Mataafa Asteeri 8 - Mataafa Qulqulloota

Nuqusa akka Yhutaata pahato'e saleeta dawsiise

¹ Awsetiiyyiiw nuqusa ka waasene a Haama paarkaalasene a Yihutaata qapa piisa qeede ka Asteeri' daashe. Asteeri ka firummaata a mardekkiyoosi olli qapto nuqusa' lelte. Mardekkiyoosi ka awsetiiyyi desa paayyatte nuqusa kapopa kulla paayye.

² Nuqusa ka jifeetase a kobbeetaadi a qupitta Haama quda yuke, Mardekiyoosi' daashe. Asteeri ka teyantase a tika Haama qara Mardekiyoosi mukissampayta' koote.

³ Asteeri ka oppa' oorteew ka pooytan loqqa nuqusa' kela pi'ite ka saleetose a Haama namase a sanynyeeta Akaaki kodde Yihutaata patissa salishe, akka koda qara in nakaynin'i, nuqusa naappatte.

⁴ Nuqusa ka uleetase a warqeeta ishi' qape. Asteeri ka ela qa'atte ka kiite,

⁵ “Ha nuquso, oton ana' ulfeesiniiyyi ka waan kaassanna ana' koda heentaayye, wossen an ke kaassanna ka wa paxaara ke pahaneeyye, Haama sanynyeetase a Akaaki innasene a Madaati erkanasene a Yihutaata a piitaaytippa kitto patissa' taafe akka hasane'e, ajaja a hattisho taafe ka erke.

⁶ A taakatiiyyi, anti attan neequmta a orrinno isho firinno qara koddinitto duupatta ettansha?”

⁷ Sekkammaayye nuqusase Arteksiisi ka nuqusitteetase Asteeri isho Yihutittase Mardekiyoosi' kide, “Akkan Haamase Yihutaata patissa dikade qoyra qara' siibsishe ka wa a qapa piisa qeede ka Asteeri' daashe i'uptan.

⁸ A koddito ma saleeta a kobbeeta a tika nuqusa kamma' toommamte ka maxxa nuqusatin salisamte pursammi in kittooy, ishina'ew wa' heentane maxxiyyon Yihutaata' puusa ka kobbeetase a tika nuqusa kamma' toomma.”

⁹ Mardekkiyoosi ka leyase a sessatta siiwaani kidammo oppa kuyyaata kunda lakki sessattaatiiyyi, taafampaya a nuqusa paata taafna piisa ollopa hale. Ka erkanosen akkima orra piita Hinditi paayyatte haka Toobbiyaati cooti'i piita dippa ka kunda lakki tappa mukinnoti ka mukissampayasene nuqusa olli koda koona piisa'e taafaman ka afaddaso opa oorsaman ka erkamane' kode. Ka a Yihutaata'ew, akka afaasso opa oorsamto ka erkamto' kode.

¹⁰ Mardekkiyoosi ka erkanoosen maxxa nuqusase a Artekisiisin taafacciise ka kobbeetase a tika nuqusa kamma' toomme. Ka erkanosen orra fartada kulufsiisno qara erke; fartadoosen nefo tika a nuqusa kara xawwi desa daminni ikka akata hirri.

¹¹ Saleese a nuqusa akka Yihutaata pora oppa kittooyye ollopa anto lelli. Ka piita pisa oppaayye orra ishootta ka hellaasso ka iskattaaysho torpa ka patissa' harmisade leyshan ka piran ka wa paarkalaasso' qapane piisa tura poojan ka teyyadan kuli lelli.

¹² Saleese nefo leyase adaari kidammo, a kudanka lakkatta oppa kuyyaata a kudanka sessattaatiiyyi akkima piisse a nuqusase Arteksiisi mukinno pissa oppa kuyyaata takka oppa'ew koddito'e xoora katen. Xoorosen nefo kuyyaatase allu Yihutaata oppa' piramto oppa'e qapamen.

¹³ Kuyyaasetiiyyi, Yihutaata akka paarkaladdaasso qara haalota pooyya' harmisatto'e, orra piita piisa kuli ka upnaado'e salisamte.

¹⁴ Erkanasene orrase fartadasene a tika nuqusa akata hirraatin kulufno qara jarjartan erkame ka katama Suusa kuli oppa' salisamen.

¹⁵ Mardekkiyoosi ka mehaddasene ilaawa ka ishin ata kalsade ka kuppaarta awla ka kulleese a warqeeta paxaara matta qara' kalssade ka tika a nuqusa karaxata sooke; katama Suusa ka ililitta ka xasan immakaaden.

¹⁶ Awsetiiyyi kuyyaata fayya'e Yihutaata' piire; ikka kuyyaata ulfeena a oppa xasan kahadan ishootta' koddite.

¹⁷ Piitadda isho palewwa a oppa saleeta a nuqusa' salisamte piisa oppaayye, Yihutaata'e kuyyaata xasa'e koddite; ikka xasan ulfeessen; orra piitaddoosen kara co qoota orra a Yihuta fuure malla, orra lekayta orra a Yihutaata quda kodde.