Mataafa a Nehimya 3 - Mataafa Qulqulloota

Kawwattase a Yursaalami akkima qara' ooramte ka dawamte

¹ Eliyaashipise saara qeesewwa kodde isho qeesewwa isha olli ca, xarrase a kawwatta “xarra kaharra” kidammo harmishen ka dawen ka Waaqa' xawwi reexxen ka tura' saanqada koden. Ka haka poqa tooya “Dippa” kidammo isho haka poqa tooya “A Hanaani'eeli” kidammaati' dawen; ka Waaqa' xawwi reexxen.

² Quda' desaaw orra Iyyaariko'e dawe a quda' desa coow, Saakuri inna Imiri daweew.

³ Sanynyeeta Hasnaa'iiw, xarrase a katama xarra murkuuja' kidammo dawte ka tura' qora xarra' dishte ka tura' dufna koote ka torpampayata isho qulfeeta tura' koote.

⁴ Quda' desaaw oopa Haqosimaremooti inna Uriya dawe. Quda' desaaw oopa Mashesaapeli Mashulaami inna Parakiya dawe. Quda' desaaw Sadooqi inna Pa'ana dawe.

⁵ Kawwatta a kamma' desa kittoow orra a katama Teqo'aa'e dawe. Ma xoori orrase katamoosen mukinno kodase ishootta' daasame koda itiite.

⁶ Yodaahe inna Paasehi isho Mashulaami inna Pasotiya xarrase a xatta dawen ka tura' qora xarra' dishen ka tura' dufana koden ka torpampayta isho qulfeeta tura' koden.

⁷ Kepa'oonittase Malaatiya kidammo ka Meronootittase Yaatooni kidammo ka orra Kepaa'ooni isho a Misiba ka kawwattase haka tika a mukissampayta a piita Efraatiisitiiyyi qinda dumaateta opa kittoti dawen.

⁸ Usi'eeli inna Hariya isase warqeeta tummo ka mina desa paayye ka dawe. Hanaaniyase shittoota koono ka mina desa qeedeew ka dawe. Kawwattase a Yursaalami haka porase “kawwatta palda” kidammooti dawe.

⁹ Kawwatta a sede mina desa kittoow Refaaya inna Huuri isase Yursaalami quda paka mukinno ka daweew.

¹⁰ Yataaya inna Harumaafi ka kawwatta tikaadi minan desa kitto dawe. Asede kamma desa kittoow, hatuushi inna Hashepaaniya dawe.

¹¹ Malkiiya inna Haarimi isho Hashupi inna Pahatimo'aapi ka kawwatta a kamma kitto isho kawwattase kawwatta kupaana kidammitto dawen.

¹² A xaaysho mina desaaw Shaalami inna Haloheeshi isase Yursaalami quda paka a ata hase mukinno dawe. Tuparraadi kuli ka isha qaarqaaren.

¹³ Hanuuni isho orra Saanoha ka xarrase qinda naaba opa co dawen. Ka xarrase tura dufna koden ka torpampayta isho qulfeeta tura' koden ka haka xarrase karan miissa haanaaneti dunduma kuma dawen.

¹⁴ Maalkiya inna Rekaapi isase piita Petihakaaremi mukinno ka xarrase karan miissa haanaan daweew ka tura' dufana kode ka torpampayta isho qulfeeta tura' kode.

¹⁵ Shaalumi inna kolihoosi isase piita Misiba mukinno ka xarrase xarra “paada pisha” kidammo dawe ka tura' dufana kode ka torpampayta isho qulfeeta tura' kode. Ka haka porase katama Taawwiti xata lekkannooti'i, kawwattase eenna mankisteeta kapa harta shelaahi kapa kitto kuli dawe.

¹⁶ Nehimiya inna Asipuuqi isase piita Peetsuuri quda paka mukinno ka kawwatta a qinda hawla Taawwiti opa kitto haka hartase oppa pisha taaknaan isho haka safara irreelayaati kitto daweew.

Lawaata a kawatta dawte

¹⁷ Lawaata a kawwatta dwte, Rehumi inna Paanni kawwatta a Nehemiya inna Aspuuqi dawe mina desa paayye ka dawe. Hashapiya isase piita Qe'ila' quda paka mukinno ka pakka piitase a mukinno oppa'e, a kamma' kitto dawe.

¹⁸ A xaadi mina desaaw Paawaa'iy inna Henaadaadi isase piita Qe'ila quda paka ata hase mukinno ka daweew.

¹⁹ Eseeri inna Iyyaasu isase piita Misibba mukinno ka kawwattase tika a kara meeha oranna' xaaynaan mina desa kitto haka qeppeellita kawwattati' dawe.

²⁰ Sede kamma'ew, Paaruki inna Sapaayi ka haka xarra tika a saara qeesewwa a Elyaashipiti kitto dawe.

²¹ Oopase a Haqoosi Maaremooti inna Uuriya ka kawwatta haka piraampira a tika Elyaashipiti' kitto dawe.

Qeesewwa a kawwattase' dawe

²² Sede kamma'e qeesewwa a kawwattase' dawe, qeesewwa Yursaalami kapandesa kalaa'e a Maaremooti dawe mina desa paayyen ka daweneew.

²³ Mina desaaw, Piiniyaami isho Hashupi ka kawwatta a tikkaasso minan desa kitto dawen. Oopa Anaaniya Asaariya inna Ma'iseeyya ka kawwatta tikaadi minan desa kitto dawe.

²⁴ Piinuuyi inna Henataati ka tika Asaariya kapa paayye ka haka qeppeellitta oxintati kawwattase' dawe.

²⁵ Paalaali inna Usaayi kawwattase a tooya tika mankisteeta a illi quta qatto isase qeppeellitta oxinta mina desa kitto ka paapaha tooytampaya kapa kittooyye paayye ka piisa dawe. A xaadi mina desa kittoow Pattaayya inna Paarooshi ka dawe.

²⁶ Kodampaya a tika qulqulloota kela koda koona ka kunkunnaata Ofeeli qara kala, xarrase “Xarra pisha” kidammo mina desa kitto ka qinda piirtotati qatto' dawen.

Orra pila a kodoose' kode

²⁷ Orra Teqo'a ka sede minadesa qeede ka kawwattase kutta qara desa tika qulqulloota tooytinaane mina desa paayyen ka haka oxintase kunkunnaata ofeeli kamma kittooti' dawen.

²⁸ Kawwattase xarrase “xarra farta” kidammo qareela kittoow, qeesewwa ka matta mattanne tikkaasso minan desa dawen.

²⁹ Satooqi inna Imeri ka kawwatta a tikaadi minan desa dawe. Minadesaaw Shamaa'iyya inna Shakkaniya isase xarra a qinda piirtotati 'qato tooytino ka daweew.

³⁰ Hanaaniya inna Shelemiya isho Hanuumi inna saalafi a lehatta ka kawwatta ishootta' daasamte dawen. Mashulaami inna Paraakiyya ka kawwatta tikaadi minan desa kitto daweew.

³¹ Malkiyaase warqeeta tummo ka haka tikase a orra tika qulqulloota kela koda koona isho a nakkaateta kela kalto xarra tooytota mina desa kittooti ka haka qeppeellitta a qinda qutatta piirtotati qato dawe.

³² Orra warqeeta tummo isho nakkaatewwa ka qeppeellitta oxinta quteeyyeela paayyen ka haka pora xarrase “xarra kaharra” kidammo ooro dawen.