Mataafa a Nehimya 8 - Mataafa Qulqulloota

Akka Isira seera Waaqa samayta' nappape

¹ Leya tappatta oppaayye samayta Isira'eeli piisa katamaddaasso oppopa kale a safara olli kaye kammaayye. Leyoose oppaayye, kuyyaata paayyotatiiyyi samayta piisa takka'e paapahase xarra pisha tura co oppopa olopa sooke ka akka mataafase a seera a Waaqa Muuse qudan hella Isira'eeliti' daashe qeedo'e, Isirase seera kollinno kaassaden.

² Qeesittase Isira ka leyase a tappatta oppa kuyyaata paayyotati mataafase a seera xorase diira ka iskatta ka mataafase a seera ishootta kalta ettansho piisa turopan de'e.

³ Ka paapahase xarra pisha tura co oppa' qa'ade ka a letta parite paayye ka haka ayaassaappa kaynitto kara'e, mataafase nappape. Samayta piisa ka mataafase a seera dikidaytan dakkaysade.

⁴ Isirase seera kollinno ka porase akka qara xata orra mataafa nappapamo kodene qara' qa'ade; isha olliiyyiiw qinda akkitatinni, Matiitiya ka Shema'i ka Anaayi ka Uriya ka Hilqiiya isho Ma'iseeyya qa'ade. Qindaadi a pittittatinniiw Pedayya ka Misha'eli ka Maalkiyya ka Hashumi ka Hashpaatanahi ka Sakkaariyaasi isho Mashulaami qa'ade.

⁵ Isira ete porase koden qara' qa'adeeyye, qoota porase ishootta qaropeela co qara' qa'ade malla, samayta piisa isha quda' ilda kode. Ka ete mataafase a seera paneeyye piisanti qa'aden.

⁶ Isira ka Waaqase kutta kalataysade. Samayta piisa ka harkaadi opeela xaashe ka “Ameen! Ameen!” kide ka fuula piitan kaye ka Waaqa' sakatade.

⁷ Ka oori ela xa'en ka qaaqa'aden. Lewaatoppa Iyyaasu ka Paani ka Sherepiya ka Yaamini ka Aaqupi ka Shapetaayi ka Hotiya ka Ma'iseeya ka Qeliita ka Asaariyaasi ka Yosaapaati ka Hanaani isho Paliyya ka wa seerose' kiina olkela samayta' la'ayshen.

⁸ Ka mataafase a seera Waaqa samayta' nappapen ka akka wa nappapamma samayta' kalane'e, olkela la'anni,

⁹ Samaytase ete wa seerase' kiina dakkaysannooyye, ipooyni. Nehemiyase piita mukinno ka Isirase qeesitta kodde ka seera kollinno isho Lawaatase samayta kollinnitto ka samayta piisa' kidene, “Awwe kuyyaata a Waaqa Poqallaanno qulqullaawteey, in pooyan ka ilmaama an urqishan.”

¹⁰ Nehemiya ka kide, “Aana kala! Ka damta a paxaara' dama ka ikkayta me'aawno ika. Ka orra a in qapnini kuli' daasha; kuyyaase kuyyaata a Poqallaanno' qulqullaawteey, Waaqa ishan hupnaayshinaay, in nyarrahan.”

¹¹ Lewaata ka samayta' kiite, “Kuyyaase kuyyaata a qulqullaawteey, in nyarrahan.” Ka samayta jaw ki'isse;

¹² samayta qoota wa a qaalese nappapamte kiinitta ishootta' kalte malla, tikkaasso opa kale ka xasan damta dame ka ike a damta qapo ka a in qapnini' qoote.

Isira'eeleta akka xaysonessuma a shaakka' ulfeessite

¹³ Parraytaadiiyyi saarra kaffa ka qeesewwa isho Lawaata akka wa seera kiina ishootta kollisho'e Isira kapopa aanen.

¹⁴ Ka ete mataafase a seera nappapnaaneeyye, Isira'eeleta akka leya tappatta oppaayye shaakka kela xaysonessuma ulfeessito'e Waaqa akka Muuse ajaje kara' akken.

¹⁵ Ka akka seerose' kiino mina'e, akka Yursaalami ka katamaddaappa salishan ka kidane, “Irrowwa qudopa aana ka qora a ekerta a sayteeta ka a ekerta a koommayta ka qoyra a haashshaadi alaawnaan ka sanpaapa isho qora a qara taammaadi haashsha qapa' quura ka shaakkada koda.” Qara akken.

¹⁶ Semmalla samayta ka sooke ka taammasene' quura ka tikkaasso kara'e ka oytaddaasso oppa'e ka paapahase tika qulqulloota tura co oppa'e ka paapahase xarra pisha tura co oppa'e ka paapahase xarra Efreemi kapa co oppa shaakkada kode.

¹⁷ Orrase poojama kela kale piisa ka shaakkada kodade ka kela' kallaade. Sapana a Iyyaasu a inna Newe kammaayye Isira'eeleta wa asse paha in kodane ka in ulfeessine ka in upto. Ka piisanti akata mali xasooden.

¹⁸ Xayso nessumoosen haka payyaden ka dikkadene'e, Isira kuyyaata kuyyaatan seerase a Waaqa oppa samayta' nappapni ka xayso nessumoosen kuyyaata tappa ulfeessen ka akka seerase' kiino qara'e, kuyyaata settattati aata a xaysonessumoseneti qara' kuuta hidda'e, xora kodaden.