Mataafa a Nehimya 5 - Mataafa Qulqulloota

Miiddota teekolaya qara' kayte

¹ Eta takkaneeyye diira isho iskattaaysho ka saarrasene xaaysho a Yihutaata qara' xa'en ka akata ullupen.

² Ishoottoppa a deemo ka kidene, “Ino isho hellaanno a diira ka a tuparra in lekinnaay akkan dammo ka caanno'e, unta akkatta ino faani.”

³ A deemo ka kiini, “Eta lootatiiyyi unta akkatta mallan kiine ka dullaanno ka wayneetinno isho tikkinno kuli qapsiisne.”

⁴ A deemo ka kiini, “Kipira a dula ka a wayneeta a nuqusa ino qara kaassade daasha'e kaaja kulin leqeessanne.

⁵ Ino an sanynyeeta Yihuta'ew, hellaanno nefo wa ishin hellaasso kela' qajene in caan. A kodditoma ino anka hellaanno isho tuparraanno an xaayne karpishshuma' daaninna; tuparraanno oppa a deemo ka turanneew karpishshadda kodden. Dullaanno ka wayneetinno a orra pila'e koddeneey, hupneeyye maanan qapna.

⁶ Anti eten ulupittaaysho isho rakkootaaysho a lelannaan dakayeeyye, akatan miirode.

⁷ Ka waan koda isi karan xata dikade ka saarrasene isho mukissampayasene peeqe ka ishootta' kide, “Ha ishina hellaassin a piitati daltan leqa leqeessinittan.” Ka qootoseti desa oppa torraatta'e, samayta kuttayta olopa hale.

⁸ Ka ishootta peeqe ka kide, “Ino hellaanno a Yihuta a samayta piita pilaati karpishshuma katame'en furanne. Ishina' xoori akka hellaassin a Yihuta ino hellaasso koddeeti isi katane' koonittan” Mukissampayasene ka oori wa kidane' dapen ka jaw kiden.

⁹ Anka kideewwe, “Wa' koonittane in paxaaran. Allu helani akka paarkaalaanno a piita pila ino in onnini'i, Waaqinno fuuraan kallaanni a' heenne?

¹⁰ Ana ka hellaanno isho orxayaayyo kuli asseewwen samayta' kaaja ka unta leqeessine ma, ishootta qara dalta fadeeta alle' diinna.

¹¹ Dullaasso ka wayneetaaysho ka sayteetaaysho a ekerta isho tikkaasso a' qara qeedattene ammaaw ishootta' oorsha ka kaaja ka unta ka wayneeta isho sayteeta a ishootta' leqeessiten kamma dalta a' teyyatten ammaaw alle ishootta' oorsha.”

¹² Mukissampayasene ka kidene, “Akka ino' kiite qara'en koona ka waan ishootta qara qeedanne piisa ishootta' oorinna, umma wa ishootta qara ca qara an faano.” Anti ka saarrasene isho mukissampayasene akka wa a kidene kodane'e, akka xaxa kalane ishootta kapa' qeesewwa hale, ikka xaxaden.

¹³ Anka xooteta isi quda sookshe ka kiskise ka ishootta' kide, “Nama ishin oppa ulatoose a xaxa kale koda diisho, a Waaqa asse isha kiskiso. Ka wa qapa piisa oppa lulle isha hattisho.” Samayta pisa ka takka' kide, “Ameen!” Ka Waaqa kalataysade. Mukissampayasene ka akka kiden mina' koden.

Nehimiya akka isi jaalanni in kinnin

¹⁴ A nuqusase Arteksiisi nuqusumeeyye para kunda lammattati paayyatte haka para kunda sessa lakkiti'i, parroosen kudanka lakki an oppa mukissampayta piita Yihuta kodde oppa ana isho hellaanno kalaata mushaara a mukissampayta parpaacciisno an teyyanne.

¹⁵ Orra xatta ana turan mukshe xoori akata samayta qara' haadeta ulsayshe. Ka kuyyaatoppa'e wa a damane ka ikkane kapa'e, dakara pirreeta kunda afuri teyyanni. A ishootta qaarqaarra kuli ka akata samayta payyahashen. Anti' xoori qootan Waaqa fuurro malla, asse an koone.

¹⁶ Se kapaayye hupniyyo an qapo piisan kawwattose a oxinta' dawa qaropa diisade diisheey, we takkan nefo issi'i an koone. Orxayaayyo kuli ka kodoose qaropaaw tiitaawen diisheey, we takkan nefo in faane.

¹⁷ Orra piita pila a ino kapan desa kalo ka ino kapopa deeno mali Yihutaata isho saarraasso dippa ka kunda keni tikiyyooyye damta dammi.

¹⁸ Kuyyaata kuyyaatanne xorma takka ka laahadda a kakappa lehi isho lukkala lekaya ana' qalammi. Ka kuyyaata kudan oppa'e, takkanne sankulta taadeta wayneeta ishootta' kodammi; anti' xoori qootan haadeta a samayta qara kitto upo malla, kalaata a mukissampayta parpaacciisnitto an kaassanne.

¹⁹ Waaqqo paxaarumtose an samaytaseti' kode kapa'e, atti wa a paxaara ana' dikado.