Mataafa a Nehimya 2 - Mataafa Qulqulloota

Nehimiya akka Yursaalamipa aane

¹ A Artekisiisi nuqusumeeyye para kunda lakkattatiiyyi leyase niisaani kidammo oppaayye, kuyyaata takkaayye taadeta wayneeta'en nuqusa' daashe. Turan apari an nuqusa tura fuula an poornanne ka an upo.

² Nuqusa ka ana kaassade ka kide, “Nyarrahata' karitta kara qapta diisheey, maana'e asse a' paaqnin mali fuulaayti poornaade?” Anti ka akata fuure.

³ Ka ishi' kide, “Nuquso, para kuma nuqusume! Katama a aappadaanno oppa hawlamene ete asse eeyye' qitqiten, xarradaadi ka apittan kukkupadeneeyye, fuulyyo atta in poornaannin?”

⁴ Nuqusa ka ana' kide, “Ka kuli maana heenta?” Anti ka Waaqa moonta opa qinsade

⁵ ka nuqusa' kide, “Oton in ke kapa ulfeena teye, ikka ke' paxaariiyyi, akkan piitase a Yihuta opa aano ka katamasene a aappadaanno oppa hawlamene harmisho ka qupo'e, ana erke.”

⁶ Stiiyyi nuqusitteeta kuli nuqusa kapa' kuti'e. Nuqusa ka ana kaassade ka kide, “Pora opa annitto kuyyaata meeqa ke qara pira? Akka aytami tiitaawta?” Anti ka kuyyaata meeqa akka ana qara qeetto anka aytami tiitaawo ishi' lele.

⁷ Sekkammaayye, anka akka piita Yihuta opa ana tarpishane'e, akka mukissampaya a kirra Efraatisiti qinda dumaateta opa caati taptaappeta ana' taafo'e nuqusa naappade.

⁸ Ka Asaafise mura mankisteeta' tooytino akka qora pirpirta ka a talta a xarrada oxinta tika qulqulloota isho a katama tura' kodane ka tuuda a tika an anti kela' kallaado kulii kela' qa'ane ana' daasho'e, akka taptaappeta ishi erkamto kuli naappade. Qoota harka Waaqa ana olli co malla, nuqusa ka waan kaassade piisa ana' daashe.

⁹ Nuqusa ka saarra a xela oranna lamaya isho fartada ana olli erke anti ka piisse kirra Efratiisiti qinda dumaateta opa kitto opa aane ka taptaappewwasene mukissampaya' daashe.

¹⁰ Ma xoori Sanpalaatise katama Petehorooniti kalo isho Toobbiyase piita Amooni mukinno ete akka nama Isira'eeleta wa a fayya dikanno de'e dakayeneeyye, akata miiroden.

¹¹ Anti ka Yursaalamipa aane ka eten kuyyata sessa eeyye' pire kammaayye,

¹² qoota Yursaalamiti desa waan koda a Waaqa karittiyyo kara' xaaye an nama takka nefo an lellin mali issi kara' qapade. Ka otomalaayye xeliyya oppa nama lamayta issi quda' qeede umma harreeta an anti qara' kuti'e mali horeeta fee'isa an qapanne takka nefo in kitto.

¹³ Anka xarra qinda naaba opa co karan sooke ka porase ela pofa kidammo kapan tarpe ka qinda tupattatin pora oppopa miissa tuqnaan opa aane. Ka kawwattase a katama a qitqitte ka xarradasene apittan kukkupade piisa lettishe.

¹⁴ Ka kamma'ew, xarrase xarra paada pisha kidammo isho elase a nuqusa opa aane. Ma xoori harreetase an qara' kuti'e pora oppan tarpito in co.

¹⁵ Anka halkeesseti naabase fayyade ka kawwattase katama kapandesa dawen lettishe. Ka porase an oppan de'e oppanneew oore ka xarrase qinda naabatin co karan katama karopa kulle.

¹⁶ Mukissampayasene piitase mukinna ayshopa akkiman aane ka maana akkiman kode in upnaanne. Maana malla anti hakaseti Yihutaata oppaayye qeesewwa ka mukissampaya ka saarra a Yihuta taaki orra itturopa kodoose' kodo'e we takkan nefo an lelleey.

¹⁷ Anka oori ishootta' kide, “Rakkoota an oppa kinno, i'akkinittan. Yursaalami iqitqitte; xarradaadi a oxinta nefo ka apittan kupaden; semmalla amma xaana ka kawwattaadi dawna ka jeera kela pahana.”

¹⁸ Ka kamma'ew Waaqa akka ana olli co ka wa nuqusa ana' kide kuli ishootta' lele. Ishootta ka oori kidene, “Xaana ka dawna!” Ka kodoose paxaara koda'e harmisaden.

¹⁹ Ma xoori Sanpalaati ka Toobbiya isho Arapittase Kesheemi ete wa an ino koda dikanne' dakayeneeyye, ino puyaden ka ino qara xosalli ka kidene, “Ishina amma maana' koonittan? Hela nuqusa qara' xaana' heentane?”

²⁰ Anti ka ishootta' kide, “Waaqa moonta'e ino' dikkisha. Ino orxayaadi anka kodoose' koona; ishina' xoori Yursaalami kara wa' kiitane ‘A xanno’ taaki wa ishin matte oorsatamtane a' qaptan.”