Mataafa Asteeri 6 - Mataafa Qulqulloota

Akka nuqusa Mardekiyoosi' shuume

¹ Nuqusa awse a Haama ollin damta dameneeyye, halkeessetiiyyi mukita ishi in deene ikka akka Maskapa a qara' kodadda nuqusa taafamen ishi' qeedan ka nappapane ajaje; ikka qeeden ka isha' nappapen.

² Maskapase qaraayye kunayasene xarra nuqusa' tooytina oppaayye Piktaana isho Tereeshi akka miiroden ka nuqusa ishshaata suladen, Mardekkiyoosi ka sullaase xaaysho upnaade ka akka nuqusa' lelamto kode akkaade.

³ Nuqusa ka kaassade ka kide, “Ka kuli loqsha atta paha'e kapa ishi' daashen ka maanan isha ulfeessen?” Orxayaadi ka oorshen ka kidene, “We takkan nefo opa kapa ishi in koone.”

⁴ Nuqusa ka ishootta kaassade ka kide, “Ata mukissampayaappaayye ayno areeyye ca?” Sitiiyyi, Haama qoyrase akka qara Mardekiyoosi siibsho' disha'e nuqusa qara kaassatta' de'e ka xarroppa ca.

⁵ Orxayaasene a nuqusa ka kidene, “Ha Haama are xarroppa ca;” Nuqusa ka kide, “Ishi' kida a kullo.”

⁶ Ete Haama' kulleeyye, nuqusa ka isha kaassade ka kide, “Nama nuqusa isha ulfeessa heeno'e, maana ishi' kodan?” Haama ka dikade ka kide, “Nuqusa ana maliiyyi ayno'e ulfeenose' daasha?”

⁷ Ka oori nuqusa' kide, “Nama a nuqusa ulfeessa heeno,

⁸ mehaddasene a nuqusa ulfeena kalsanna'e qeedan ka ishi' kalshan ka fartase a nuqusa qara kutiino qeedan ka matta fartoseti qara'e, sira ulfeena nuqusa akkina kalshan.

⁹ Mehaddoosen isho fartose a mukissampayasene kukutta oppaayye nama takka daasamen; ikka mehaddoosen isha quda' kalsho ka fartase qara isha kutiisho ka tura' qato ka katama karandesa ishin a'aano ka salisho ka kido'e, “Tin are nama nuqusa ulfeessa heeno, asse ishi' kooni!”

¹⁰ Nuqusa ka Haama' kide, “Jarjartan aane ka akkima' kiite mina'e, namase Mardekiyoosi Yihutittase xarra nuqusa tura kutiino'e wa' kiite oppa a takkan nefo a hattinnin mali mehadda a nuqusa ishi' kalshe ka fartase qara isha kutiishe ka we' piisa ishi' kode.”

¹¹ Haama ka oori mehaddasene qeede ka Mardekiyoosi' kalshe ka farta qara' kutiishe ka tura' qate ka katamaappa pora ishin tittiitaawni ka salinni ka kiini, “Tin are nama a nuqusa ulfeessa heeno asse ishi' kooni.”

¹² Sekkammaayye mardekkiyoosi ka xarra nuqusa turopa tiitaawe, Haama' xoori fuula poornayshe ka a oppa in oorinnin mali jarjartan alle tikaadipa kale.

¹³ Ete kaleeyye wa isha qara' kaye piisa iskatteetaadi Sereshi isho moottadasene' xaadi piisa' torre; ishootta ka ishi' kidene, “Mardakiyoosi a atti ammaaw tura' putama paayyite oton dukaatannen nama Yihutaatiiyyi keeto ke puta; umma pakanna isha a ettanisso.

Akka Haama qara' toota faratante

¹⁴ A torroosen afappa in pirriniiyyi, kunayasene tika nuqusaati koda koona ka de'en ka sankultase a Asteeri kootepa Haama halen ka jarjartan ollin aanen.