Mataafa a Nehimya 6 - Mataafa Qulqulloota

Sullaata pila a Nehemiya qara' kodamte

¹ Sanpalaati ka Toobbiya ka Arapittase Kesheemi isho paarkaaladaanno a ata hase akkan kawwattase a oxinta dawe ka dikkishe, pora a in dawammin ka in kinnini dakayen. Ma xoori hakaseti'i, xarrada kara'e dufanadda an koone.

² Sanpalaati isho Kesheemi ka ana kamma erkana erken ka kidene, “Xooye ka kantadasene laka Oono oppa ca oppa takka kara oli akkina.” Aren ishootta wa neeqa'e ana qara' koda dikaden.

³ Anti ka ishootta orra erke ka kide, “Anti koda kokkokan qapadeey, ishin kapoopa deena an ettansho. Maana'en koda diisha ka ishin kapoopa de'a, sede minan koda ka qa'ada?”

⁴ Ikka akkan ishootta erkanoosen lelo'e, afurin ana' erken; anti ka malseetase'ew ishootta' oorshe.

⁵ Sekkammaayye, Sanpalaati ka a kenattati orxaytaadi takka qara taptaappeta ana' erke. Taptaappeta a ana erke nefo qara ikiini,

⁶ “Ke isho Yihutaata a ke olli kitto akka tiyya heentan ka sede malla kawwatta dawannitan atti ka ishootta qara' nuqusuma heento, mankistewwa a piita a ino kapan desa kala ka sede torraannaan Kesheemi dakaye ka ana' lele.

⁷ Ka akka nuqusa Yihuta koddeetaayti Yursaalami kara' salishane'e, xuumampaya kuli shuumte ana' lele. Umma otootose nuqusa kapan sooka in diisso. Semmalla kadin oli akkina ka oppa torraanninna iwayyi.”

⁸ Anti ka malseeta asse kiinitto ishi' oorshe ka kide, “Sede piisa ka iskara qeede diisheey, wa a' kiinita takkan nefo in koddine.”

⁹ Ishootta akkan kodoose qaatinno'e asse ino fuffurinni ka dikanni ka kiini “Harkaasso inukkullaadan umma kodoose in dikkishan.” Anti' xoori Waaqan qinsade ka kide, “Waaqqo, amma nefo ana kokkonayshe.”

¹⁰ Anti ka takkaayye oopase a Mahetaapi'eeli Shamaa'iyya inna Talaaya isase akka tikaadi oppa in sooknini dufame kapopa aane. Isha ka ana' kide, “Halkeettiiyyi ke ishaata'e de'aneey, ollin tika qulqulloota kelopa qahana ka ittura tika dufna ka eyye' dekanna.”

¹¹ Anti' xoori in isha' kide, “Nama ana paho qahani in co ka tika qulqulloota kela' dekanni in cooy, anti an dekado.”

¹² Eten oppa dikannooyye, akka Sanpalaati isho Toobbiya ana qara isha pidden disheey Waaqa akka isha in erkinin ka ana' kalte.

¹³ Isha akkan anti ishin dapo ikka maxxiyyo pashshane'e ana fuurissa' pidame.

¹⁴ Anti ka Waaqa qinsade ka kide, “Waaqqo, wa Toobbiya isho Sanpalaati koonaane' tooye. Ka xuumampayteetase No'aatiya kidammitto isho xuumampaya a pila a ana fuffuurinna piisa matte qapnaado.”

Kodase a kawwatta oxinta daweeta akka dikkade

¹⁵ A kodase' payyadeeyye kuyyaata kunda keni lakki kammaayye, leyase eluli kidammo oppa kuyyaata kunda lakki kenattati kodase a kawwatta daweeta piisa ka dikkade.

¹⁶ Paarkaaladdasene xanno ete sede dakayeneeye, mankistewwasene ino kapan desa kala kodoose akka hupna Waaqatin kodame upnaaden ka fuuren ka afa qapaden.

¹⁷ Sitiiyyi taanynyada Yihuta lekaya taptaappeta Toobbiyaapa erkini. Toobbiya ka ishootta' malseeta erka quda' tawni.

¹⁸ Qoota Toobbiya enenta Shekaaniya a inna Irahi heme, innaadi Yohanaani ka enenta Mesulaan a inna Perekiya heme malla, Yihuta kara orra lekayta Toobbiya olli xaxa kale.

¹⁹ Ka qootaadi desa wa paxaara'ew haasawanni ka waan anti' kiina piisa qeenni ka anni ka isha' lelli. Isha ka oori taptaappewwa a ishin ana fuffuursha ana erka quda' tawni.