Mataafa a Nehimya 4 - Mataafa Qulqulloota

Nehimiya akka toora kodaappa isha qara' kaye piisa ettanshe

¹ Sanpaalati ete akkan ino Yihutaateeyye kodase a kawwatta oxinta daweeta paayyine dakayeeyye, akata miirode ka tanaawe ka ino qara seesa paayye.

² Ka moottadaadi isho xela oranna a Samaariya kapa kide, “Nukkullayoosen a Yutaata maana kooni? Hela ikawwattose' dawan ka kalisoota kuli kalshane? Ka asu kodoose kuyyaata takka oppa'ew dikkishane? Ka dakadda a kawwatta' dawadane tara kara poota ettanshane?”

³ Toobbiya Amoonittase isha kapa'e qa'ade ka kide, “Kawwattose a oxinta a dawnaan kadi ka'alta qaropa fayyatta kiiteeyye issinni qitta.”

⁴ Anti ka Waaqa qinsade ka kide, “Waaqqo, puyatama an puyatamminno dakaye ka otittose a ino onnaan ka ishootta qaropa ooro. Wa a qapane piisa ka qara poojamen ikka piita pila oppa' kalayta kodden.

⁵ Orra kodaayti koono oteneey, dapaaysho ishootta in diishan umma juppootaaysho in teyman.”

⁶ Ino oori kawwattase dawaawwen dawninna. Qoota samayta hibta qaniine ka kodaseeti' japaade malla, kodaase quda paka dikkade.

⁷ Sanpalaati ka Toobbiya isho Arapa ka Amoonata isho Ashtooteta ete akka kawwattase a Yursaalami dawammitto, kawwatta a kara qitte piisa ka kara' oorsammitto dakayeneeyye, akata miiroden.

⁸ Ka akka de'an ka Yursaalami qara oranna xaashan ka orra olkelan yaaqyaaqshane'e, takka olli' kalen.

⁹ Ino xoori Waaqan qinsanne ka orra halkeetta ka kuyyaata tooytota tooyto kitine.

¹⁰ Sitiiyyi samayta Yihuta ka kide, “Orra daka haano ikafade; dakadda olqaropa qitqite aren akata koopeneey; kawwattose a oxinta dawa an ettaninno.”

¹¹ Paarkaaladdaanno ka kideneewwe, “A issi qara in upnin malin anna ka ishootta lenna; kodoose a koonaan ka qa'ada.”

¹² Yihutaata a ishootta kapa kalto ka akka paarkaalaanno ino lessaata dikannaan lekaytan deete ka ino' lelte.

¹³ Seminan anka oori samaytoppaayye, pora opa kawwatta olmina in kaynin piisa oppa'e, orra koraateta ka oranna isho paanta qapado ka kawwatta kamma asado kafa kafa oppaayye reexe.

¹⁴ Eten fayya oppa tooye kammaayye, anka xa'e ka samayta ka saarra isho mukissampaya' kide, “Paarkaalaan fuuran; akkan Waaqase kutta ka fuurammo qapno dikada ka hellaassin a ollin dalattene ka hellaassin a' xaaytene a diira isho tuparra ka iskattaayshin isho wa' qaptane malla oranna torpa.”

¹⁵ Paarkalaanno ka wa ino qara dikadene akkan upnaanne dakayen ka akka Waaqa dikattaaysho ishootta tura mihishe upnaaden. Ino ka oori takka' kodase a kawwatta oxinta daweeta qaropa tiitaawne.

¹⁶ Sekkammaayye oori orra ana olli co oppaayye, oto a deemo koda koonooyye, a deemo sipla kessoppa'e qaaranni ka orana ka kontaleeta ka lawa qapanni ka samayta tooytini. Saarra Yihuta nefo ka akata samayta kokkonnanni.

¹⁷ Samayta ka kawwatta dawni. Orra paata haano ka harka takka oppa orana qapanni ka harka takkan koda kooni.

¹⁸ Orra kawwatta dawno piisa ka surraappa koraateta hidade ka ishin koda kooni. Umma nama kaasa dawno ana kapa dapanni in co.

¹⁹ Anka samayta ka saarra isho mukissampaya' kide, “Kodoose akata kutti ka aren paldiiy, ino ka kawwattase qara' pasne takka ka takka kapaayye sekaadeey,

²⁰ oto kaasa a dawammo dakaytaneeyye, porose a kaasa dawammo oppopa ino kapoopa ollopa xooya. Waaqinno isha ino malla kida ka oranna torpaay.”

²¹ Semmalla kuyyaata piisa teykante paayyatte haka halkeetteeyye hiikka moonta' sooknaane'e, oto a deemo koda koonaaneeyye a deemo mehadda a oranna'e qapanni ka tooytota' qa'anni.

²² Sitiiyyi anka orrase koda kodacciisno' kide, “Akka halkeette ino katama tooytanne'e ka kuyyaate koda kodane'e, nama piisa a nama isha qaarqaarro ollin Yursaalami karaaw muko.”

²³ Ana ka orra an ollin koda kooninno ka orxayaayyo isho orra ana tooytino piisa halkeetteeyye mehaddaanno an isiquda an sooksanni an kinno. Kadin punu pisha oraapatta anninnaayye nama issi quda mehadda oranna dapni in co.