootta dakayte.

¹⁰ Ka nuqusa Kipsi ka mukissampaya isha olli koda koona piisa qara'e ka samayta piitaadi piisa qara wa orra qawwanna' koote. Sede wa malla asse koote, qoota akka aappadaanno miiddinaan akkite malla sede malla kurraayti ka haka awweti' dakaanni.

¹¹ Ka aappadaanno tura pakateeta lakki' pas ki'isse, ika piita kokte oppan tuullen. Ka akka pakateeta seka karopa daka kannaan mina'e, isasene ishootta kamma daanna pakateeta karopa tuqte.

¹² Atti kuyyaateeyye tuuda urrattatinni ishootta tura' qatte; ka halkeetteeyye tuuda apittatin tura' qatte ka pora oppan annaane ishootta ipsa qapte.

¹³ Ka moonteeyye irroota Siina' qaropa lekkatte ka samaytaayti' haasawatte. Ka seera isho taanteta a hanqeeta ka a dukaata ka tanpeeta isho ajajadda a paxaara ishootta' daasse.

¹⁴ Ka sanpataayti a qulqullaawe ishootta' upnasse; ka orxaytaayti Muuse qudan ajajaayti ka taantetaayti isho seeraayti ishootta' daasse.

¹⁵ Ka ete doxeneeyye moonte xata damta ishootta' daasse. Ka ete deepodeneeyye shila kara pisha ishootta' qitisse. Ka akka piitase a' ishootta' daasha'e kippeeta ishootta' daasse oppopa kalan ka lehadane'e, ishootta ajajite.

¹⁶ Ma xoori aappadaanno dutanpataya isho orra karittan kokkoka kodden ka ajajaayti in oowsannin.

¹⁷ Ishootta umma ke' ajajama itiiten ka kodaddasene orra qawwanna a ishootta' koote teymen. Ka karitta kokkonnayshen ka nyiraamumaassotin karpishshuma Kipsi kelopa oora'e saara reexaden. Atti' xoori a' Waaqa diisata. A' xoonampayta ka suraysattampayta; ka miira'e a' jarjarri a kinnin, jaalalaatti ka koopen, semmalla alle ishootta a' diinne.

¹⁸ Ishootta pahana a innayya sa'e issi' killoota' kodaden. Ka kidene, ‘Waaqase' xanno karpishshuma Kipsi kela ino sookshe ini!’ Ka otitta heente kuli ke oten;

¹⁹ ma atti samaytaayti qoota koope malla, akka koommaytase oppa' piramane'e, alle ishootta a' diinne. Laadi kuyyaateeyye tuuda urrattatinni, ishootta tura anta a' diinne; umma halkeette tuuda apitta ishootta' la'assa a' diinne.

²⁰ Ka akka hapurase' xaayti paxaara ishootta kollisho'e, ishootta' daasse. Ka menna a damane ka pisha ikane ishootta' daasse.

²¹ Ka para kunda afuri piisa koommaytoppa ishootta qaarqaarte. Umma wa ishootta' qaje in caan. Mehaddaasso a kalsannaane in kerinne, umma loqqaasso in qappaajne.

²² Ka akka mankistewwa a samayta piita isho nuqussaasso putan ka xeela piitaayshoti kuli qapadane' koote. Ikka piitase a Hasepooni a nuqusase Sihooni mukinno ka piitase a paasaani a nuqusase Ooki mukinno lehaden.

²³ Ka hellaa a hinkaajjeta daka kela' mina lekasse. Ka piitase a' aappadaassoti' daasha'e kippeeta daasse oppopa; ishootta kalisse.

²⁴ Hellaasso ka piisse a Kene'aani oppopa kalen ka lehaden. akka Kene'aanetase piisse oppa kalto ishootta tura' jeerisse; ka akka nuqqussa isho samayta Kene'aani akka ishootta aakto mina qara kahadane'e, hupna ishootta' daasse.

