Mataafa a Nehimya 1 - Mataafa QulqullootaNehimiya akka Yursaalami malla dikattaappa' rakkade 1 Wa Nehimiya inna Hakaaliya' kide, A Artekisiisi piita Faarisi qara' nuqusumeeyye para kunda lakkattatiiyyi leyase kiislew kidammo oppaayye anti Nehimiya katamasene kutta Suusa kidamma karan ca. 2 Hellaanno oppaayye takka Hanaani kidammo ka piita Yihutaati orra isikamma' qeede ka ollin ana kapopa de'en. Anti ka qoota Yursaalamiti desa ka qoota peela Yihutaata a Paapiloonipa poojama kela pahe ka ammi'ikki caati desa ishootta kaassade. 3 Ishootta ka ana' kidene, “Yihutaata a poojama kela pahate, rakkoota a kutta ka jeeroppa kitta. Kawwattase Yursaalami kapa tiitasse iqitqitte xarradaadi kuli ka apittan kupaden.” 4 Anti eten sede dakayeeyye in kuti'e ka pooye. Ka kuyyawwa lekaya nyarrahe ka damta musade. Ka Waaqa qinsade ka kide, 5 “Oo Waaqa! Waaqa moonta! Ke a orra ke jaalanno ka ajajaayti tooytino'e kodayteetaayti a jaalala' tooytino atti ikkutti ka fuurammi. 6 Waaqqo! qinseetose' xayyo an orxayaasene' xaayti samayse a Isira'eeli malla halkeetta ka kuyyaata qinsanno ana qara dakaye. Ka ana nefo dikado. Anti juppootan ino Isira'eeleta koonen ke tura' lelanni. Ana isho aappadaanno in ke ishin dapne. 7 Ha ajajaayti kamma in dapne ka dapa neeqa koone. Umma ajajaddasene ka seera isho taantewwasene a orxaytaayti Muuse' daasse an tooytaanne. 8-9 Amma nefo isase a orxaytaayti Muuse' kiite, ‘oton amanama' diissan, samayta piita oppa'en ishin pasisha. Ma xoori oton qindiyyopa' tiitaawtan ka ajajiyyo tooytannittaneeyye, kadi punu pora piita oppa oorto qara' pasteneeyye, porase an akka maxxiyyo oppa' halaamo' reexade oppopan ishin oorsha’ dikado. 10 Waaqqo, sene orxayaatti ka samaytaayti, isasene a' turan hupnaayti a kutta ka harkase' xaayti kokkokan ishoottan pahate. 11 Oo Waaqqo! qinseetiyyo a orxaytaayti dakaye. Ka qinseeta a orxayaatti a maxxaayti ulfeessa jaalannaati kuli dakaye. Ka waan koda heena akka ana olikela teyane'e, awwe karitta nuqusa ana orxaytaayti' nahashe.” Sitiiyyi anti taadeta wayneeta'en nuqusa' daddaanni. |