Mataafa Asteeri 7 - Mataafa Qulqulloota

¹ Nuqusase Artekisiisi isho Haama ka sankultase a Asteeri' koote oppopa ollin aanen.

² Kuyyaatase a damta a lammattatiiyyi a taadeta wayneeta ika qara caaneeyye, nuqusa ka oppa' ooreew ka Asteeri' kide, “Maana ana qara kaassatta heenta? Kadi punu mankisteetiyyo quda paka takka kaassannittaayye, in ke' daasha.”

³ Asteeri ka oorisse ka kiite, “Ha nuquso, oton ana ulfeessiniiyyi ka waan kaassanna ana' koda heentaayye, atara ana ka samaytiyyon pahe.

⁴ Ha, ana ka sanynyeetinno kadan karpishshuma patta'en katamme kiiteeyye anti helati an we an kido; ma xoori ana ka sanynyeetinno akkan qalammo ka pirammo'en paarkaalaanno' katamme.”

⁵ Sekkammaayye nuqusa Arteksiisi ka nuqusitteetase Asteeri kaassade ka kide, “Namoose asse koda dikade ayno? Ka amma ayshaayye ca?”

⁶ Asteeri ka oorisse ka kiite, “A ino pira' piisade, ha nyiraamayse are co Haama.” Haama ka oori nuqusa isho nuqusitteeta tura tammaqta' shame ka wa koda' dape.

⁷ Nuqusa ka akata miirode ka ikkaytase eeyye alle' diishe. Ka kapa sooke ka qorasene tika kapa' dishame kelandesa aane. Haama xoori akka nuqusa wa neeqa isha qara koda' piisade akke ka akka Asteeri ishan pahato naappatta'e, tika kela' hase.

⁸ Nuqusa ete desa tiitaawnooyye, Haama porase a nuqusitteeta qara' kutiite qara'e naappuma isheetta tura' pi'e. Nuqusa ete sede akkeeyye ikide, “Hela aappoose laaddi ana are co kapa'e nuqusitteeta qappatta fade?” A nuqusa afaappa haasoosene in pirriniiyyi kunayasene a nuqusa ka ennoow de'en ka ilda qara Haama deken.

⁹ Kunayasene a nuqusa oppa takka Harpoona kidammo ka nuqusa' kide, “Ha Haama akka Mardekiyoosise toota kela ken pahe qara' siibsho'e qoyra dunduma kunda ken minacco tikaadippa' dishe; ikka eeyye ca.” Nuqusa ka kide, “Haama qeeda ka aana qara' siibsha!”

¹⁰ Ikka oori Haama qeeden ka qoyrase a qara Mardekiyoosi siibissa' harmishe qara isha siibshen sekkammaayye oori miirase a nuqusa ka harfe.