Mataafa Asteeri 9 - Mataafa Qulqulloota

Putayma Yihutaata

¹ Leyase a kudanka lakkatta ataari kidammo oppa kuyyaata kudanka sessattatiiyyi akkima saleese a nuqusa' mina'e, kuyyaatase oppa allu paarkaala Yihutaata pashshan ka kayte. Ma xoori saleese ikarkalte ka paarkaalaasso qaropa oorte, ikka puten.

² Yihutaata ka orrase ishootta torpa ka pira faano, isi qara oorissaa'e, piitadda a nuqusa mukinna' piisa oppaayye katamadda karopa ollopa ante; qoota orra piisa ishootta fuure malla nama ishootta mineela tooyyatta' nyare takka nefo ka in kinnin.

³ Mukissampaya piitadda ka orra a nuqusa olli koda koono isho qimaya palewwa qoota Mardekiyoosi fuuren malla, piisantiiyyi orra Yihuta'ew qaarqaaren.

⁴ Mardekiyoosi qoota tika nuqusa kara koda kutta' qapo ka ulfeessammo malla, kurraadi piita piisa qara'e dakaade.

⁵ Orra Yihuta ka pora oppa caan pisa oppaayye paarkalaasso koraatetan piren ka pashshen ka wa heenane ishootta qara' koden.

⁶ Katamasene a nuqusa kara kala a Suusa patta karaayye, nama dippa keni leyshen.

^7-10 Orrase le'e oppaayye hellaasene a Haama a inna Hamadaati a paarkaala Yihutaata nama kudani ca; ishootta Parishandaata ka Dalfooni ka Aspaata ka Porraatta ka Adaaliya ka Aridaata ka Paarmaashita ka Arisaay ka Aridaayna ka Waysaata kuli leyshen. Ma xoori waasso a qapane takkan nefo tura in sarre.

¹¹ Kuyyaasetiiyyi katama Suusa karaayye nama meeqa akkima leysame kuli ka nuqusa' lelamte.

¹² Nuqusa ka nuqusitteetase Asteeri' kide, “Orra a Yihuta katama Suusa kara nama dippa keni isho hellaa a Haama kudan kuli leysheey, desa piitadda a pila karandesa orra atta co leyshaneew? Sede qaropa wa a pila a' faanitta icaaneewwe? Amma nefo wa a' faanitta lele ike' kodamaneewweey!”

¹³ Asteeri ka kiite, “Ha nuquso! Oton i'oppa oowsanniiyyi, orra Yihuta a Suusa kara co akkima awwe kode mina'e, parri akka asseew kodo ka pukkadasene a hellaa Haama kudan qora qara' fannisane'e ajaje.

¹⁴ Nuqusa ka akka kaassatte mina'e ajaje; saleeta ka Suusa kara' salissamte, pukkadasene a hellaa Haama piisa ka fannisamen.

¹⁵ Yihutaata a katama Suusa kara kitto ka leyase ataari kidammo oppaayye kuyyaata kudanka afrattatiiyyi piisani ollopa ante ka nama dippa sessa lesseew; ma xoori waasso a qapane takkan nefo tura in saranne.

¹⁶ Akkimose mina'ew Yihutaata a piitadda nuqusa mukina oppa kalto, pora oppa kitto piisaayye olopa sookte ka paarkaalaasso isqara oorisse ka oppa nama kuma kunda tappa keni lesse; ma xoori waasso a qapane takkan nefo tura in saranne.

¹⁷ Sede nefo leyase ataari kidammo oppaayye kuyyaata kudanka sessattatiiyyi asse koddite; ishootta ka kuyyaata kudanka afrattatiiyyi nessaden ka xasan kuyyaase ulfeessen.

¹⁸ Yihutaata a katama Suusa kara kalto xoori, kuyyaata kudanka sessatta isho a kudanka afrattatiiyyi ollopa ante ka kuyyaata kudanka kenattatiiyyi nessatte; ka oppaayye xasan damte ka ikkte.

¹⁹ Semmalla Yihutaata a katamadda shashakka oppa kalto, leyase ataari kidammo oppa kuyyaata kudanka afratta ulfeessini ka oppaayye daassawwa olli' daddanni.

Xaysonessuma a Fuuriimi

²⁰ Mardekkiyoosi ka wa kodame' piisa ollopa taafe ka erkanoosen piitadda a nuqusase Arteksiisi mukinna oppaayye Yihutaata a pora deha isho a sekaayye kito piisa opa erke.

²¹ Erkanosen nefo akkima para piisaayye leyase ataari kidammo oppaayye kuyyaata kudanka afratta isho a kudanka kenattati ulfeessane'e erke.

²² Kuyyawwosen wa malla ulfeessinaane, kuyyawwa Yihutaata paarkalaasso kela pahate, nyarrahataayisho ka xasopa pursamte pooytaayisho ka xosaltopa oorte malla, kuyyawwosen oppaayye akka xasoodan ka daman ka ikan ka daassawwa olli' daashan ka hiyyeessa kuli' daassawwa daashan malla.

²³ Semmalla Yihutaata akkimose a mardekkiyoosi ajaje qara'e kuyyawwosen ulfeessa owsatte.

²⁴ Ha allu Haama inna Hamadaata isase paarkaala Yihutaata' kodde, sanynyeetase a Akaaki kuyyaatoose oppaayye akka piita qara Yihutaata piro'e qoyritta Puuriimi kidammo katade.

²⁵ Ete Asteeri wa Haama Yihutaata qara' sulade nuqusa' lelteeyye, nuqusa ka neequmtase a dikade akka isha qaropa oorto isha isho hellaadi ka qoyra qara fannisamane taafe ka ajaje.

²⁶ Semmalla kuyyawwosen a ulfeessinaane “Puurim” kidamen. Sede nefo Yihutaata piisa akkima a Mardekkiyoosi erkanoosen ishootta piisa erke mina'e wa akkene ka wa a ishootta qara' kaye piisa akka matte oorsatto malla;

²⁷ sanynyewwaasso isho orra ishootta quda kodda faano piisa akka para piisa oppa kuyyawwosen lakki ulfeessane'e aata kodaden ka ulfeessini.

²⁸ Kuyyawwosen Puurim kidamma akkima in teymammini'i, xelta pisa oppaayye ka piita piisa oppaayye toolla piisa katamaddaasso piisa oppa'e ulfeessa ishootta faani.

²⁹ Sekkammayye oori nuqusitteetase Asteeri enenta Apihaayli isho Mardekiyoosi erkanasene a turan Mardekiyoosi' qoota Puuriimi desa erke kokkonnassa'e ka hupna mukissa a qapan akkissa'e, a lammattati erkana taafen ka erken.

³⁰ Mardekkiyoosi ka erkanoosen a xasa nakayta' lella, Yihutaata a piitaddasene a nuqusase Arteksiisi mukinna dippa ka kunda lakki tappa oppa kalto pisa opa erke.

³¹ Erkanoosen nefo nuqusitteetase Asteeri isho Mardekiyoosi olli kale ka akka turan aata damta musatta ka a nyarrahata sookshen mina'e, kuyyawwosen a Puurim ishootta isho xelta itturopa deenitto piisa oppaayye akka tooytamane'e, lamattiiyyi ajajoose tarpishen.

³² Ajajase a nuqusitteetase a Asteeri aatasene a Puurim kokkonnassa malla sookisse ka erkite ka maskapa qaropa taafamen.