²⁵ Ikka katamaddasene kawwattan kapa oxname isho kappatayteese a piita' qapaden. Ka tikkasene a wa papaxxaara kara immakaadene ka ella a pisha isho dulla a wayneeta ka qora a ekerta isho a luukkawwa dalla lekaya lehaden ka damen ka dudutanen ka kakappaden; ka xoonasene' xaayti koopeetin xasooden.

²⁶ Ma xoori ke' ajajama itiiten ka ke qara' xa'en; ka seeraayti iskammandesa katen. Ka xuumampayasene' xaayti qindaaytipa ishootta tiitassa'e ishootta dehaamma alle' leyshen. Ka a lekatin afaa otitta ke qara' haasawaden;

²⁷ semmalla akka nyaapaaysho ishootta puto'e' koote; ikka ishootta payyahashen. Ikka ete rakkadeneeyye, kepa ullupaden; atti ka moonte xata ishootta dakayte. Qoota suraysattaayti koope malla, orra nyaapaaysho kela ishoottan paho ishootta' daasse.

²⁸ Ma xoori ete nakayta akkadeneeyye, oppa'e ooreneew ka fuulaayti tura' juppoota kodeneew. Atti ka oppa' oorteew ka akka nyaapaaysho ishootta puto' kooteew; ikka ishootta piddeneew. Ma xoori ete tiitaawen ka kepa ullupadeneew, moonte xata ishootta dakayteew. Ka qoota' suraysattaayti koope malla ishoottan pahateew.

²⁹ Ka akka seeraayti qaropa tiitaawane'e, kokkonnasse ka ishootta dehaamte. Ishootta' xoori isi peepen ka ajajaayti puyaden. Ka isase a seeraayti tooytadan ka caadan kapaayye, juppoota koda kamma' kamen. Ka tulta ke' katen ka xolma kokshen ka ke dakaya tiiten.

³⁰ Atti' xoori parra lekaya ishootta kela duupatte; ka hapuraaytin xuumampaya ishootta kollisha ishootta' xa'isse. Ishootta' xoori in dakayne atti ka orra a ishootta kapandesa kalo akka ishootta puto'e, tura' diisse.

³¹ Atti' xoori qoota a Waaqeeyye xoonampayta ka a' diissampayta koddite malla, suraysattose' xaayti koope malla, ishootta alle a' diinne ka alle ishootta a' patinne.

³² Amma nefo Waaqqo, ke a kodayteetaayti isho jaalalaatti a parapara' tooytaanno, Waaqase kutta ka hupna qapo ka orra fuurinno, rakkoota a sapana nuqussa Asooriti paayyatte haka ammati ino ka nuqussaanno ka mukissampayaanno ka qeesewwaanno ka xuumampayaanno ka aappadaanno a xatta ka samaytaayti piisa qara' kayte, dikado;

³³ sede a dapose ino qara' murte, dukaata' qapta. Kadin punu ino' juppoota kooneeyye, atti a hanqeellitta

³⁴ nuqussaanno ka mukissampayaanno ka qeesewwaanno isho aappadaanno a xatta seeraayti in tooytaanne. Umma ajajada isho dehaamta a kokkoka a ishootta' daasse in dakkaysanne.

³⁵ Paxaarumtase' xaayti kutta a mankisteetaaysho oppa ishootta' daasse oppa ka kappatayteetase a piita palda a' ishootta' daasse nefo oppaayye ke in' sakatanne ka juppootaaysho nefo oppa in oorre.

³⁶ Semmalla ino ka awwe, piitase akka aappadaanno oppa daltaadi ka teyantaadi damane ishootta' daasse oppaayye karpishshadda koddine;

³⁷ juppootinno qaran xaate, wa piitinno palannitta piisa ka nuqussasene akka ino pidane' koote opaaw kalli. Ishootta wa ishootta aaka'e ino ka horeetinno qara' kooni. Ino ka oori rakkoota a kutta oppa kinna.”

Samayta akka olli' kale opanka taafen ka qara' farramen

³⁸ Sede piisa minan wa taafame an qara olli kalle akka' taaftane'en pisani mukissampayaanno ka Lewaatinno isho qeesewwaanno ka taafetase an qara olli' kalle kamma kobbeetaaysho toommen.